පාකිස්තාන අගමැතිට අගමැති ධුරය අහිමිවෙයි

පාකිස්තාන අගමැතිට අගමැති ධුරය අහිමිවෙයි

පාකිස්තාන අගමැති ඉම්රාන් ඛාන්ට සිය ධුරය අහිමිවී තිබේ.

ඒ ඔහුට එරෙහිව පැවති විශ්වාසභංග යෝජනාව සම්බන්ධයෙන් පැවති පාර්ලිමේන්තු ඡන්ද විමසීමේදී ඔහු පරාජය වීම හේතුවෙනි.

පාකිස්තාන දේශපාලන ඉතිහාසයේ අගමැතිවරයකුට එරෙහිව ඉදිරිපත් වූ විශ්වාසභංග යෝජනාවක් සම්මත වූ පළමු අවස්ථාව ලෙසද මෙය සැලකේ.

විශ්වාසභංගයෙන් පරාජය වීමත් සමඟ පාකිස්තාන අග්‍රාමාත්‍ය ඉම්රාන් ඛාන් එම ධුරයෙන් නෙරපා දැමුණි.

විපක්ෂ සන්ධානය එක් වී ඉම්රාන්ට එරෙහිව විශ්වාසභංග යෝජනාවක් ගෙනැවිත් තිබුණේ රටේ පවතින ආර්ථික අර්බුදය උග්‍ර කිරීමට ඉම්රාන්ගේ ආර්ථික ප්‍රතිපත්ති හේතු වූ බවත් එම අර්බුදයට ඔහු වගකිවයුතු බවත් චෝදනා නගමිනි.

විවිධ බාධක සහ ප්‍රමාදවීම්වලින් පසු විශ්වාසභංගයට අදාල ඡන්ද විමසුම මධ්‍යම රාත්‍රියෙන් පසු පැවැත්වුණු අතර, එයින් පාර්ලිමේන්තුවේ බහුතරයද අහිමි වී සිටි ඉම්රාන් එයින් පරාජයට පත් විය.

ඉම්රාන් ඛාන් විශ්වාසභංගයෙන් පරාජය වූ බව සහ ඔහුට ධුරය අහිමි වන බව ශ්‍රේෂ්ඨාධිකරණය විසින්ද තහවුරු කරනු ලැබ තිබේ.

තමා ධුරයෙන් නෙරපා දැමීමට විපක්ෂ සන්ධානය කුමන්ත්‍රණය කළේ ඇමෙරිකාව සමග හවුලේ බව ඉම්රාන් තරයේ පවසයි. කෙසේ නමුත් ඒ බව ඔප්පු කිරීමට ඔහු කිසිදු ප්‍රබල සාක්ෂියක් ඉදිරිපත් කර නැත.

පාකිස්තාන අග්‍රාමාත්‍යවරයකුට සිය ධුර කාලය සම්පූර්ණ කිරීමට කිසිදු අවස්ථාවක ඉඩ ලැබී නැත. ඒ අවස්ථා ගණනාවකදී එරට ප්‍රබල හමුදාව බලය අත්පත් කර ගත් බැවිනි.

පාකිස්තාන පාර්ලිමේන්තුව හෙවත් ජාතික සභාව නව අගමැතිවරයෙකු පත් කර ගැනීමට නියමිත බව එරට මාධ්‍ය වාර්තා පෙන්වා දෙයි.

Facebook
Twitter
LinkedIn