අනුරාධපුරේ බුලංකුලම වැව් රක්ෂිතයත් දේශපාලන අනුහසින් කොටස්කර විකුණලා

අනුරාධපුරේ බුලංකුලම වැව් රක්ෂිතයත් දේශපාලන අනුහසින් කොටස්කර විකුණලා

අනුරාධපුර පූජා නගරයේ ඓතිහාසික ජයවැව (බුලංකුලම) රක්ෂිතය ප්‍රදේශය ඇතැම් දේශපාලඥයන්ගේ අනුදැනුම මත පිරිසක් විසින් කොටස්කර විකුණමින් තිබෙන බව වාර්තා වේ.

“අනුරාධපුර – තන්තිරිමලේ මාර්ගයේ ලෝලුගස්වැව මංසන්ධිය දක්වා මෙම වැව් රක්ෂිතය පැතිර පවතිනවා. මේ වෙනකොට වැව් රක්ෂිතයෙන් වැඩි ප්‍රමාණයක ඉඩම් බලහත්කාරයෙන් කොටුකරලා. සමහර කොටස් ඉහළ මිළගණන්වලට විකුණලා ඉවරයි. ඒ වගේම අපට ආරංචියි මේ වැව් රක්ෂිතයේ අනවසරයෙන් අල්ලාගෙන තියෙන ඉඩම්වලට කාපට් පාරක් ලබා දෙන්ඩත් ප්‍රදේශයේ දේශපාලඥයෙක් උත්සාහ කරනවා කියල” යැයි අනුරාධපුර මහ නගර සභාවේ නාගරික මන්ත්‍රී විරාජ් රණවීර පවසයි.

මෙම නිරීක්ෂණ චාරිකාවේදි සැදැහැවතුන් විසින් ශ්‍රී මහා බෝධීන් වහන්සේට දානය පූජාකර ඉවත් කෙරෙන මැටි පාත්‍ර උතුරු මැද පළාතේ ඉංජිනේරු දෙපාර්තමේන්තුවේ නිලධාරියෙකු තොග පිටින් රැගෙනවිත් තම නිවසට පිවිසෙන මාර්ගයට දමා තම නිල වාහනයෙන්ම ඒවා කුඩුකර මාර්ගය පුළුල් කිරීමේ නිරතව සිටින අයුරු දක්නට ලැබිණි. දිනපතා උඩමළුවේ බුද්ධ පූජාවෙන් පසු ඉවත් කෙරෙන මැටි පාත්‍රා මෙම නිලධාරියා සිය නිලබලය යොදා අනුරාධපුර මහ නගර සභාවේ කසළ ඉවත්කරන වාහන මගින් වැව් රක්ෂිතයේ ඇති තම නව ඉඩමේ පාර සකස් කර ගැනීම සඳහා යොදාගන්නා බවට ප්‍රදේශවාසීහු චෝදනා කරති.

මෙම නිලධාරියාට අයත් ඉඩම ඇතුළු සම්පූර්ණ ප්‍රදේශයම බුලංකුලම වැව් රක්ෂිතයට අයත් භූමියක් බව පෙන්වාදෙන ප්‍රදේශයේ ජනතාව නගරයේ ඇතැම් ව්‍යාපාරිකයින් දේශපාලකයින්ගේද සහාය ඇතිව මෙම වැව් රක්ෂිතය කැබලි කර ඉහළ මිල ගණන්වලට අළෙවිකරමින් සිටින බවත් මේ වනවිටත් වැව් රක්ෂිතයේ බොහෝ ස්ථානවල නිවාස ඉදිවෙමින් තිබෙන බවත් ඔවුහු කියා සිටිති.

මේ පිළිබඳව මධ්‍යම නුවරගම් පළාත ප්‍රාදේශීය ලේකම් ගාමිණී සේනාරත්න මහතාගෙන් සිදුකළ විමසුමේදි ඒ මහතා මෙසේ පැවසීය.

“මේ රක්ෂිතයේ සමහර තැන්වල ගෙවල් හදල තියෙනවා. ඒවට බලපත්‍ර නැහැ. සමහර ගෙවල් අවුරුදු තුන හතරකට කලින් හදපුවා. කොහොම උනත් අපි ලබන සඳුදා ඉඳල රක්ෂිතය මනිනවා. ඊට පස්සේ තමයි අනවසර ඒවට තීන්දුවක් ගන්න වෙන්නේ. කාපට් පාරක් දාන එක ගැන නම් මට වාර්තාවෙලා නැහැ. මොකද පාරවල් දාන්නේ අපි නෙමේනෙ” යනුවෙනි.

මෙම රක්ෂිතයේ ඉඩම් බලහත්කාරයෙන් අල්ලා ගැනීම පිළිබඳවත් ඒවායේ මැනීම් කටයුතු පිළිබඳවත් ඉඩම් කොමසාරිස් සම්පත් රෝහණ ධර්මදාස මහතාගෙන් විමසීමක් කළෙමු.

“බුලංකුලම වැව් රක්ෂිතයේ දැනටත් අනවසර ඉදිකිරීම් තියෙනවා. හැබැයි ඒක හරියටම කියන්න පුළුවන් වෙන්නේ නියමාකාරයෙන් රක්ෂිතේ මිනුම් කටයුතු කලාට පස්සේ. රක්ෂිතයේ ඉඩම් මැනීම පහුගිය සතියේ පටන් ගත්තා. සම්පූර්ණ භූමියම මැනලා රක්ෂිතය ඇතුළේ තියෙන අනවසර ඉදිකිරීම් සියල්ල ඉවත් කරනවා. රක්ෂිතයෙන් පිට තියෙන ඉඩම්වලට ‍රජයේ ඉඩම් නීතිරීති යටතේ බලපත්‍ර ලබාදීමට කටයුතු කරනවා” යැයි ද පළාත් ඉඩම් කොමසාරිස්වරයා මෙහිදි පැවසීය.

ලංකාදීප

Facebook
Twitter
LinkedIn