ஸ்ரீலங்கா பொதுஜன பெரமுனவின் பொதுச் செயலாளரும் சட்டத்தரணியுமான சாகர காரியவசம் சற்று முன்னர் கைது செய்யப்பட்டுள்ளார்.

பொலிஸ் மா அதிபரை இலக்கு வைத்து, “வீதியில் வைத்து கல்லால் அடித்துக் கொல்லப்படுவார்” என அவர் வெளியிட்ட கருத்து தொடர்பிலேயே இந்தக் கைது நடவடிக்கை இடம்பெற்றுள்ளது.

குறித்த கூற்று தொடர்பில் வாக்குமூலம் வழங்குவதற்காக மத்திய குற்றப் புலனாய்வுப் பணியகத்திற்கு இன்று (10) வருகை தந்தபோதே அவர் கைது செய்யப்பட்டுள்ளார்.

பயணிகள் போக்குவரத்து பஸ்கள் மற்றும் பொது இடங்களில் மக்களுக்கு இடையூறு ஏற்படும் வகையில் வானொலி அல்லது ஒலிபெருக்கிகளைப் பயன்படுத்துவதற்கு எதிராக புதிய சட்டங்கள் இயற்றப்பட்டு வருகின்றன.

இவ்வாறான அசௌகரியங்களை ஏற்படுத்தும் நபர்களை பிடியாணை (Warrant) இன்றி கைது செய்யும் வகையில் சட்டத் திருத்தங்கள் மேற்கொள்ளப்பட்டு வருகின்றன.

குறிப்பாக, பயணிகள் போக்குவரத்து பஸ்களில் அதிக சத்தத்துடன் ஒலிபெருக்கிகளைப் பயன்படுத்தி மக்களுக்கு அசெளகரியத்தை ஏற்படுத்துவது தொடர்பாக அதிகளவிலான முறைப்பாடுகள் கிடைக்கப்பெற்றுள்ளதை தொடர்ந்தே இந்த புதிய சட்டத் திருத்தங்களை அறிமுகப்படுத்த எதிர்பார்க்கப்பட்டுள்ளது.

இது தொடர்பான கருத்துக்களைக் கொண்ட காணொளி கீழே இணைக்கப்பட்டுள்ளது:

“மெட்ரோ பஸ், எய்ட்ஸ் தொற்றிய அழகான பெண்ணைப் போன்றது” – கெமுனு விஜேரத்னவின் கூற்றுக்கு தனியார் பஸ் உரிமையாளர்கள் கடும் எதிர்ப்பு!

நாட்டின் பயணிகள் போக்குவரத்து சேவையை உயர்தர நிலைக்கு கொண்டு வருவதற்கு எதிராக தனியார் பஸ் உரிமையாளர்கள் சங்கத்தின் தலைவர் கெமுனு விஜேரத்ன வெளியிட்டு வரும் அறிக்கைகளுக்கு கடுமையான எதிர்ப்புகள் கிளம்பியுள்ளன.

ராஜபக்ஷ குடும்பத்தினதும், சஜித் பிரேமதாச உள்ளிட்ட ஏனைய குழுக்களினதும் தேவைகளுக்கு ஏற்ப அறிக்கைகளை வெளியிடும் கெமுனு விஜேரத்ன, முழு தனியார் பஸ் தொழிலையும் வீழ்ச்சியடையச் செய்யும் நபர் என பஸ் உரிமையாளர்கள் குற்றம் சுமத்தியுள்ளனர்.

அரசாங்கத்தினால் ‘மெட்ரோ பஸ்’ (Metro Bus) சேவை அறிமுகப்படுத்தப்பட்டதனைத் தொடர்ந்து, கணிசமான எண்ணிக்கையிலான தனியார் பஸ் உரிமையாளர்கள் தமது பாத அனுமதிப்பத்திரங்களை (Route Permits) இவ்வாறான மெட்ரோ பஸ் சேவைக்கு மாற்றித் தருமாறு அரசாங்கத்திடம் கோரிக்கை விடுத்துள்ளனர்.

இவ்வாறான பின்னணியில், கெமுனு விஜேரத்னவின் இத்தகைய செயற்பாடுகளுக்கு எதிர்ப்புத் தெரிவிக்கும் காணொளி கீழே இணைக்கப்பட்டுள்ளது:

கடந்த 2025 ஆம் ஆண்டின் முதல் 5 மாதங்களில் 236 பில்லியன் ரூபாயாக காணப்பட்ட அரசாங்கத்தின் வரவு செலவுத் திட்ட இடைவெளி (Budget Deficit), இந்த ஆண்டின் அதே காலப்பகுதியில் சுமார் 197 பில்லியன் ரூபாய் உபரியாக (Budget Surplus) மாறியுள்ளது. இது இலங்கையின் அரசாங்க நிதி மேலாண்மையில் அடைந்துள்ள ஒரு முக்கிய திருப்புமுனையாக சுட்டிக்காட்டப்பட்டுள்ளது.

நிதி மற்றும் பொருளாதார பகுப்பாய்வாளர்களின் கவனம் இந்த வெற்றியின் பால் திரும்பியுள்ள நிலையில், பொருளாதார பகுப்பாய்வாளர் சித்ரால் ஜயவர்தன இது தொடர்பில் வழங்கிய முக்கிய பகுப்பாய்வு விவரங்கள் வருமாறு:

வரவு செலவுத் திட்ட உபரி – பொருளாதாரத்திற்கு புதிய நம்பிக்கை

கடந்த சில ஆண்டுகளுக்கு முன்னர் பாரிய பொருளாதார நெருக்கடியை எதிர்கொண்ட இலங்கை, இன்று படிப்படியாக நிதி ஸ்திரத்தன்மையை கட்டியெழுப்பி வருகிறது. 2026 ஆம் ஆண்டின் முதல் ஐந்து மாதங்களில் பதிவாகியுள்ள இந்த ரூ. 197 பில்லியன் உபரி, நாட்டின் நிதி வலுவடைந்து வருவதை உறுதிப்படுத்துகிறது.

அரசாங்கத்தின் வருமானம் அதன் செலவீனங்களை விட அதிகரிக்கும் போதே ‘வரவு செலவுத் திட்ட உபரி’ ஏற்படுகிறது. இது நாளாந்த செலவுகளுக்காக தொடர்ச்சியாக கடன் வாங்கும் தேவையை குறைத்து, நாட்டின் நிதி நிலையை வலுப்படுத்துகிறது.

வரி வருவாய் உயர்வு மற்றும் செலவு மேலாண்மை

இந்த உபரி நிலைக்கு முக்கிய காரணம் அரசாங்கத்தின் வருவாய் வளர்ச்சியாகும். ஆண்டின் முதல் ஐந்து மாதங்களில் அரசாங்கத்தின் வருமானம் மற்றும் மானியங்கள் 13.6% ஆல் அதிகரித்து 2.54 டிரில்லியன் ரூபாயாக உயர்ந்துள்ளது. இதில் வரி வருவாய் மட்டும் 23.9% ஆல் அதிகரித்து 2.32 டிரில்லியன் ரூபாயை எட்டியுள்ளது. உள்நாட்டு இறைவரித் திணைக்களம் மற்றும் இலங்கை சுங்கம் ஆகியவற்றின் திறம்பட வரி வசூல் நடவடிக்கை இதற்கு பிரதான காரணமாகும்.

அதேவேளை, அரசாங்கத்தின் மொத்த செலவினங்கள் திட்டமிடப்பட்ட முறையில் 7.3% மட்டுமே அதிகரித்துள்ளன. இதில் மறுநிகழ்வுச் செலவுகள் (Re-recurrent expenditure) 5.5% எனும் குறைந்த மட்டத்தில் கட்டுப்படுத்தப்பட்டுள்ள போதிலும், நீண்டகால அபிவிருத்திக்கான மூலதனச் செலவுகள் (Capital expenditure) 29.3% ஆல் அதிகரித்து 226.83 பில்லியன் ரூபாயாக உயர்ந்துள்ளது. இது அரசாங்கம் நீண்டகால பொருளாதார வளர்ச்சியில் அதிக கவனம் செலுத்துவதை காட்டுகிறது.

முதன்மை உபரியின் முக்கியத்துவம் (Primary Surplus)

2026 இன் முதல் ஐந்து மாதங்களில் இலங்கையின் முதன்மை உபரி 1.13 டிரில்லியன் ரூபாயாக உயர்ந்துள்ளது. இது 2025 இன் அதே காலப்பகுதியுடன் (ரூ. 742.9 பில்லியன்) ஒப்பிடுகையில் 52.3% வளர்ச்சியாகும். சர்வதேச நாணய நிதியம் (IMF) போன்ற சர்வதேச அமைப்புகள் மற்றும் முதலீட்டாளர்களின் நம்பிக்கையை வெல்வதற்கு இந்த முதன்மை உபரி மிக முக்கிய காரணியாகும்.

எதிர்கால சவால்களும் பொறுப்புகளும்

ஐந்து மாதங்களின் வெற்றியை மட்டும் வைத்து ஆண்டு முழுவதுக்குமான முடிவை எடுக்க முடியாது. எதிர்வரும் மாதங்களில் கடன் சேவை செலுத்துகைகள் மற்றும் உலகளாவிய பொருளாதார மாற்றங்கள் தாக்கத்தை ஏற்படுத்தக்கூடும்.

எனவே, மக்கள் மீது அதிக வரிச்சுமையை சுமத்தாமலும், அத்தியாவசிய பொதுச்சேவைகளை வெட்டிக்கறைக்காமலும், வரித் தளத்தை விரிவுபடுத்துவதன் மூலமும் வீண்விரயங்களை தவிர்ப்பதன் மூலமும் இந்த நிதி ஒழுக்கத்தை தொடர்ந்து பேணுவது அரசாங்கத்தின் பொறுப்பாகும். இந்த உபரித் தொகையை கல்வி, சுகாதாரம், உள்கட்டமைப்பு மற்றும் வேலைவாய்ப்பு உருவாக்கத்திற்கு சரியாகப் பயன்படுத்துவதன் மூலமே நாட்டின் உண்மையான அபிவிருத்தியை உறுதி செய்ய முடியும்.

நீதியைத் தேடி நீதிமன்றங்களை நாடும் மக்கள், தாங்க முடியாத அளவிலான அநீதிகளுக்கும் தாமதங்களுக்கும் ஆளாகும் நிலைக்கு முற்றுப்புள்ளி வைப்பதற்காக அரசாங்கம் திட்டமிட்டுள்ள நீதித்துறை சீர்திருத்தங்களுக்கு வெளிநாடுகளில் வாழும் இலங்கையர்களின் ஆதரவு தொடர்ந்து கிடைத்து வருகின்றது.

பல நாடுகளில் வாழும் இலங்கைச் சட்டத்தரணிகள் இச்சீர்திருத்தங்களுக்கு தமது ஆதரவை தெரிவித்துள்ள நிலையில், பிரித்தானியாவில் வாழும் இலங்கைச் சட்டத்தரணிகள் விசேட செய்தியாளர் சந்திப்பையொன்றை நடாத்தி, இச்சீர்திருத்தங்களின் முக்கியத்துவத்தை தெளிவுபடுத்தியுள்ளனர்.

மேலும், குறித்த சீர்திருத்தங்கள் தொடர்பாக கொண்டு செல்லப்படும் பொய்ப் பிரசாரங்களுக்கு ஆதாரப்பூர்வமாக பதிலளிக்கவும் அவர்கள் நடவடிக்கை எடுத்துள்ளனர்.

குறித்த செய்தியாளர் சந்திப்பின் காணொளி கீழே இணைக்கப்பட்டுள்ளது:

நாட்டில் போதைப்பொருள் கடத்தல், விநியோகம், அதற்கு நிதியுதவி அளித்தல் மற்றும் முழுமையான அரசியல் பாதுகாப்பு வழங்கி வந்த 4 முக்கிய கும்பல்கள், அண்மைக்காலமாக சிறைச்சாலைகளில் இடம்பெற்று வரும் மோதல்கள் மற்றும் பதற்ற நிலைகளுக்கு பின்னணியில் இயங்குகின்றனவா என்பது குறித்து அரசாங்கத்தினதும் பாதுகாப்பு தரப்பினரதும் விசேட கவனம் செலுத்தப்பட்டுள்ளது.

நீர்கொழும்பு சிறைச்சாலையில் ஆரம்பமான பதற்றநிலையுடன் இவ்வாறானதொரு சந்தேகம் எழுந்திருந்த போதிலும், சஷீந்திர ராஜபக்ஷ கடந்த வெள்ளிக்கிழமை (07) வெளியிட்ட அறிக்கையைத் தொடர்ந்து இவ்வாறான சதித்திட்டங்கள் குறித்த பலத்த சந்தேகம் உருவாகியுள்ளது. சிறைச்சாலைகளில் மாத்திரமன்றி, எதிர்காலத்தில் மேலும் பல சம்பவங்கள் நிகழக்கூடும் என அவர் எச்சரிக்கை விடுத்திருந்தார்.

சஷீந்திர ராஜபக்ஷவின் பிரசார நடவடிக்கையின் ஒரு பகுதியாக ஊடகவியலாளர்கள் எனக் கூறிக்கொள்ளும் சிலர் கேட்ட கேள்விகளுக்கு பதிலளிக்கும் போதே அவர் இந்த எச்சரிக்கையை விடுத்திருந்தார். இது தொடர்பில் கருத்து தெரிவித்துள்ள அரசியல் ஆய்வாளர்கள், அரசாங்கம் இக்கூற்றை தீவிரமாக எடுத்துக்கொண்டு உடனடி நடவடிக்கைகளையும் தகுந்த பாதுகாப்புகளையும் மேற்கொள்ள வேண்டும் என வலியுறுத்தியுள்ளனர்.

பொரளை மெகசின் சிறைச்சாலையின் மதிலுக்கு மேலால் சிறைச்சாலைக்குள் சந்தேகத்திற்கிடமான பொதியொன்றை வீச முயன்ற இரு சந்தேகநபர்கள் பொலிஸாரால் கைது செய்யப்பட்டுள்ளனர்.

பொரளை, சீவலி ஒழுங்கை பகுதியில் வைத்தே இவர்கள் கைது செய்யப்பட்டுள்ளனர்.

குறித்த பொதியிலிருந்து போதைப்பொருள், 10 லைட்டர்கள், 02 தொலைபேசிகள், 02 தொலைபேசி சார்ஜர்கள் மற்றும் 10 ஜோடி தோடுகள் உள்ளிட்ட பொருட்கள் கைப்பற்றப்பட்டுள்ளன.

கைது செய்யப்பட்ட சந்தேகநபர்களிடம் தடுத்து வைப்பு உத்தரவின் கீழ் மேலதிக விசாரணைகளை மேற்கொள்ளவுள்ளதாக பொலிஸார் தெரிவித்துள்ளனர்.

ஊடகவியலாளர் பிரகீத் எக்னெலிகொட கடத்தப்பட்ட சம்பவம் தொடர்பில் ஹோமாகம மேல் நீதிமன்றத்தில் இடம்பெற்று வரும் வழக்கு விசாரணையின் போது, கிரித்தலே 3வது ஆயுதப் படைப்பிரிவின் புலனாய்வு முகாமில் தடுத்து வைக்கப்பட்டிருந்த முன்னாள் எல்.ரி.ரி.ஈ உறுப்பினரான சுமத்திபால சுரேஷ் குமார் என்ற ‘முரளி’, குறித்த முகாமில் இருந்த நான்கு இராணுவ அதிகாரிகளை திறந்த நீதிமன்றத்தில் அடையாளங்காட்டினார்.

சாட்சியாளரான சுமத்திபால சுரேஷ் குமார், 2009 முதல் 2013 வரையிலான காலப்பகுதியில் கிரித்தலே இராணுவப் புலனாய்வு முகாமில் தடுத்து வைக்கப்பட்டிருந்ததாக சாட்சியமளித்ததுடன், அவ்வாறு தடுத்து வைக்கப்பட்டிருந்த போது முதலாம் பிரதிவாதி முதல் நான்காம் பிரதிவாதி வரையிலான நபர்களும் ஏனையோரும் அந்த முகாமில் இருந்ததாகக் குறிப்பிட்டுள்ளார்.

ஊடகவியலாளர் பிரகீத் எக்னெலிகொட 2009 ஆகஸ்ட் 27 அன்று கடத்தப்பட்டமை தொடர்பில் 07 பிரதிவாதிகளுக்கு எதிராக சட்டமா அதிபர் ஹோமாகம மேல் நீதிமன்றத்தில் குற்றப்பத்திரிகை தாக்கல் செய்திருந்தார். ஊடகவியலாளர் பிரகீத் எக்னெலிகொட 2009 ஆகஸ்ட் 27 அன்று கடத்தப்பட்டு வழியில் விடுவிக்கப்பட்டிருந்த நிலையில், பின்னர் 2010 ஜனவரி 24 அன்று மீண்டும் கடத்தப்பட்டு காணாமலாக்கப்பட்டார்.

2010 ஜனவரி 24 அன்று இடம்பெற்ற கடத்தல் மற்றும் காணாமலாக்கப்பட்டமை தொடர்பான வழக்கு விசாரணை கொழும்பு முப்படை மேல் நீதிமன்றத்தில் இடம்பெற்று வருகின்றது.

தான் கிரித்தலே முகாமில் தடுத்து வைக்கப்பட்டிருந்த போது, இராணுவ அதிகாரிகள் தொலைபேசியை வழங்கி அவர்கள் தரும் எண்களுக்கு அழைப்பு எடுக்குமாறு அறிவுறுத்தியதாகவும், அவ்வாறு அழைப்பு எடுக்கப்பட்டவர்களில் வெளிநாடுகளில் உள்ளவர்களும் அடங்குவர் என்றும், 2010 ஜனவரி 24 அன்று எக்னெலிகொடவுக்கும் தொலைபேசி அழைப்பு எடுக்கப்பட்டதாகவும் சுமத்திபால சுரேஷ் குமார் என்ற ‘முரளி’ நீதிமன்றத்தில் தெரிவித்துள்ளார்.

ஸ்ரீலங்கா சுதந்திரக் கட்சியின் மெடிரிகிரிய தொகுதி அமைப்பாளர் சிந்தக டெரன்ஸ் விஜேரத்ன ஹெரோயின் போதைப்பொருளை கடத்திச் சென்றபோது கைது செய்யப்பட்டுள்ளார்.

கைது செய்யப்பட்ட இதன்போது அவருடன் அவரது மனைவியும் பயணித்துள்ளதாக தெரிவிக்கப்படுகிறது.

ஹிங்குராக்கொட பகுதியில் வைத்தே இவர்கள் இருவரும் கைது செய்யப்பட்டுள்ளதாக மேலும் தெரிவிக்கப்படுகின்றது.

இலங்கையின் மக்கள் தொடர்பாடல் துறையின் முன்னோடியும், ஆசிய தொடர்பாடல் கோட்பாட்டின் முன்னணி அறிஞருமான பேராசிரியர் விமல் திஸாநாயக்க காலமானார்.

அமெரிக்காவின் ஹவாயில் காலமான போது பேராசிரியர் விமல் திஸාநாயக்கவுக்கு 86 வயதாகும்.

இலங்கையில் மக்கள் தொடர்பாடல் தொடர்பான முதலாவது பல்கலைக்கழக கலாநிதியான பேராசிரியர் விமல் திஸාநாயக்க, இலங்கை இலக்கிய விமர்சனம், மக்கள் தொடர்பாடல், சினிமா ஆய்வு மற்றும் ஆசிய தொடர்பாடல் கோட்பாடுகள் தொடர்பில் சர்வதேச ரீதியில் புகழ்பெற்ற முன்னணி அறிஞராவார். இவர் ஒரு கவிஞராகவும், நூலாசிரியராகவும் திகழ்ந்தார்.

களனிப் பல்கலைக்கழகத்தின் மக்கள் தொடர்பாடல் கற்கைகள் திணைக்களத்தின் ஆரம்பகர்த்தாக்களில் ஒருவராகவும், அதன் முதலாவது திணைக்களத் தலைவராகவும் செயற்பட்டு, இலங்கை பல்கலைக்கழக அமைப்பில் மக்கள் தொடர்பாடல் பாடத்தை கல்வி மட்டத்தில் அறிமுகப்படுத்துவதற்கு பேராசிரியர் விமல் திஸாநாயக்கவே முன்னின்றார்.

கண்டி திரித்துவக் கல்லூரியில் ஆரம்பக் கல்வியைப் பெற்று, அன்றைய இலங்கை பல்கலைக்கழகத்தில் இணைந்து சிங்களம், சமஸ்கிருதம் மற்றும் ஆங்கிலம் ஆகிய மூன்று மொழிகளையும் கற்று சிங்கள மொழியில் கௌரவப் பட்டத்தைப் பெற்ற அவர், பேராதனைப் பல்கலைக்கழகத்திலிருந்து உருவான ஒரு சுயாதீன அறிஞராகவும் கருதப்படுகிறார்.

பின்னர் இங்கிலாந்தின் கேம்பிரிட்ஜ் பல்கலைக்கழகத்தில் இணைந்து ஆங்கில இலக்கியத்தில் கலாநிதிப் பட்டம் பெற்ற பேராசிரியர் விமல் திஸாநாயக்க, 1975 ஆம் ஆண்டு பெற்ற உயர் புலமைப்பரிசில் மூலம் பென்சில்வேனியா பல்கலைக்கழகத்தில் மக்கள் தொடர்பாடல் மற்றும் சினிமா தொடர்பான முனைவர் பட்டத்திற்கு பிந்தைய (Postdoctoral) பட்டத்தையும் பெற்றார்.

1979 ஆம் ஆண்டு அமெரிக்காவின் ஹவாய் பல்கலைக்கழகத்தில் நியமனம் பெற்று வெளிநாடு சென்ற பேராசிரியர் விமல் திஸாநாயக்க, அங்கு மக்கள் தொடர்பாடல் பேராசிரியராகப் பணியாற்றியதுடன், ஹொங்கொங் பல்கலைக்கழகத்தின் கெளரவப் பேராசிரியராகவும் கௌரவிக்கப்பட்டார். இது தவிர, பிரித்தானியாவின் பிபிசி (BBC) வானொலி சேவையினாலும் அவர் சிறப்பு மதிப்பிற்குட்படுத்தப்பட்டிருந்தார் என்பதும் குறிப்பிடத்தக்கது.