ආර්ථික අර්බුදය ජනතාවගේ සෞඛ්‍ය අයිතිය අභියෝගයට ලක් කරලා – Amnesty International

ආර්ථික අර්බුදය ජනතාවගේ සෞඛ්‍ය අයිතිය අභියෝගයට ලක් කරලා – Amnesty International

ශ්‍රී ලංකාවේ ඇති වී තිබෙන ආර්ථික අර්බුදය ශ්‍රී ලාංකිකයන්ගේ සෞඛ්‍ය පිළිබඳ අයිතිය අභියෝගයට ලක් කර ඇතැයිද අත්‍යාවශ්‍ය සහ ජීවිතාරක්ෂක ඖෂධ මෙන්ම වෛද්‍ය උපකරණ හිඟය ආර් ථික අර් බුදය උග්‍ර වීමත් සමඟ බරපතල ප්‍රශ්නයක් වී ඇතැයිද ඇම්නෙස්ටි ජාත්‍යන්තර සංවිධානය පවසයි.

“අපි සම්පූර්ණ කඩා වැටීමක් අභියස” නමින් ආර්ථික අර්බුදය හේතුවෙන් ශ්‍රී ලාංකිකයන්ගේ අයිතිවාසිකම් කඩ වීම පිළිබඳ නිකුත් කළ නවතම වාර්තාවේ මෙසේ සඳහන් වී තිබේ. එන්නත් මගින් රෝගීන්ට ලබා දෙන පොටෑසියම් ක්ලෝරයිඩ්, ප්‍රතිජීවක ඖෂධ, ඉන්සියුලින් සහ ළමයින් සඳහා අවශ්‍ය ප්‍රමාණවල වෛද්‍ය උපකරණවල හිඟයක් තිබෙන බව ඉකුත් ජූනි මස ළමා ශල්‍ය වෛද්‍යවරයෙක් ඇම්නෙස්ටි සංවිධානයට ප්‍රකාශ කළ බව එම වාර්තාවේ දැක්වේ.

රජයේ රෝහල්වල ඇතැම් ඖෂධ තොග නොමැති වීම හේතුවෙන් රෝගියෙකු ඇතුළත් වනවිට පුද්ගලික ඔසුසලකින් එම ඖෂධ රැගෙන ඒමට පවසන බවත් එසේ රැගෙන ඒමට මුදල් නොමැති රෝගීන් ආපසු හැරී යන බවත් වෛද්‍යවරයෙකු ප්‍රකාශ කළ බව එම වාර්තාවේ සඳහන් වේ.

ඉන්ධන හිඟය හේතුවෙන් ශ්‍රී ලාංකිකයන්ට අවශ්‍ය වේලාවට ගුණාත්මක සෞඛ්‍ය සේවයක් ලබා ගැනීමට බාධා එල්ල වී ඇති බව එම වාර්තාව පෙන්වා දෙයි.

ඉන්ධන හිඟය ප්‍රවාහනයට බාධා පමුණුවා ඇති අතර ප්‍රවාහනය ලබා ගත හැකි අවස්ථාවල ප්‍රවාහන ගාස්තු ඉතා මිලෙන් අධික වීම හේතුවෙන් ශ්‍රී ලාංකිකයන්ට සෞඛ්‍ය සේවා ලබා ගැනීමට බාධා එල්ල වී ඇතැයි එම වාර්තාවේ දැක්වේ. වතුකරයේ දමිළ ජනතාවට මෙම ගැටළුව දැඩිව බලපාන බව ඇම්නෙස්ටි සංවිධානය නිකුත් කළ වාර්තාවේ දැක්වේ.

ආර්ථික අර්බුදය හේතුවෙන් ශ්‍රී ලාංකිකයන්ගේ ප්‍රමාණවත් ආහාර වේලක් ලබා ගැනීමේ අයිතියද අභියෝගයට ලක්ව ඇතැයි එම වාර්තාවේ සඳහන් වේ. ආහාර ද්‍රව්‍යවල මිල ඉහළ යාම, ජීවනෝපායන් අහිමි වීම සහ ලැබෙන අදායම අඩුවීම හේතුවෙන් ප්‍රමාණවත් හා පෝෂ්‍යදායි ආහාර වේලක් මිලදී ගැනීමට ශ්‍රී ලාංකිකයන්ට ඇති හැකියාව අවහිර වී හෝ ආහාර වියදම් වෙනුවෙන් වැඩි මුදලක් වෙන්කිරීමට සිදුව ඇතැයි ඇම්නෙස්ටි සංවිධානය පවසා තිබේ.

Facebook
Twitter
LinkedIn