කොරෝනා අස්සේ දුම්රිය වැලි ප‍්‍රවාහන ජාවාරම දිගටම… එස්.පී. විතානගේ

කොරෝනා වසංගත තත්වය හමුවේ සංචරණ සීමා පනවා රජයේ නිවාඩු දින ප‍්‍රකාශයට පත්කොට, සියලුම දුම්රිය ධාවන කටයුතු අත්හිටුවා ඇති තත්වයත් තිබුණද, දුම්රිය යොදාගෙන සිදුකරන වැලි ප‍්‍රවාහන ජාවාරම දිගටම පවත්වාගෙන යාමට ප‍්‍රවාහන අමාත්‍යාංශය හා දුම්රිය බලධාරීන් කටයුතු කරන බව දුම්රිය වෘත්තීය සමිති සන්ධානයේ සම කැඳවුම්කරු එස්.පී විතානගේ පවසයි.

කොරෝනා වසංගතය නිසා තෙල් ප‍්‍රවාහන දුම්රිය හැර අනිකුත් සියළු දුම්රිය ධාවන කටයුතු නතර කර තිබියදී, වැලි ප‍්‍රවාහන දුම්රිය ධාවනය කිරීම පිටුපස දැවැන්ත වංචාවක් සිදුවන බව ඔහු පවසයි. එක් ගමන් වාරයකින් දුම්රිය දෙපාර්තමේන්තුවට රුපියල් 169,830ක පාඩුවක් සිදුවන මෙම ජාවාරමට ප‍්‍රවාහන අමාත්‍ය වරයා එක එල්ලේම සම්බන්ධවී සිටින බවද ඔහු පෙන්වා දෙයි.

මේ සම්බන්ධයෙන් දුම්රිය වෘත්තීය සමිති සන්ධානය නිකුත් කළ නිවේදනයේ වැඩිදුරටත් මෙසේ සඳහන්ය.

“ජනාධිපති වරයාගේ ”සෞභාග්‍යයේ දැක්ම” ප‍්‍රතිපත්ති ප‍්‍රකාශයට අනුව, මගී ප‍්‍රවාහනයට අමතරව භාණ්ඩ ප‍්‍රවාහනය මගින් දුම්රිය දෙපාර්තමේන්තුවට ආදායම් උපයා ගැනීමේ අරමුණ සහිතව, විශේෂ භාණ්ඩ ප‍්‍රවාහන දුම්රියක් ධාවනය කිරීමට ප‍්‍රවාහන අමාත්‍යාංශය හා දුම්රිය දෙපාර්තමේන්තුව 2020 වර්ෂයේ මැද භාගයේදී කටයුතු කළ අතර, මඩකලපුව-ඒරාවූර් සිට කොළඹ අංගනය දක්වා වැලි ප‍්‍රවාහනය කිරීමට කටයුතු කළේය. වැලි ප‍්‍රවාහන කටයුතු සඳහා හේමචන්ද්‍ර අසෝසියේට් (පෞද්ගලික) සමාගම සම්බන්ධ වූ අතර, කන්ටේනර් බහාලුම් 20ක් ඒ සඳහා යොදාගෙන තිබුණි.

විශේෂ භාණ්ඩ ප‍්‍රවාහනය සඳහා වන බඩු දුම්රියක් ධාවනය කිරීමේදී යාම-ඊම් සඳහා එක් කිලෝ මීටරයකට රුපියල් 925ක සම්මත මිළක් දුම්රිය දෙපාර්තමේන්තුව අය කරන අතර, එය රජයේ ආයතනවලින් පවා අය කරන සහන මිළක් ලෙස 2012 වර්ෂයේදී අනුමත මුදලකි. කොළඹ සිට මඩකලපුව දක්වා අදාල සමාගමට අයත් හිස් කන්ටේනර් බහාලුම් 20ක් සමාගමේ අවශ්‍යතාව පරිදි ඒරාවූර් දක්වා ප‍්‍රවාහනය කළ යුතු අතර, වැලි පුරවාගත් එම කන්ටේනර් 20 නැවත කොළඹ අංගනය දක්වා ප‍්‍රවාහනය කළ යුතු විය.

ඒ අනුව යාම්-ඊම් සඳහා කි.මී. 680ක දුරක් මෙම දුම්රිය ධාවනය කරන අතර, එක් ගමන් වාරයක් සඳහා දුම්රිය දෙපාර්තමේන්තුවට අය විය යුතු මුදල (925/= X 680 + වැට් බදු 8%) රුපියල් 679,620කි. දුම්රිය ආඥා පනත මගින් ප‍්‍රවාහන ඇමති වරයාට පැවරී ඇති බලය වැරදි ලෙස අර්ථකතනය කොට, හිස් බහාලුම් ප‍්‍රවාහනය කරන ධාවන කි.මී. ප‍්‍රමානය සඳහා අය කරන ගාස්තුව අදාල සමාගමට ආර්ථික වාසියක් වන පරිදි, ප‍්‍රවාහන ඇමති වරයා මැදිහත් වී 50% කින් අඩු කිරීම නිසා එක් ගමන් වාරයකින් දුම්රිය දෙපාර්තමේන්තුවට සිදු වූ පාඩුව රුපියල් 169,830කි.

දුම්රියෙන් වැලි ප‍්‍රවාහනය ප‍්‍රවර්ධනය කිරීම සඳහා තාවකාලිකව, සහනයක් ලෙස මෙම මිළ අඩුකර ඇති බව ප‍්‍රවාහන අමාත්‍යාංශය කියා සිටියද, 2020 දෙසැම්බර් 14 දිනෙන් පසු තාවකාලිකව නතර කරන ලද වැලි ප‍්‍රවාහන ජාවාරම, 2021.05.23 දින සිට නැවත ආරම්භ කිරීමට ප‍්‍රවාහන අමාත්‍යාංශය හා දුම්රිය දෙපාර්තමේන්තුව කටයුතු කර ඇත.

එක් ගමන් වාරයකින් මඩකලපුව සිට කොළඹ දක්වා වැලි කියුබ් 110ක් ප‍්‍රවාහනය කරන අතර, කිි.මී. 01ක් ප‍්‍රවාහනය කිරීමට අය කරනු ලබන්නේ රුපියල් 925කි. “සෞභාග්‍යයේ දැක්ම” අනුව වැලි ප‍්‍රවාහන ජාවාරම තුළින් දුම්රිය දෙපාර්තමේන්නුවට දැවැන්ත පාඩුවක් සිදුවන අතර, මෙම ජාවාරමට ප‍්‍රවාහන අමාත්‍යවරයා එක එල්ලේම සම්බන්ධවී ඇත. කොරෝනා වසංගතය නිසා තෙල් ප‍්‍රවාහන දුම්රිය හැර අනිකුත් සියළු දුම්රිය ධාවන කටයුතු නතර කර තිබියදී, වැලි ප‍්‍රවාහන දුම්රිය ධාවනය කිරීම පිටුපස දැවැන්ත වංචාවක් සිදුවන බව අවධාරණය කර සිටිමු.”