මූල්‍ය වංචා චෝදනා එල්ල වී සිටින ජාලියගේ වරෙන්තුව ආපසු කැඳවන්නැයි ඉල්ලයි… CIDයත් එකඟ වේ…

මූල්‍ය වංචා චෝදනා එල්ල වී සිටින ජාලියගේ වරෙන්තුව ආපසු කැඳවන්නැයි ඉල්ලයි… CIDයත් එකඟ වේ…

පසුගිය රාජපක්ෂ පාලන සමයේදී ඇමරිකාවේ ශ්‍රී ලංකා තානාපතිවරයා ලෙස කටයුතු කළ ජාලිය වික්‍රමසූරිය මහතාට එරෙහිව නිකුත් කර ඇති වරෙන්තුව ආපසු කැඳවන ලෙස ඔහුගේ නීතීඥයින් විසින් ඊයේ (16) කොටුව මහේස්ත්‍රාත් අධිකරණයෙන් ඉල්ලා සිටින ලදී.

ඇමරිකාවේ ශ්‍රී ලංකා තානාපතිවරයා ලෙස කටයුතු කරන සමයේ ගොඩනැගිල්ලක් මිලදී ගැනීමේදී ශ්‍රී ලංකා රජයට අයත් ඇමරිකානු ඩොලර් 132,000ක් සාපරාධී ලෙස සාවද්‍ය පරිහරණය කිරීම සම්බන්ධයෙන් ජාලිය සේනාරත්න මහතාව අපරාධ පරීක්ෂණ දෙපාර්තමේන්තුව විසින් අත් අඩංගුවට ගෙන රක්ෂිත බන්ධනාගාරගත කරන ලද්දේ 2016 වසරේදී ය.

ඇප මත නිදහස් වූ ඔහු වෛද්‍ය ප්‍රතිකාර ලබාගැනීම සඳහා මසකට ඇමරිකාව බලායෑමට අධිකරණයෙන් අවසර ලබාගෙන 2017 වසරේදී විදෙස්ගත වූ අතර මෙතෙක් නැවත ශ්‍රී ලංකාවට පැමිණියේ නැත.

කෙසේවෙතත් මෙම වරෙන්තුව ආපසු කැඳවන ලෙස ඔහුගේ නීතීඥවරුන් ඊයේ අධිකරණයෙන් ඉල්ලා සිටි අවස්ථාවේදී වාර්තාවක් ඉදිරිපත් කරමින් අපරාධ පරීක්ෂණ දෙපාර්තමේන්තුව ද අධිකරණයට ප්‍රකාශ කර තිබුණේ එම ඉල්ලීමට තමන් විරුද්ධ නොවන බවයි.

ඊයේ දිනයේ මෙම නඩුව කැඳවා තිබුණේ කොටුව අතිරේක මහේස්ත්‍රාත් ශලනි පෙරේරා මහත්මිය හමුවේ වන අතර ඒ මහත්මිය නියම කර තිබුණේ මෙම ඉල්ලීම කොටුව ස්ථිර මහේස්ත්‍රාත්වරයා හමුවට ඉදිරිපත් කරන ලෙසත් නඩුව නැවත සැප්තැම්බර් 22 වනදා කැඳවන ලෙසත් ය.

ජාලිය වික්‍රමසූරිය මහතා ජනාධිපති ගෝඨාභය රාජපක්ෂ මහතාගේ සහ අග්‍රාමාත්‍ය මහින්ද රාජපක්ෂ මහතාගේ සමීප ඥාතියෙකු වෙයි.

මෙම අයථා මුදල් ගනුදෙනු සම්බන්ධයෙන් ජාලිය වික්‍රමසූරිය මහතාට එරෙහිව ඇමරිකානු රජය විසින් ද එරටදී අධි චෝදනා ගොනු කර තිබීමත් විශේෂත්වයකි. ශ්‍රී ලංකාවේ රාජ්‍ය තාන්ත්‍රික නිලධාරියකුට විදෙස් රටකදී මේ ආකාරයෙන් අධි චෝදනා ගොනු කෙරෙණේ ද ප්‍රථම වරට ය.

LNW

Facebook
Twitter
LinkedIn