ලංකා ආර්ථිකයේ පිම්ම ගැන IIF වාර්තාවේ Daily FT පුවතේ සිංහල පරිවර්තනය…

ලංකා ආර්ථිකයේ පිම්ම ගැන IIF වාර්තාවේ Daily FT පුවතේ සිංහල පරිවර්තනය…

ශ්‍රී ලංකාවේ ආයෝජක සබඳතා සහ ණය විනිවිදභාවය ඉහළට : IIF වාර්තාවෙන් ශ්‍රී ලංකාවට ලෝකයේ 4 වන ස්ථානය

ශ්‍රී ලංකාව සිය ණය ප්‍රතිසංස්කරණ ක්‍රියාවලියෙන් පසුව ආයෝජක විශ්වාසය නැවත ගොඩනැගීමට දරන උත්සාහය සාර්ථක කර ගනිමින්, ආයෝජක සබඳතා (Investor Relations) සහ ණය විනිවිදභාවය (Debt Transparency) වේගයෙන් වර්ධනය කරගත් රටවල් අතර ඉදිරියටම පැමිණ තිබේ. ජාත්‍යන්තර මුල්‍ය ආයතනය (IIF) විසින් නිකුත් කරන ලද 2026 වාර්තාවට අනුව, මෙම ක්ෂේත්‍රයේ ඉහළම ප්‍රගතියක් අත්කරගත් රටවල් අතරින් ශ්‍රී ලංකාව 4 වන ස්ථානයට පත්ව ඇත.

IIF හි “Investor Relations and Debt Transparency Report 2026: The Transparency Dividend” වාර්තාවට අනුව, ලෝකයේ නැගී එන සහ සංවර්ධනය වෙමින් පවතින රටවල් 57ක් අතුරින් ශ්‍රී ලංකාවේ සමස්ත ආයෝජක සබඳතා ලකුණු ප්‍රමාණය 2025 දී 37.33ක් ලෙස සටහන් වූ අතර, එය 2026 දී 43.67 දක්වා (ලකුණු 50කින්) සැලකිය යුතු ලෙස ඉහළ ගොස් ඇත. මෙයින් ශ්‍රී ලංකාව ජාත්‍යන්තර හොඳම පුරුදු (Best Practices) අනුගමනය කරන රටවල් අතර ඉහළම කාර්තුවට (Top Quartile) ඇතුළත් වී තිබේ.

මෙම අංශයෙන් ලකුණු 6.3ක දැවැන්ත වර්ධනයක් ලබාගනිමින් ශ්‍රී ලංකාව “වේගයෙන්ම ඉදිරියට යන රටවල්” අතරට එක්ව ඇත්තේ වියට්නාමය, බෙලීස් සහ මොසැම්බික් යන රටවලට පමණක් පිටුපසින් සිටිමිනි.

ප්‍රගතියට හේතු වූ කරුණු

මුදල් සහ ක්‍රමසම්පාදන අමාත්‍යාංශය සඳහන් කරන්නේ, ණය විනිවිදභාවය ඉහළ නැංවීම මෙන්ම පරිසර, සාමාජික සහ පාලන (ESG) දත්ත හා ප්‍රතිපත්ති නිසි ලෙස ප්‍රචාරණය කිරීම මෙම සාර්ථකත්වයට ප්‍රධාන හේතුව වූ බවයි.

ණය විනිවිදභාවය: 2025 දී 19 වන ස්ථානයේ පසුවූ ශ්‍රී ලංකාව, පසුගිය වසර තුළ අනුගමනය කළ විධිමත් ණය කළමනාකරණ පිළිවෙත් හේතුවෙන් 2026 දී 5 වන ස්ථානය දක්වා ඉදිරියට පැමිණ ඇත.

රාජ්‍ය ණය කළමනාකරණ කාර්යාලය (PDMO): මෙම ප්‍රගතිය සඳහා රාජ්‍ය ණය කළමනාකරණ කාර්යාලය සහ අනෙකුත් රාජ්‍ය ආයතන එක්ව ආයෝජකයන් සමඟ පැවැත්වූ විධිමත් සබඳතා සහ විනිවිදභාවයෙන් යුතු ණය තොරතුරු ලබාදීම බෙහෙවින් උපකාරී වී ඇත.

ලෝක ආර්ථිකයට ඇති වැදගත්කම

ආරක්ෂක වියදම්, පිරිසිදු බලශක්තිය, කෘතිම බුද්ධිය (AI) සඳහා වන යටිතල පහසුකම් සහ සෞඛ්‍ය පිරිවැය ඉහළ යාම හමුවේ ලෝකයේ ප්‍රාග්ධනය ලබාගැනීම සඳහා දැඩි තරගකාරීත්වයක් නිර්මාණය වී ඇති මොහොතක, තොරතුරු විනිවිදභාවයෙන් ලබාදීම ආයෝජකයන්ගේ විශ්වාසය දිනාගැනීමට ප්‍රධාන හේතුවක් වන බව IIF පෙන්වා දෙයි.

ආර්ථිකයේ මුලික පදනම දුර්වල වූ විට විනිවිදභාවයෙන් පමණක් එය පියවා ගත නොහැකි වුවද, නිවැරදි සහ විශ්වාසදායක ලෙස මූල්‍ය දත්ත හෙළිදරව් කිරීම මගින් ආයෝජකයන්ගේ අවදානම් අවම කර අවිනිශ්චිතභාවය (uncertainty) අවම කරගත හැකිය.

ශ්‍රී ලංකාව අත්කරගෙන ඇති මෙම ප්‍රගතිය තුළින් ජාත්‍යන්තර ප්‍රාග්ධන වෙළඳපොළ තුළ රටේ විශ්වාසනීයත්වය තහවුරු වන අතර, ආයෝජක පදනම පුළුල් කරගැනීමටත්, ණය ගැනීමේ පිරිවැය අවම කරගැනීමටත් ඉදිරියේදී මහත් පිටුවහලක් වනු ඇත.

මූලාශ්‍ර – Sri Lanka records fourth-biggest improvement in IIF investor assessment

Facebook
Twitter
LinkedIn

උණුසුම් පුවත්