இலங்கை அதிபர் சேவை தரம் 1 – 2 மற்றும் 3 க்கு சுமார் 4600 வெற்றிடங்கள் காணப்படுவதாக அரசாங்க தகவல் திணைக்களம் தெரிவித்துள்ளது.

போட்டிப்பரீட்சை அல்லது ஒழுங்கமைக்கப்பட்ட நேர்முகத் தேர்வை நடாத்தி முறையாக பதவி நியமனங்களை வழங்குவதற்கு ஒரு வருடத்திற்கும் அதிகமான காலம் எடுக்கும். இச்சந்தர்ப்பத்தில் மாத்திரம் மட்டுப்படுத்தப்பட்ட வகையில் போட்டிப் பரீட்சையை நடாத்துவதற்குப் பதிலாக ஒழுங்கமைக்கப்பட்ட நேர்முகத் தேர்வை நடாத்தி பொருத்தமானவர்களைத் தெரிவு தெரிவு செய்ய வேண்டும் என்று கல்வி அமைச்சர் சமர்ப்பித்த யோசனைக்கு அரசாங்கம்  அங்கீகாரம் வழங்கியுள்ளது.

தொழில் வாய்ப்புகளை வழங்குமாறு வேலையற்ற பட்டதாரிகள் பலர் தொடர் போராட்டம் நடத்தி வந்தமையும் குறிப்பிடத்தக்கது.

கொழும்பு துறைமுகத்தின் மேற்கு முனையத்தை அபிவிருத்தி செய்வதற்கென்றுக் கூறி, இந்தியா அதானி நிறுவனம் மற்றும் ஜப்பான் நிறுவனத்துடன் இணைந்து மேற்படி திட்டத்தை மேற்கொள்வதற்காக அமைச்சரவை அனுமதி வழங்கியுள்ளது.

35 வருட காலத்தில் மேற்கு முனையத்தை அபிவிருத்தி செய்து அதனை திரும்பவும் இலங்கை துறைமுக அதிகார சபையிடம் ஒப்படைக்கும் உடன்பாட்டின் கீழ் இந்த திட்டம் செயற்படுத்தப்படுகிறது என துறைமுகங்கள் மற்றும் கப்பற்துறை அமைச்சர் ரோஹித்த அபேகுணவர்தன அமைச்சரவையில் தாக்கல் செய்த அமைச்சரவை பத்திரத்தில் தெரிவிக்கப்பட்டுள்ளது.

அந்நிறுவனத்தின் உள்ளூர் முகவராக ஜான் கீல்ஸ் நிறுவனம்  பெயரிடப்பட்டுள்ளது.

ஜப்பான் அரசாங்கம் இன்னும் முதலீட்டாளரை நியமிக்கவில்லை.

கொழும்பு துறைமுகத்தின் கிழக்கு முனையத்தை இந்தியாவின் அதானி நிறுவனத்திற்கு வழங்க அரசாங்கம் ஏற்கனவே முடிவு செய்திருந்தது.

துறைமுக தொழிற்சங்கங்கள் மற்றும் பொது மக்கள் மத்தியில் ஏற்பட்ட கடும் எதிர்ப்பு காரணமாக அரசாங்கம் அந்த திட்டத்தை கைவிட்டது.

இந்த நிலையில், கொழும்பு துறைமுகத்தின் மேற்கு முனையத்தை இந்தியா மற்றும் ஜப்பான் நாடுகளுடன் இணைந்து அபிவிருத்தி செய்யும் நடவடிக்கை எடுக்கப்பட்டுள்ளது.

களணிதிஸ்ஸ இணைந்த சுழற்சி மின்நிலையம் செயலிழந்து தற்போது பதினெட்டு மாதங்களுக்கு மேல் கழிந்துள்ளபோதிலும்  இற்றைவரை அதனை இயல்புநிலைக்கு கொண்டுவர இயலாதுள்ளதெனவும் இன்றளவில் அரசாங்கத்திற்கு இருபத்தைந்து பில்லியன் ரூபாவுக்கு அதிகமான நட்டம் நேர்ந்துள்ளதெனவும் இலங்கை மின்சார ஊழியர் சங்கத்தின் செயலாளர் ரஞ்சன்  ஜயலால் குறிப்பிடுகிறார். 

2019 ஓகத்து மாதத்தில் மின்நிலையப் பணிகள்  அத்தியாவசிய பராமரிப்பு நடவடிக்கைகளுக்காக நிறுத்தப்பட்டதெனவும்  அது அவ்வருடத்தின் ஒற்றோபர்   மாதத்தில் மீண்டும் இயக்கப்படத் திட்டமிடப்பட்டிருந்ததெனவும் செயலாளர் கூறினார்.  

பராமரிப்புப் பணிகளின்கீழ் பிற்பாக்கி இயந்திரத்தின்  சுழலி (Rotor) இந்தியாவுக்கு அனுப்பிவைக்கப்படத் திட்டமிடப்பட்டிருந்ததோடு பின்னர் அதனை துபாய்க்கு அனுப்பிவைக்க நடவடிக்கை மேற்கொள்ளப்பட்டதாகவும்  அதன் பின்னர் துபாயில் இருந்து இந்தியாவுக்கு கொண்டுசென்று ஏற்புடைய திருத்தவேலைகளை  மேற்கொண்டு இலங்கைக்கு கொண்டுவந்து அதன் சமநிலை பற்றி   பரீட்சித்துப் பார்க்காமல்  அவசரஅவசரமாக  பொருத்த நடவடிக்கை மேற்கொண்டமையால் அது பெருமளவில் சேதமடைந்துள்ளதெனவும் அவர் குறிப்பிட்டார்.

அதற்கிணங்க சுழலிப் பகுதிக்கும் இரண்டு பெயாரிங் (உராய்தல் தடுப்பு) பகுதிகளுக்கும் சேதமேற்பட்டமையால் இற்றவைரை மின்நிலையத்தை இயக்க இயலாமல் போயுள்ளதெனவும் அவர் குறிப்பிடுகிறார்.  

இந்த பிறப்பாக்கி இயந்திரத்தை இந்நாட்டுக்கு கொண்டுவருவதிலிருந்து  மிகவும் அவசரஅவசரமாகவே செயலாற்றப்பட்டதெனவும்  அதன் காரணமாக மின்சார சபைக்கு மிகப்பெரிய செலவு ஏற்கப்படவேண்டிய நிலையேற்பட்டதெனவும்  திரு. ரஞ்சன் ஜயலால் சுட்டிக்காட்டினார்.

வருடமொன்றுக்கு நாட்டுக்கு 36,000 கிகாவொற் மணித்தியாலத்திற்கு அதிகமான மின்சாரம் அவசியமாகின்றதெனவும்  அதில் 1,084 கிகாவொற் மணித்தியாலங்கள் இந்த மின்நிலையம் மூலமாக உற்பத்தி செய்யப்படுகின்றதெனவும் அவர் குறிப்பிட்டார்.   

இந்த மின்நிலையம் ஊடாக மின்சால அலகொன்று ரூபா 18.00 இற்கும் 20.00 இற்கும் இடையிலான செலவில் உற்பத்திசெய்ய இயலுமெனவும்  மின்நிலையம் செயலிழந்தமையால் நாடு இழந்த மின்சாரத்தின் அளவினை தனியார்துறையினரிடமிருந்து கொள்வனவுசெய்ய நடவடிக்கை எடுப்பதாகவும் பொதுச்செயலாளர் குறிப்பிடுகிறார். 

அதற்காக மின்சார அலகொன்றுக்கு ரூபா 35.00 இற்கு மேலாக செலவிடப்படுகின்றதெனவும் இதனால் ஒவ்வொரு மின்சார அலகிற்காகவும் அரசாங்கம் ரூபா 15.00 மேற்பட்ட  தொகையின செவிலவேண்டி நேரிட்டுள்ளதெனவும் அவர் கூறினார். 

பெற்றோலிய சுத்திகரிப்பு நிலையத்தின் துணை உற்பத்தியாக கிடைக்கின்ற நெப்தாவே களணிதிஸ்ஸ இணைந்த சுழற்சி மின்நிலையத்திற்காக பாவிக்கப்பட்டதெனவும்  அற்காக ஒரு லீற்றர் நெப்தாவுக்காக மின்சார சபை  74 ரூபாவினை வழங்கியதெனவும் இலங்கை மின்சார ஓழியர் சங்கத்தின் செயலாளர் திரு. ரஞ்சன் ஜயலால் தெரிவித்தார். 

எனினும் பெற்றோலியக் கூட்டுத்தாபனம் இன்றளவில் தனியார்துறைக்கு ஒரு லீற்றர் நெப்டாவை ரூபா 30 இற்கே வழங்குகின்றதெனவும்  இதனால் நெப்தா சந்தைப்படுத்திலின்போதும்  அரசாங்கத்திற்கு பாரிய நட்டம் ஏற்படுகின்றதெனவும் அவர் குறிப்பிட்டார். 

உயிர்த்த ஞாயிறு தாக்குதல் தொடர்பில் ஆராய்வதற்காக நியமிக்கப்பட்ட ஜனாதிபதி ஆணைக்குழுவின் அறிக்கை தொடர்பில் திருப்தி கொள்ள முடியாது என தெரிவித்து கருப்பு ஞாயிறு தினமமாக அறிவிக்க கொழும்பு மறைமாவட்ட பேராயர்கள் தீர்மானித்துள்ளனர்.

அதன்படி, எதிர்வரும் 07 ஆம் திகதி ஞாயிற்றுக் கிழமை நாடு பூராகவும் ´கருப்பு ஞாயிறு´ தினமாக அறிவிக்க கொழும்பு மறைமாவட்டத்தின் பேராயர்கள் தீர்மானித்துள்ளனர்.

உயிர்த்த ஞாயிறு தாக்குதலில் உயிரிழநத மற்றும் பாதிக்கப்பட்டவர்களுக்கு நியாயம் கிடைக்காமைக்காமைக்கு எதிர்ப்பு தெரிவிக்கும் வகையில் கருப்பு ஞாயிறு தினம் பிரகடனப்படுத்தப்படுவதாகவும், அன்றைய தினம் கத்தோலிக்க மக்கள் கருப்பு ஆடைகளை அணிந்து பூஜையில் கலந்து கொள்ள வேண்டும் என அறிவிக்கப்பட்டுள்ளது.

வடக்கு கிழக்கு வலிந்து காணாமல் ஆக்கப்பட்டவர்களின் உறவுகள் கிளிநொச்சியில் போராட்டம் ஒன்றை முன்னெடுத்தனர்.

குறித்த போராட்டம் இன்று (திங்கட்கிழமை) காலை 10 மணியளவில் கிளிநொச்சி கந்தசுவாமி ஆலயம் முன்பாக ஆரம்பமாகி, கிளிநொச்சி பழைய கச்சேரி வரை முன்னெடுக்கப்பட்டது.

வடக்கு கிழக்கு மாகாண வலிந்து காணாமல் ஆக்கப்பட்டவர்களின் உறவினர்கள் அமைப்பின் பணிப்பாளர் பத்மநாதன் கருணாவதி தலைமையில் இடம்பெற்ற இந்தப் போராட்டமானது, பல்வேறு சிவில் அமைப்புக்களால் ஏற்பாடு செய்யப்பட்டிருந்தது.

குறித்த போராட்டத்தின்போது, சர்வதேச குற்றவியல் நீதிமன்றில் இலங்கை அராங்கத்தை நிறுத்தக்கோரி கோசங்கள் எழுப்பப்பட்டிருந்ததுடன் சர்வதேச நாடுகள் அந்தப் பொறுப்பை ஏற்கவேண்டும் எனவும் வலியுறுத்தப்பட்டது.