කිලිනොච්චි දිස්ත්රික්කයේ කුඩා යල කන්නයේ (සිරුපෝහම්) වී වගාව සඳහා අවශ්ය යූරියා පොහොර බෙදාහැරීමේ කටයුතු ආරම්භ කර ඇත.
ජාතික ජන බලවේග ආණ්ඩුවේ මාර්ගෝපදේශයන් යටතේ දිස්ත්රික්කයට අයත් සියලුම ගොවිජන සංවර්ධන දෙපාර්තමේන්තු මගින් ගොවීන්ට යූරියා පොහොර ලබාදීම සිදුකරමින් කුඩා යල කන්නයේ වගා කටයුතු බාධාවකින් තොරව ඉදිරියට ගෙන යාම මෙහි අරමුණ වේ.
මෙහි පළමු අදියර ලෙස කිලිනොච්චි දිස්ත්රික්කයේ ගොවිජන සංවර්ධන දෙපාර්තමේන්තුව සිය බල ප්රදේශයේ සමස්තයක් ලෙස මෙට්රික් ටොන් 786ක යූරියා පොහොර බෙදාහැර ඇති බව වාර්තා වේ.
එමෙන්ම දිස්ත්රික්කයට අවශ්ය අතිරේක යූරියා පොහොර ලබාදීම සඳහාද අඛණ්ඩව කටයුතු සිදුකරමින් පවතී. ගොවිජන සංවර්ධන දෙපාර්තමේන්තු මගින් ඉදිරි අදියරවලදීද කිලිනොච්චි දිස්ත්රික්කයේ කුඩා යල කන්නයේ වී වගාව සඳහා යූරියා පොහොර බෙදාහැරීමට නියමිත බව බලධාරීහු පවසති.
මේ වනවිට මැදපෙරදිග රටවල පවතින යුධ තත්ත්වය හේතුවෙන් ගෝලීය වශයෙන් විවිධ ආර්ථික අභියෝග ඇතිවී තිබේ. විශේෂයෙන් ඉන්ධන සැපයුම, මුහුදු ප්රවාහනය, අකාබනික පොහොර නිෂ්පාදනය හා බෙදාහැරීම වැනි ක්ෂේත්රයන්ට එහි බලපෑම එල්ල වී ඇත.
එවැනි තත්වයක් තුළද කෘෂිකාර්මික නිෂ්පාදනය ආරක්ෂා කිරීම හා ගොවීන්ගේ සුබසාධනය තහවුරු කිරීම රජයේ ප්රමුඛතාවයක් බව සඳහන් වේ. ගෝලීය ආර්ථික අර්බුද පැවතියද රටේ ආහාර සුරක්ෂිතතාවය හා නිෂ්පාදන ආර්ථිකය ශක්තිමත් කිරීමේ අරමුණින් අවශ්ය පොහොර ලබාදීමට රජය කටයුතු කරමින් සිටී.
මේ වනවිට පෞද්ගලික වෙළඳසැල්වල යූරියා පොහොර 50kg මිටයක මිල රුපියල් 18,000 ඉක්මවා ඇති තත්වයකදී ගොවීන්ගේ සුබසාධනය සැලකිල්ලට ගනිමින් ජාතික ජන බලවේග ආණ්ඩුව රුපියල් 10,200ක සහනාධාර මිලකට පොහොර ලබාදෙමින් සිටී.
මෙය ගොවීන්ගේ නිෂ්පාදන වියදම් අඩු කිරීමටත් කුඩා යල කන්නයේ වගා කටයුතු උත්තේජනය කිරීමටත් වැදගත් පියවරක් ලෙස සැලකේ.
ගෝලීය ආර්ථික බලපෑම් සහ යුධ තත්වයන් හේතුවෙන් ඇතිවී ඇති අභියෝගයන්ටද මුහුණ දෙමින් කෘෂිකාර්මික ක්ෂේත්රයට අවශ්ය සහාය අඛණ්ඩව ලබාදෙන බව ගොවීන් විසින්ද සඳහන් කර ඇත.
කිලිනොච්චි දිස්ත්රික්කයට පළමු අදියර ලෙස මෙට්රික් ටොන් 786ක් ලබාදීමෙන් අනතුරුව අවශ්යතාවය අනුව ඉදිරි අදියරවලදීද අතිරේක පොහොර බෙදාහැරීම සිදුකිරීමට නියමිතය. ඒ සඳහා අවශ්ය සැලසුම් මේ වනවිටත් ආරම්භ කර ඇති අතර සියලුම ගොවීන්ට නිසි කාලයේදී පොහොර ලබාදීම සඳහා ගොවිජන සංවර්ධන දෙපාර්තමේන්තු කටයුතු කරමින් සිටී.
ගෝලීය අභියෝග කවරත් තිබුණද රටේ කෘෂිකාර්මික නිෂ්පාදනය හා ආහාර සුරක්ෂිතතාවය තහවුරු කිරීම සඳහා ජාතික ජන බලවේග ආණ්ඩුව අඛණ්ඩව කටයුතු කරන බව මෙම පොහොර බෙදාහැරීමේ වැඩසටහනෙන් නැවත වරක් තහවුරු වන බව සඳහන් වේ.
කිලිනොච්චි දිස්ත්රික්කයේ (විශේෂයෙන්ම ඉරණමඩුව වැව ආශ්රිත ප්රදේශවල) “කුඩා යල කන්නය” හෙවත් දෙමළ භාෂාවෙන් “සිරුපෝහම්” (Sirupokam) ලෙස හඳුන්වන්නේ සාමාන්ය යල කන්නයෙන් බාහිරව, ජල කළමනාකරණය මූලික කරගෙන වගා කෙරෙන විශේෂිත කෙටි කාලීන වගා සමයයි.
