உயிர்த்த ஞாயிறு தாக்குதல் என்ற ஈஸ்டர் தாக்குதலை பயன்படுத்தி, இன்றைய அரசாங்கம், எமது அன்றைய அரசாங்கத்தை வீழ்த்தி, ஆட்சியை பிடித்தது. ஆகவே இந்த தாக்குதல், இன்றைய அரசுக்கு அரசியல் ரீதியாக உதவியுள்ளது. ஆகவே உயிர்த்த ஞாயிறு தாக்குதலால் நன்மை பெற்றது, இன்றைய இலங்கை அரசாங்கம்தான். இந்த கோணத்தில், இது பற்றி விசாரிக்கப்பட வேண்டும். அப்போதுதான் பல உறங்கும் உண்மைகள் வெளிவரும் என தமிழ் முற்போக்கு கூட்டணியின் தலைவர் மனோ கணேசன் தெரிவித்துள்ளார்.

எதிர்கட்சி தலைவர் அலுவலகத்தில் நடைபெற்ற ஊடக மாநாட்டில் உரையாற்றிய மனோ எம்பி மேலும் கூறியதாவது,

“எமது பலத்த கோரிக்கைகளின் பின்னர்தான், உயிர்த்த ஞாயிறு விசாரணை குழு அறிக்கை பாராளுமன்றத்தில் எங்களுக்கு கிடைத்துள்ளது. இது தொடர்பில் எங்களுக்கு பல கேள்விகள் இன்று எழுந்துள்ளன. சஹரான் பயங்கரவாத கும்பல் இந்த தாக்குதலை நடத்தி இருப்பதாக கூறுகிறார்கள். இந்த பயங்கரவாத கும்பலுக்கும் சாதாரண முஸ்லிம் மக்களுக்கும் தொடர்பில்லை என்பது உண்மை.

ஆனால், செய்தவர் பயங்கரவாதி சஹாரான் என்றால், செய்வித்தவர் யார் என்ற பிரதான கேள்வி எழுகிறது.

சஹாரானை தடுக்க, கைது செய்ய தவறி விட்டர்கள். பொறுப்பு கூரலில் தவறி விட்டார்கள். இந்த குற்றசாட்டுகளை முன்வைத்து முன்னாள் ஜனாதிபதி மைத்திரிபால சிறிசேன, பொலிஸ் மாஅதிபர் பூஜித ஜயசுந்தர ஆகியோரை சுட்டிக்காட்டி விட்டு மட்டும் தப்ப முடியாது. அதற்கு அப்பால் பல உண்மைகள் உள்ளன. அவை வெளியே வர வேண்டும். அவற்றை விசாரியுங்கள்.”

கொரோனா தொற்றினால் உயிரிழப்போரின் உடல்களை இரணைதீவில் அடக்கம் செய்வதற்கு அரசாங்கத்தினால் மேற்கொள்ளப்பட்ட தீர்மானம் பற்றி இதுவரையில் பல்வேறு கருத்துக்கள் முன்வைக்கப்பட்டுள்ளன. இதுவிடயம் தொடர்பில் இரணைதீவு மக்கள் கடும் எதிர்ப்பினைத் தெரிவித்து வருவதுடன், சடலங்களை அடக்கம் செய்வதற்காகத் தோண்டப்பட்ட குழிகளையும் மூடியுள்ளனர்.

ஜனாஸாக்களை நல்லடக்கம் செய்ய முஸ்லிம் மக்கள் பல தடவைகள் கோரிக்கைகளை முன்வைத்ததுடன், பல போராட்டங்களை மேற்கொண்ட போதிலும் இலங்கை அரசாங்கம் அதற்கு மறுப்புத் தெரிவித்து ஜனாஸாக்களை தகனம் செய்தது.

சடலங்களை அடக்கம் செய்ய உலக சுகாதார ஸ்தாபனம் அனுமதி வழங்கி, பல நாடுகளில் அது நடைமுறைப்படுத்தப்பட்ட போதிலும், இலங்கை அரசாங்கம் அதற்கு தொடர்ந்து எதிர்ப்புத் தெரிவித்து வந்தது.

கடந்த தினத்தில் பாராளுமன்றத்தில் பிரதமர் மகிந்த ராஜபக்ச ஜனாஸாக்களை அடக்கம் செய்ய அனுமதி வழங்கிய போதிலும், அது நடைமுறைப்படுத்தப்படாமல் இருந்தது. அதன் பின் இம்ரான் கான் இலங்கை வந்திருந்த சமயம் ஜனாஸாக்களை அடக்கம் செய்வதற்கான வர்த்தமானி வெளியிடப்பட்டது.

இதில் “இலங்கையில் எங்கு ஒரு முஸ்லிம் கொரோனா தொற்றினால் உயிரிழந்தாலும் இரணைதீவில்தான் அடக்கம் செய்யவேண்டும்.” என்ற உட்கருத்து இருந்தது. இதற்கு இரணைதீவு மக்கள் தொடர்ந்து எதிர்ப்பு தெரிவித்து வருகின்ற நிலையிலும், அரசாங்கம் இதனை இடை நிறுத்தாது முன்னெடுத்து வருகிறது.

இது குறித்து தமிழ்பேசும் அரசியல்வாதிகள் பல்வேறு கருத்துக்களை முன்வைத்து வருகின்றனர்.

“இரணைதீவில் சடலங்கள் புதைப்பதை நான் கடுமையாக எதிர்க்கிறேன். இதுகுறித்து ஜனாதிபதி மற்றும் பிரதமர் ஆகியோருடன் பேச்சுவார்த்தையை மேற்கொள்ளப்போகிறேன்.” – டக்ளஸ் தேவானந்தா (ஈ.ம.ஜ. மு – பா.உ) 

“இது தமிழ் – முஸ்லிம் உறவுகளிடையே விரிசலை ஏற்படுத்தும் நடவடிக்கை ஆகும்.” – ம.ஆ.சுமந்திரன் (த.தே.கூ – பா.உ)

“ஜனாஸாக்களை அடக்கம் செய்வதற்கு பொருத்தமான 06 இடங்கள் வைத்திய நிபுணர்களால் பரிந்துரைக்கப்பட்ட போதிலும், அவற்றை கவனத்தில் கொள்ளாது இரணைதீவில் அடக்கம் செய்ய தீர்மானித்துள்ளதன் மூலம் அரசாங்கம் அரசாங்கம் திட்டமிட்டு இனங்களுக்கிடையில் பிரச்சினைகளை தோற்றுவிக்க முயற்சிக்கிறது. – கபீர் ஹாசிம் (ஐ.ம.ச – பா.உ)

“இரணைதீவு ஜனாஸா அடக்க விவகாரம் முஸ்லீம் நாடுகளின் ஆதரவை சாதகமாகும் முயற்சியே. இது சிறுபான்மை இனங்களுக்கிடையே முரண்பாட்டை தோற்றுவிக்கும் செயற்பாடாகும்.” – ஸ்ரீதரன் (த.தே.கூ – பா.உ)

யாழ் மாவட்ட செயலக நுழைவாயிலை மறித்து இன்று (வியாழக்கிழமை) காலை போராட்டம் ஒன்று முன்னெடுக்கப்பட்டிருந்தது.

வடமாகாண காணிகளில ஆவணங்களை காணி சீர்திருத்த ஆணைக்குழுவின் அனுராதபுர அலுவலகத்துக்கு மாற்றுவதற்கு எதிர்ப்பு தெரிவித்தும், அதனை உடனடியாக நிறுத்துமாறு வலியுறுத்தியுமே இந்த போராட்டம் முன்னெடுக்கப்பட்டிருந்தது.

தமிழ் தேசிய மக்கள் முன்னணியின் ஏற்பாட்டில் முன்னெடுக்கப்பட்டுள்ள இப்போராட்டத்தில் அக்கட்சியின் நாடாளுமன்ற உறுப்பினர்கள், உள்ளூராட்சி மன்ற உறுப்பினர்கள் பிரதிநிதிகள் என பலரும் கலந்து கொண்டுள்ளனர்.

விக்கினேஸ்வரன் முதலமைச்சராகவிருந்து மாகாண சபையை ஆட்சி செய்தபோது பாலர் வகுப்பினை கூட ஒழுங்காக நடத்தவில்லை என தமிழ்த் தேசியக் கூட்டமைப்பின் மட்டக்களப்பு மாவட்ட நாடாளுமன்ற உறுப்பினர் இரா.சாணக்கியன் குற்றச்சாட்டை முன்வைத்துள்ளார்.

இன்றையதினம் (04.03.2021) தமிழ்ப் பத்திரிகை ஒன்றிற்கு வழங்கியிருந்த நேர்காணலிலேயே அவர் இவ்வாறு குறிப்பிட்டுள்ளார்.

அவர் மேலும் கருத்து தெரிவிக்கையில்,

“நாங்கள் எதை நோக்கி பயணிக்கிறோம் என்பது சில அரசியல்வாதிகளுக்குத் தெரியாது. தமது வாக்கு வங்கிகளை தனிப்பட்ட முறையில் அதிகரிப்பதற்காக தனிநாடு கோருகின்ற சிந்தனைகளை தமிழ் மக்கள் மத்தியில் ஊட்டிகொண்டு இருக்கின்றனர். இதனை கூறுகின்றவர்களுக்குத் தெரியும் இன்றைய நிலையில் தனிநாடு ஒரு சாத்தியமற்ற விடயம் என்பது.

இலங்கை மத்திய வங்கி ஏனைய வணிக வங்கிகளைப்போல் இலாபத்தின் பின்னால் செல்வதை தடுத்து சாதாரண மக்களுக்கும் நாட்டுக்காகவும் புதிய பொருளாதார திட்டங்களை தயாரிக்கவேண்டுமென கோப் குழு வலியுறுத்துகின்றது.

கடந்த வாரத்தில் கூடிய கோப் குழு இலங்கை மத்திய வங்கி தொடர்பாக மேற்கொண்ட மீளாய்வின்போதே இந்த எச்சரிக்கையை விடுத்துள்ளது.

2021 பெப்புருவரி 19 ஆந் திகதியளவில் விசேட வைப்புக் கணக்கொன்று மூலமாக 323 மில்லியன் டொலர் சேமிப்பு மீதியொன்றை பேணிவருதல் சம்பந்தமாக புலனாய்வு செய்து மத்திய வங்கிக்கு இந்த எச்சரிக்கை விடுக்கப்பட்டுள்ளது.

அதேவேளையில் சனாதிபதி கடந்த வருடத்தின் ஆரம்ப காலகட்டத்தில் மத்திய வங்கி உத்தியோகத்தர்களுக்கு அச்சுறுத்தல் விடுத்து மத்திய வங்கியால் பொருளாதாரத்தை கட்டியெழுப்புவதற்கான டூலை (பொறியினை) முன்வைப்பதில்லையென பகிரங்கமாகவே குற்றச்சாட்டினை முன்வைத்தார். அதன் பின்னர் மத்திய வங்கி பெருமளவில் பணத்தை அச்சடித்து சந்தைக்கு விநியோகிக்கின்ற செயற்பாங்கில் பிரவேசித்தது.

வடக்கு மற்றும் கிழக்கில் இடம்பெறும் காணி அபகரிப்புக்கு எதிர்ப்பு தெரிவித்து மட்டக்களப்பு – ஏறாவூர் புன்னக்குடா பிரதேசத்தில் பொதுமக்கள் கவனயீர்ப்பு ஆர்ப்பாட்டம் ஒன்றை முன்னெடுத்துள்ளனர்.

மட்டக்களப்பு மாவட்டத்தின் பல பகுதிகளில் பொதுமக்களின் காணிகள் சட்டவிரோதமான முறையில் அபகரிக்கப்படுவதாகவும், குறித்த செயற்பாட்டிற்கு அரச அதிகாரிகள் துணை நிற்பதாகவும் குறித்த ஆர்ப்பாட்டத்தின்போது குற்றச்சாட்டு முன்வைக்கப்பட்டுள்ளது.

அத்துடன், குறிப்பிட்ட குழுவொன்று அரச அதிகாரிகளுக்கு இலஞ்சம் வழங்கி நீண்ட காலமாக இந்த நடவடிக்கையமுன்னெடுத்து வருவதாக ஆர்ப்பாட்டக்காரர்கள் தெரிவித்தனர்.