அண்டார்ட்டிகா அருகில் உள்ள தெற்கு ஜார்ஜியா கடல் பகுதியில் பறவை ஆய்வாளர் ஒருவர் ஆவணப்படம் எடுத்துள்ளார். அப்போது அங்கு மஞ்சள் நிறத்திலான பென் குயின் ஒன்றைக் கண்டார். மஞ்சள் நிற பென்குயினுடன் வழக்கமான வண்ணமுடைய எம்பரர் பென் குயின் ஒன்றும் உலா வருவதை பார்த்த அவர் இரண்டையும் படம் பிடித்துள்ளார்.

மற்ற உயிரினங்களில் உள்ள அல்பினோ எனப்படும் வெள்ளை நிறமிகள் இருப்பதைப்போல முதல்முறையாக பென்குயினிலும் பார்க்கப்பட்டுள்ளதாக அவர் குறிப்பிட்டுள்ளார்.

இரண்டு நாள் சுற்றுப்பயணத்தை மேற்கொள்ள பாக்கிஸ்தான் பிரதமர் இம்ரான் கான் நாளை (22)  பிற்பகல் 04.30 மணிக்கு இலங்கைக்கு விஜயம் செய்கிறார்.

இவ்வருடத்தில் இலங்கைக்கு வருகை தருகின்ற முதலாவது அரச தலைவர் இவராவார்.

இலங்கை பிரதமர் மகிந்த ராஜபக்சவால் பாக்கிஸ்தான் பிரதமர் இம்ரான் கான் வரவேற்கப்படவுள்ளார்.

அன்றைய தினம் பிரதமர் மகிந்த ராஜபக்சவுடன் அலரிமாளிகையில் விசேட கலந்துரையாடல் இடம்பெற உள்ளது.

தம்முடன் செய்துக்கொண்ட உடன்படிக்கையை பொதுஜன பெரமுன நிறைவேற்ற தவறிவிட்டதாக  ஸ்ரீலங்கா சுதந்திரக்கட்சி விமர்சனம் வெளியிட்டது.

ஏற்கனவே வாக்குறுதியளிக்கப்பட்ட நான்கு அமைச்சரவை அந்தஸ்துள்ள அமைச்சர்கள், மூன்று ராஜாங்க அமைச்சர்கள் மற்றும் இரண்டு மாகாண ஆளுநர் பதவிகளை ஸ்ரீலங்கா பொதுஜன பெரமுன வழங்கவில்லை எனவும் குற்றச்சாட்டு முன்வைக்கப்பட்டது.

நாட்டில் தற்போது மிகப் பெரியளவில் ஊழல், மோசடிகள் நடக்கின்றன. காணிகள் கொள்ளையடிக்கப்படுகின்றன. உறவினர்கள், நண்பர்கள் உயர் பதவிகளுக்கு நியமிக்கப்பட்டுள்ளனர் என்றும் ஸ்ரீலங்கா சுதந்திரக் கட்சியின் சிரேஷ்ட உப தலைவர் பேராசிரியர் ரோஹன லக்ஷ்மன் பியதாச தெரிவித்துள்ளார்.

6 மாதங்களில் சீனாவில் இருந்து ஒரு இலட்சத்து 50 ஆயிரம் சுற்றுலாப் பயணிகளை அழைத்து வருவதற்கான நடவடிக்கைகளை மேற்கொண்டு வருவதாக சீனாவுக்கான இலங்கை தூதுவர் கலாநிதி பாலித கோஹன  தெரிவித்தார். 

இதற்கான ஏற்பாடுகள் தற்போது முன்னெடுக்கப்பட்டு வருவதாகவும் இவற்றுக்கான விமானப் பயணங்களை ஏற்பாடு செய்வது தொடர்பாகவும் நடவடிக்கைகள் எடுக்கப்படுவதாகவும் கலாநிதி பாலித கோஹன சுட்டிக்காட்டினார். 

ஜனாதிபதி ஆணைக் குழுக்கள் நியாயத்துக்கு எதிராகப் பயணிக்கின்றன என்று மனித உரிமைகள் செயற்பாட்டாளரும், இராஜதந்திர அதிகாரியும், சட்டத்தரணியுமான கலாநிதி ராதிகா குமாரசுவாமி குறிப்பிட்டார். தேசிய மக்கள் சக்தியின் முகநூல் பக்கத்துக்கு பின்வரும் தனது கருத்துக்களை தெரிவித்திருந்தார

“அரசியல் பழிவாங்கல்கள் தொடர்பான ஜனாதிபதி ஆணைக்குழு மற்றும் அதன் அறிக்கைகளை பரிசீலிப்பதற்காக அன்மையில் அமைக்கப்பட்ட விசேட ஜனாதிபதி விசாரனை ஆணைக் குழு பற்றி சில கருத்துக்களை கூற விரும்புகின்றேன். இந்த அறிக்கைகளில் ஒன்றுக்கொன்று முரணான மூன்று விடயங்கள் உள்ளன.

முதலாவது : இந்த அரசியல் பழிவாங்கள் தொடர்பான ஆணைக் குழுவினால் தற்போது நீதிமன்றத்தில் விசாரிக்கப்படும் வழக்குகளை நீக்குமாறு பணிப்புரை வழங்கியிருக்கின்றது. ஆணைக் குழுவொன்று இவ்வாறான ஒரு செயலை செய்த உலகின் முதலாவது சந்தர்ப்பம் இதுவாகும். இது உண்மையாகவே கடும் இருளடைந்த கற்பனையின் வெளிப்பாடு. இதன் பெறுபேறாக லசந்த விக்கிரமதுங்க, பிரதீப் எக்னெலிகொட, கரன்னாகொட, ஜாலிய விக்கிரமசூரிய போன்ற சம்பவங்களுடன் தொடர்புபடும் வழக்குகள் அனைத்தும் நீக்கப்பட்டு விடும். எந்தவொரு நீதிமன்ற நடவடிக்கையும் இல்லாமல் குற்றஞ்சாட்டப்பட்ட பிரதிவாதி விடுதலை செய்யப்படுவார்கள். இது மிகவும் அசாதாரண நிலை.

இரண்டாவது : அரசியல் பழிவாங்கல் தொடர்பான ஆணைக்குழுவுக்கு நீதிமன்றத்தில் நிறுத்தப்பட்டுள்ள இந்த நபர்களை விடுதலை செய்வதற்கு மட்டுமல்ல சாட்சிகளை சோடித்ததாக பொலிஸ் விசாரனை அதிகாரிகளுக்கும் அரச அதிகாரிகளுக்கும் தண்டனை வழங்கவும் உள்ளது. இந்த வழக்குகள் சர்வதேசத்தின் கவனத்தை ஈர்த்துள்ள, நாட்டின் பிம்பத்துடன் தொடர்புபடும் முக்கியத்துவம் வாய்ந்த வழக்குகள் ஆகும். இவ்வாறு தண்டனை பெறாமல் இருக்க இயலுமாகுதல் சட்டத்தின் ஆட்சியின் பார்வையில் இருளை நோக்கி பயணிப்பதாகும்.

மூன்றாவது : அரசியல் தலைவர்களின் குடியுரிமையை ஒழிப்பதற்காக விசேட ஜனாதிபதி விசாரனை ஆணைக்குழு அமைக்கப்பட்டுள்ளது. 1977 இல் திருமதி பண்டாரநாயகவுக்கும் இவ்வாறு செய்யப்பட்டது. மஹிந்த ராஜபக்ஷ உறுப்பினராக இருந்த ஶ்ரீலங்கா சுதந்திர கட்சியும் (SLFP) சிவில் சமூகத்துடன் இணைந்து இந்த ஆணைக்குழுவுக்கு எதிராக எழுந்து நின்றன. ஒன்றாகக் குரல்கொடுத்தன. மேற்றிராணியார் லக்‌ஷ்மன் விக்கிரமசிங்க தனது பிரபலமான கடிதத்தின் மூலம் ஜனநாயகத்தை அழிக்க வேண்டாம் என ஜே.ஆரிடம் வேண்டினார். அரசியல் எதிரிகளை நிராகரிப்பதற்காக போலியான சட்ட நிருவாக வழிமுறைகளைப் பயன்படுத்த வேண்டாம் என அவர் கோரியிருந்தார்.

அரசியல் பழிவாங்கல்கள் தொடர்பான ஜனாதிபதி ஆணைக்குழுவும் அதன் கீழ் அமைக்கப்பட்ட விசேட ஜனாதிபதி விசாரனை ஆணைக்குழுவும் உண்மையில் நியாயத்துக்கு எதிராகப் பயணிப்பதாகும். சட்டத்தின் தலைக்கு மேல் அவை ஏறி நிற்கின்றன.

இவ் ஆணைக்குழுக்கள், சட்டத்தின் ஆட்சியை உண்மையாக நம்புகின்ற; மக்களுக்கு நியாயம் கிடைக்க வேண்டும் என கருதுகின்ற ஒவ்வொருவருக்கும் ஒரு பயங்கரமான கனவு (Nightmare) ஆகும்”.

“எமது அரசியல் குடி உரிமை என்ற கடதாசியில் தங்கியிருக்கவில்லை. ஆனால் அநீதமாக, தான்தோன்றித்தனமாக, ஊழலான முறையில் குடியுரிமையை அழிக்க ஜனாதிபதி கோதாபய ராஜபக்ஷ மேற்கொள்ளும் முயற்சியை நிச்சயமாக தோல்வியடையச் செய்வோம்” என மக்கள் விடுதலை முன்னணியின் தலைவர் அநுர குமார திசாநாயக நேற்று (2021.02.18) ஹைட்பார்க் மைதானத்தில் கூறினார்.

விசித்திரமான ஆணைக்குழு அறிக்கைக்கு எதிராக “ஜனநாயத்துக்கான மக்கள் இயக்கம்” ஏற்பாடு செய்திருந்த பேரணியில் அவர் மேற்கண்டவாறு கூறினார்.

“நாட்டின் சூழல் பாதிப்பு, பொருட்களின் விலை அதிகரிப்பு, பொருளாதார வீழ்ச்சி, ஊழல்; மோசடி, தேசிய சொத்துக்களை விற்பனை செய்தல் என ஆயிரம் பிரச்சினைகள் இருக்கின்றன. இந்தப் பிரச்சினைகளைத் தீர்ப்பதை ஒருபக்கம் வைத்துவிட்டு கோட்டாபய ராஜபக்ஷவின் பெரும் முயற்சி தன்னுடையதும் தனது நண்பர்களுடையதும் வழக்குகளை நீக்கிக்கொள்ளுவதாகும். அதற்காக ஓர் ஆணைக்குழுவை அமைத்தார்.
ஆணைக் குழுவின் தலைவர் முன்னாள் உயர் நீதிமன்ற நீதிபதி உபாலி அபேரத்ன. அவருடைய ஊழல்கள் தொடர்பாக புத்தகங்களில் பக்கம் பக்கமாக குறிப்பிடப்பட்டுள்ளன. அவர் நீதிமன்ற ஊழல் குற்றவாளி என அவற்றில் எழுதப்பட்டுள்ளன. பாதிக்கப்பட்ட பிரிவினருக்கு செவிமடுக்காமல் தனது நண்பர்களுக்குத் தேவையான விதமாக வழக்கு(த் தீர்ப்புக்)களை எழுதியவர். மேல்முறையீட்டு நீதிமன்ற நீதிபதிகள் மூவரைக்கொண்ட குழுவொன்று இவர் ஊழல் செய்தவர் என தீர்ப்பு வழங்கியது. நீதிமன்ற சேவைகள் ஆணைக்குழு கட்டாய விடுமுறையில் அனுப்பி ஓய்வுபெறச் செய்தது.
இந்த ஆணைக்குழுவின் இன்னுமொரு உறுப்பினர் முன்னாள் பொலிஸ்மா அதிபர் சந்திரா பிரனாந்து. உயர் நீதிமன்றத்தில் விசாரிக்கப்பட்ட வழக்கொன்றில அடிப்படை உரிமை மீறல் குற்றவாளியாக தீர்ப்பு செய்யப்பட்டு, அந்தக் குற்றத்துக்காக தனது சொந்த பணத்தில் ஓர் இலட்சம் ரூபாவை செலுத்த வேண்டியேற்பட்டது.

இவ்வாறான ஊழல் பேர்வழிகளைக்கொண்ட ஆணைக்குழு ஒன்றுக்கு எங்களை விசாரிப்பதற்கு அல்ல; எங்களை அழைப்பதற்குக் கூட தார்மீக உரிமை கிடையாது” என்றும் அவர் மேலும் கூறினார்.

இப் பேரணியில் வலஸ்முல்லை நைகல விகாராதிபதி வகமுல்லே உதித தேரர், பேராசிரியர் ஹினிதும சுனில் செனவி, சிரேஷ்ட சட்டத்தரணி ஹர்ஷண நானாயக்கார, கலைஞர் ஜகத் மனுவர்ண, சட்டத்தரணி நாமல் ராஜபக்ஷ, சரோஜா சாவித்திரி போல்ராஜ், பேராசிரியர் விஜயகுமார், ஐக்கிய இடதுசாரி முன்னணியின் மஹிந்த ரத்நாயக, முன்னாள் அமைச்சரவை செயலாளர் அசோக பீரிஸ், மவிமு பொதுச் செயலாளர் டில்வின் சில்வா ஆகியோர் உரையாற்றினார்கள்

திருகோணமலை எண்ணெய் குதங்களை மறுபடி இலங்கைக்கு கைமாற்ற தாம் இணங்கவில்லை என இந்திய அரசாங்கம் தெரிவித்துள்ளது.

எண்ணெய் குதங்களை இலங்கைக்கு வழங்குவதற்கு இந்தியா உடன்படுகிறது என்று இந்திய உயர்ஸ்தானிகர் கோபால் பாக்லே கூறியதாக அமைச்சர் உதய கம்மன்பில அண்மையில் தெரிவித்திருந்தார். 

ஆனால், இந்திய அரசாங்கம் எண்ணெய் குதங்களைப் பற்றி தாம் மேலும் கலந்துரையாடுவதாகத்  தெரிவித்துள்ளது. 2015ஆம் ஆண்டு இலங்கை அரசாங்கம் அதனை மீளப்பெறுவதற்கு மேற்கொண்ட முயற்சிகளும் தோல்வியில் முடிந்தன. 

“இந்திய அரசாங்கம் திருகோணமலை எண்ணெய் குதங்களை இலங்கையிடம் வழங்க இணக்கம் தெரிவிக்கவில்லை.” என்று ‘இந்திய நியூஸ் ஏசியா’ இணையத்தளம் செய்தியொன்றையும் வெளியிட்டிருந்தது. 

2003ஆம் ஆண்டு ஆட்சியில் இருந்த ஐக்கிய தேசியக் கட்சி அரசாங்கம் திருகோணமலை எண்ணெய் குதங்களை இந்திய IOC நிறுவனத்திற்குத் தாரைவார்த்தது. அன்றுமுதல் இன்றுவரை அது இந்திய அரசாங்கத்திடம் இருக்கிறது.