ජනතා විමුක්ති පෙරමුණේ ප්රධාන ලේකම් ටිල්වින් සිල්වා සහ ශ්රී ලංකාවේ ඉන්දියානු නියෝජ්ය මහ කොමසාරිස් ආචාර්ය සත්යන්ජල් පාණ්ඩේ අතර හමුවක් ඊයේ (02) ජනතා විමුක්ති පෙරමුණේ ප්රධාන කාර්යාලයේදී පැවැත් විණි.
එහිදී විශේෂයෙන්ම මෙම හමුව සත්යන්ජල් පාණ්ඩේ ශ්රී ලංකාවේ සිය තෙවසරක ධුර කාලය අවසන් කර මෙරටින් පිටව යාමට පෙර සිදුවූ අවසන් හමුවීම ලෙස සටහන් විය.
එහිදී ශ්රී ලංකාවත් ඉන්දියාවත් අතර සබඳතාවය ශක්තිමත් කිරීම උදෙසා පසුගිය කාලය තුළ ගන්නා ලද ක්රියාමාර්ග සම්බන්ධයෙන් සාකච්ඡා කරන ලද අතර එ සඳහා නියෝජ්ය මහ කොමසාරිස් ලෙස සත්යන්ජල් පාණ්ඩේ මහතා විසින් දක්වන ලද මිත්රශීලී දායකත්වය අගය කිරීමද සිදු කරන ලදී. එසේම දිට්වා සුළි කුණාටුව හමුවේ ශ්රී ලාංකික ජනතාවට සහන සැලසීමේදී ඉන්දියාව දැක්වූ දායකත්වයට සහ එහිදී නියෝජ්ය මහකොමසාරිස් විසින් ලබදුන් දායකත්වය මෙහිදී ජවිපෙ ප්රධාන ලේකම් ටිල්වින් සිල්වා විසින් ඇගයීමට ලක්කරන ලදි.
තමා 2023 වර්ෂයේ අගෝස්තු මාසයේ ශ්රී ලංකාවට පැමිණීමෙන් පසු ජනතා විමුක්ති පෙරමුණ හමුවීමට ඉතා ඉක්මනින් අවස්ථාව සැලසීම පිළිබඳවත් එතැන් පටන් පවත්වාගෙන ගිය ඉතා මිත්රශීලී සබඳතාවය පිළිබඳවත් ශ්රී ලංකාවේ ඉන්දියානු නියෝජ්ය මහ කොමසාරිස් ආචාර්ය සත්යන්ජල් පාණ්ඩේ විසින් මෙම සාකච්ඡාව තුළදී සිහිපත් කරන ලදි.
ශ්රී ලංකාවේ සිය රාජ්යතාන්ත්රික කටයුතු නිම කර යන සත්යන්ජල් පාණ්ඩේට සිය ඉදිරි කටයුතු සාර්ථකව කරගැනීම සඳහා ජනතා විමුක්ති පෙරමුණේ ප්රධාන ලේකම් ටිල්වින් සිල්වා විසින් සිය සුබ පැතුම් එක්කරන ලදී.
