යුරෝපා සංගමය ඉන්දියාව දෙසට හැරේ !

යුක්රේන අර්බුධය විසඳීම සඳහා ඇමරිකාවට පැමිණි ප්‍රංශ ජනාධිපති මක්රෝන් හමු වී පැය 24ක් යාමට පෙර ට්‍රම්ප් පැවසුවේ යුරෝපා සංගමය ඇමරිකාවේ ආර්ථිකය සොරා කාපු කල්ලියක් බවත් තමන්ට සිදු වූ අලාභය අයකර ගැනීම සඳහා අප්‍රියෙල් 2වන දා සිට යුරෝපීය ආනයන භාණ්ඩ සඳහා අයකරගන්නා තීරු බදු ගණන් 25% දක්වා වැඩි කරන බවයි. එයට පිළිතුරු ලෙස යුරෝපා සංගමය පැවසුවේ තමන් ඇමරිකාවට ආර්ථික වාසි ලබා දුන් විශාල වෙළඳ පලක් බවත් ට්‍රම්ප් ගේ බදු ප්‍රතිපත්තියට ඔහුට දැනෙන ආකාරයෙන් පිළිතුරු දීමට සුදානම් බවයි. මෙහි ප්‍රථිපලයක් වශයෙන් යුරෝපා කොමිසමේ සභාපතිනිය වන උර්සුලා වොන් ඩර් ලේන් පෙබරවාරි 28 දින ඉන්දියාවට පැමිණ ඉන්දීය අගමැති නරේන්ද්‍ර මෝදී සමඟ ඓතිහාසික ආර්ථික, දේශපාලනික හා ආරක්ෂාව ඇතුළු කේෂ්ත්‍ර රාශියක සහයෝගීතාවයක් සඳහා වූ ඒකාබද්ධ සම්මුතියක අවශ්‍යතාවය අවධාරණය කරනු ලැබුවාය.

යුරෝපීය කොමිසමේ සභාපතිනිය මාධ්‍ය වෙත නිකුත් කල නිවේදනය තුල සඳහන් කර ඇත්තේ මෙම වසර අවසන් වන විට ඉන්දියාව සහ යුරෝපා සංගමය අතර නිදහස් වෙළඳ ගිවිසුමක් අත්සන් කිරීමට අවශ්‍ය බවත්, දිල්ලිය සමඟ ආරක්ෂක සහ ආරක්ෂක හවුල්කාරිත්වයක් ඇති කර ගැනීමට ද අවශ්‍ය බවත්ය.

“භූ දේශපාලනික කැළඹිලි සහිත” ලෝකයක නව උපායමාර්ගික ගිවිසුමක් තහවුරු කිරීමට කාලය උදා වී තිබෙනවා ඉන්දියාව යනු ඒ සඳහා සමීප මිත්‍රයෙක් සේම උපායමාර්ගික සහයෝගිතා කරුවෙක්” යයි ඇය මාධ්‍ය වෙත පවසා සිටියාය.

යුරෝපා සංගමයේ නියෝජිතයින් 21ක් සම්බන්ධ වූ මෙම නවදිල්ලි සංචාරය අවසානයේ, නරේන්ද්‍ර මෝදි සමඟ එක්ව උර්සුලා වොන් ඩර් ලේන් මෙම සිකුරාදා ප්‍රකාශ කළේ ඉන්දියාව සමඟ නිදහස් වෙළඳ ගිවිසුමක් අත්සන් කිරීමට අවශ්‍ය වුවත් “එය එතරම් පහසු නොවන” බවයි.

“නමුත් කාලය සහ අධිෂ්ඨානය වැදගත්. මෙම හවුල්කාරිත්වය දෙපාර්ශවයටම ඇති අවශ්‍යතාවයක්. නියම වේලාව පැමිණෙන තෙක් අප සාකච්චා සිදු කරනවා,” යයි යුරෝපීය කොමිසමේ සභාපතිනිය මාධ්‍ය වෙත පැහැදිලි කළාය.

දෙසැම්බර් මාසයේදී නව කොමසාරිස් වරිය බලයට පත්වීමෙන් පසු ඇය සිදුකල පළමු සංචාරය මෙය වේ. මේ වන විට ඩොනල්ඩ් ට්‍රම්ප් විසින් ලෝක බල තුලනය නවතම තලයකට තල්ලු කර දමා ඇති තත්වයක් ඇමරිකාව හා යුරෝපය ඇතුළු අත්ලාන්තික් සාගර සබඳතා කිසිදා නොවූ විරූ ලෙස බිඳෙන සුළු බව පෙනෙන්නට ඇති හෙයින්, යුරෝපා සංගමය විශ්වාසදායක හවුල්කාරිත්වයන් ලොව අනෙකුත් බලවතුන් සමග සම්බන්ධතා ගොඩනඟා ගැනීමට උත්සාහ කරයි. චීනය, නව රුසියානු-ඇමරිකානු අක්ෂය යන සියළු නව බල තුලනයන් තුල යුරෝපා සංගමය ඒ සඳහා ඉන්දියාව තෝරාගෙන ඇති බව දේශපාලන හා ආර්ථික විශේෂඥයන්ගේ මතයයි.

මෙම සන්දර්භය තුළ, පැරණි මහාද්වීපය මෙන් ඉන්දියාව ද “භූ දේශපාලනික කැළඹීම්වලට මුහුණ දෙන” අවස්ථාවක, යුරෝපා සංගමය සහ ආසියානු දැවැන්තයා අතර සබඳතාවල 2025 “නැඹුරුවීමේ ලක්ෂ්‍යයක්” බවට පත් කිරීමට උර්සුලා වොන් ඩර් ලේයන්ට අවශ්‍ය වේ. “අපගේ හවුල්කාරිත්වය නැවත සිතා බැලීමට අවස්ථාවක් උදා වී තිබේ,” ඇතැයි ඇය පැවසුවේ, එක්සත් ජනපද-චීන ​​හවුලක් සහිත G2 කණ්ඩායමක් හෝ රුසියාව අනපේක්ෂිත අමුත්තෙකු ලෙස සහභාගී වන G3 කණ්ඩායමක් විසින් පිහිටුවන ලද නව ආර්ථික කණ්ඩායමක් මගින් එල්ල වන තර්ජනය ඉස්මතු කරමිනි.

“එය ඉන්දියාවට ජාත්‍යන්තර හා කලාපීය නරක දැක්මක් වනු ඇත,” ඇය තවදුරටත් පෙන්වා දුන්නාය.

නිදහස් වෙළඳ ගිවිසුම මෙම සහයෝගීතාවය තහවුරු කිරීමේ මාර්ගයක් වනු ඇති බව යුරෝපා සංගමයේ විශ්වාසයයි. නිල ඉන්දියානු සංඛ්‍යාලේඛනවලට අනුව, 2023-24 දී පමණක් ඩොලර් බිලියන 137 ක වෙළඳ භාණ්ඩ වෙළඳාමක් සමඟින්, යුරෝපය ඉන්දියාවේ විශාලතම වෙළඳ හවුල්කරුවා ලෙස සඳහන් වේ. යුරෝපා සංගමය ඉන්දියාව තුල තම අපනයනවලින් 2.2% ක් පමණක් නියෝජනය කරන අතර යුරෝපයේ නිෂ්පාදනය කරනු ලබන මෝටර් රථ, මධ්‍යසාර සහ කිරි නිෂ්පාදන සඳහා ඉන්දීය වෙළඳ පල විවෘත කර ගැනීමට යුරෝපා අපේක්ෂා කරනු ලබයි. එහිදී ඉන්දියාව එක්සත් ජනපදයෙන් පසු දෙවන විශාලතම අපනයන වෙළඳපොළ වන යුරෝපයට තම රෙදිපිළි නිෂ්පාදන සහ ඖෂධ වඩාත් පහසුවෙන් අලෙවි කිරීමට කැමත්තක් දක්වයි.

ඩොනල්ඩ් ට්‍රම්ප් විසින් යුරෝපයට සහ ඉන්දියාවට රේගු බදු වලින් සිදු කරන තර්ජනය අවම කර ගැනීම සඳහා මෙම සහයෝගිතාවය අත්‍යවශ්‍ය වේ. එසේම කණ්ඩායම් දෙකම නව වෙළඳ අවස්ථා ලොව පුරා සොයමින් සිටිති.

ඒ අනුව උර්සුලා වොන් ඩර් ලේන් ද ආයෝජන පිළිබඳ ගිවිසුමක් ඉන්දියානු අගමැතිවරයා ගෙන් ඉල්ලා සිටියාය.

“යුරෝපා ආයෝජන මගින් ඉන්දියාවේ රැකියා මිලියන 8ක් නිර්මාණය කර තිබෙනවා. ඉන්දියාව විසින් පනවා ඇති අභ්‍යන්තර වෙළඳපොළ ආරක්ෂා කරන බාධක ඉවත් කළහොත් අපට වඩා හොඳින් ක්‍රියා කල හැකියි,” යයි යුරෝපා කොමිසමේ සභාපතිනිය අංශ කිහිපයක් උපුටා දක්වමින් පැහැදිලි කළේය: එනම් අර්ධ සන්නායක, කෘතිම බුද්ධිය සහ පරිසරය සම්බන්ධ කේෂ්ත්‍ර නිදසුන් ලෙස පෙන්වා දුන්නාය.

යුරෝපයෙන් ලැබෙන ආයෝජන සහ තාක්ෂණ හුවමාරුවලින් ඉන්දියාවේ දුර්වල වෙමින් පවතින එරට කර්මාන්ත කේෂ්ත්‍රයට විශාල ප්‍රතිලාභ ලබා ගැනීමට එමගින් හැකි වනු ඇති බව යුරෝපා සංගමයේ විශ්වාසයයි. මේ වන විට යුරෝපා සංගමය චීන සැපයුම් දාම මත යැපීම අඩු කිරීමට විසඳුම් සොයමින් සිටී. බීජිං වලට සාපේක්ෂව “අවදානම් ඉවත් කිරීමේ” මෙම උපාය මාර්ගයේ නාමයෙන් ඉන්දියාවේ නිෂ්පාදනය කළ හැකි නිෂ්පාදන උර්සුලා වොන් ඩර් ලේන් උපුටා දැක්වීය: විදුලි බැටරි, අර්ධ සන්නායක, හරිත හයිඩ්‍රජන් සහ ඖෂධ මේ අතරින් ප්‍රමුඛ වේ.

සාකච්ඡාකරුවන් මුහුණ දෙන ප්‍රධාන අභියෝග වනුයේ ඉන්දියාව යනු තීරුබදු අයකිරීම සහ තීරුබදු නොවන බාධක මගින් ආරක්ෂා කරන ලද වෙළඳපොළක් සහිත ආරක්ෂණවාදී ආර්ථිකයක් ලෙස මේ දක්වා පැවතීමයි. ලෝක වෙළඳ සංවිධානය ට අනුව, ඉන්දියාවේ සාමාන්‍ය රේගු බද්ද 18% ක් පමණ වේ. එහි අරමුණ වන්නේ දේශීය වෙළඳ පල ආරක්ෂා කිරීම සහ විදේශික ආයෝජයකින් “ඉන්දියාවේ නිෂ්පාදන ප්‍රවර්ධනය කිරීම” සඳහා දිරිමත් කිරීමයි. ආර්ථිකය සම්පූර්ණයෙන්ම ලිහිල් කිරීම සඳහා ඇති බාධක තවමත් ශක්තිමත්ව ඉන්දියාව තුල පවතී. විශේෂයෙන් විදේශීය ආයෝජකයින් විසින් තම දේශීය හා ජාතික ඒකාධිකාරයට තර්ජනයක් එල්ල වේ යැයි බියෙන් සිටින විශාල ඉන්දීය සමූහ ව්‍යාපාර ඉන්දීය වෙළඳ පල විවෘත කිරීමට විරෝධය පල කරමින් ද සිටීම තවත් ජයගත යුතු අභියෝගයකි.

එපමණක් නොව, ඉතිහාසය පෙන්වා දෙන්නේ ඉන්දියාව විසින් ඉදිරිපත් කරන තම ඉල්ලීම් මත ඉඳිමින් ප්‍රධාන වෙළඳ ගනුදෙනු පිලිබඳ සාකච්ඡා වලදී දැඩි ලෙස තම ජාතික නිෂ්පාදන ආරක්ෂා කර ගැනීම සඳහා නොනවතින අරගලයක් සාකච්චා මේසයේදී සිදු කල බවයි. වසර දහයකට වැඩි කාලයක් පුරා පැවති සාකච්ඡාවලින් පසු ඇණහිට ඇති මහා බ්‍රිතාන්‍යය සමඟ අත්සන් කිරීමට නියමිතව තිබු නිදහස් වෙළඳ ගිවිසුම මෙයට සාක්ෂි සපයයි. ඉන්දියාව ඉල්ලා සිටින දේශසීමා වලදී යුරෝපා සංගමය අයකරනු ලබන කාබන් බද්ධ ඉවත් කිරීම මෙන්ම ඉන්දියානු පුහුණු සේවකයින් සඳහා වීසා ලබාදීමේ සංඛ්‍යාව වැඩි කිරීම වැනි ප්‍රධාන ගැටළු ද යුරෝපා සංගමය ඒ අනුව විසඳා ගත යුතුව ඇත.

කෙසේ වෙතත්, මෙම සියළු ඉන්දීය කොන්දේසි පිලිබඳ සලකා බැලු යුරෝපා කොමිසමේ සභාපතිනිය ඒ සම්බන්ධයෙන් යම් ශුභවාදී බවක් පෙන්වා තිබුනු බව මාධ්‍ය වාර්තා පෙන්වා දේ.

“අපට එය කළ හැකියි,” ඇය පැවසූ අතර, සාර්ථක වුවහොත් මෙම ඉන්දීය-යුරෝපා සංගම් නිදහස් වෙළඳ ගිවිසුම “ලෝකයේ අත්සන් තැබූ විශාලතම නිදහස් වෙළඳ ගිවිසුම” වනු ඇති බව ඇය පැවසුවාය. “ආරක්ෂක සහ ආරක්ෂක හවුල්කාරිත්වය වේගවත් කිරීමට” කාලය පැමිණ ඇති බව ඇය පැවසූ අතර, යුරෝපීය මිලිටරි කර්මාන්තකරුවන්ට ඒ සඳහා මැදිහත් වී ඉන්දියාවේ මිලිටරි විවිධාංගීකරණයට හා ප්‍රවර්ධනයට සහාය විය හැකි බව පෙන්වා දුන්නාය.