ஐக்கிய மக்கள் சக்தியின் பாராளுமன்ற உறுப்பினர் அசோக் அபேசிங்க இன்று (11) காலை கொழும்பு குற்றப் புலனாய்வுப் பிரிவில் ஆஜரான நிலையில் அவரிடமிருந்து வாக்குமூலம் பதிவுசெய்யப்பட்டுள்ளது. 

உயிர்த்த ஞாயிறு தாக்குதலுடன் ஜனாதிபதி கோத்தபாய ராஜபக்ஷ மற்றும் ஸ்ரீலங்கா பொதுஜன பெரமுனவின் தேசிய அமைப்பாளர் பஷில் ராஜபக்ஷ ஆகியோர் தொடர்புபட்டுள்ளதாக அவர் அண்மையில் தெரிவித்த கருத்து தொடர்பில் சில பொதுஜன பெரமுன உறுப்பினர்கள் அளித்த முறைப்பாட்டுக்கு இணங்கவே சி.ஐ.டி.யினர் இந்த விசாரணைகளை மேற்கொண்டனர்.

இலங்கைக்கு அந்நிய செலவாணிய  ஈட்டித்தந்து பொருளாதாரத்திற்கு தூணாக இருக்கும் மத்தியக் கிழக்கு நாடுகளில் பணிபுரியும் இலங்கையர்களை எதிர்வரும் தமிழ் – சிங்கள புத்தாண்டிற்கு முன்பதாக இலங்கைக்கு அழைத்துவருமாறு மக்கள் விடுதலை முன்னணியின் அரசியல் குழு உறுப்பினர் மகிந்த சமரசிங்க அரசாங்கத்திடம் கோரிக்கை முன்வைத்துள்ளார்.

அவர்களை நாட்டுக்கு அழைத்து வருவதற்காக தேசிய விமான சேவையை பயன்படுத்த முடியும் எனவும் சுட்டிக்காட்டினார்.

இதேவேளை, வெளிநாட்டு தூதுவர் காரியாலயங்களில் சேவையாற்றிய தேசிய நலன்புரி அதிகாரிகளை நாட்டுக்கு அழைத்ததன் காரணமாக வெளிநாடுகளில் பணிபுரியும் இலங்கையர்கள் பல்வேறுப்பட்ட இன்னல்களுக்கு முகங்கொடுத்துள்ளதாக அனுமதிபத்திரம் உடைய வெளிநாட்டு வேலைவாய்ப்பு முகவர் நிறுவன சங்கம் தெரிவித்துள்ளது.

வெளிநாடுகளுக்கு சென்றுள்ள இலங்கையர்களை மீள நாட்டுக்கு அழைக்கும் செயற்பாட்டிற்கு தொழில் அமைச்சர் இடையூறு ஏற்படுத்தி வருவதாக அந்த சங்கத்தின் செயலாளர் எம்.எஸ்.எம் ஹர்சாட் தெரிவித்துள்ளார்.

கோவில்களில் நடைபெறவுள்ள சிவராத்திரி வழிபாடுகளில் ஆகக் கூடியதாக 50 பேரை மட்டும் அனுமதிக்குமாறு வட மாகாண சுகாதார சேவைகள் பணிப்பாளர் வைத்திய கலாநிதி ஆ. கேதீஸ்வரன் தெரிவித்துள்ளார்.

அறிக்கை ஒன்றினை வெளியிட்டுள்ள இந்த விடயத்தினை அவர் குறிப்பிட்டுள்ளார்.

இதுகுறித்து வெளியிடப்பட்டுள்ள அறிக்கையில், “வருடாந்த சிவராத்திரி வழிபாடுகள் இன்று (11) நடைபெறவுள்ளது. ஆனால் கடந்த வாரத்திலிருந்து யாழ் மாவட்டத்தில் கொரோனா பரவல் தீவிரமடைந்து வருகின்றது. அதனால் பக்தர்கள் மற்றும் பொது மக்களை அவதானமாக நடந்து கொள்ளுமாறு கேட்டுக் கொள்கின்றோம்.

கோவில்களில் நடைபெறவுள்ள சிவராத்திரி வழிபாடுகளில் ஆகக் கூடியதாக 50 பேரை மட்டும் அனுமதிக்குமாறும் ஏனையோர் தத்தம் வீடுகளில் தங்கி நின்று எங்கும் நிறைந்துள்ள இறைவனை மனதிலிருத்தி வழிபாடுமாறும் கேட்டுக்கொள்கின்றோம்.

மேலும் சிவராத்திரி நாளுடன் இணைந்து கோவில்களில் ஏற்பாடு செய்யப்பட்டுள்ள கலாசார நிகழ்வுகளை இரத்து செய்து தனியே சமயாசார கிரியை நிகழ்வுகளை மட்டும் நடாத்துமாறும் கேட்டுக்கொள்கின்றோம்.

அத்துடன் மேற்கூறிய கட்டுப்பாட்டுகளுடன் நடைபெறவுள்ள இவ்வருட சிவராத்திரி வழிபாடுகளில் கொரோனா தொற்றுத் தடுப்புக்கான சுகாதார பாதுகாப்பு நடைமுறைகளை இறுக்கமாக கடைப்பிடிக்குமாறும் அவற்றைக் கண்காணிக்குமாறும் கேட்டுக் கொள்கின்றோம்.

எமது இவ்வேண்டுகோளுக்கு இந்து மதகுருமார்கள், இந்து மதத் தலைவர்கள், கோவில் அறங்காவலர் சபையினர், பக்தர்கள் மற்றும் பொது மக்கள் பூரண ஒத்துழைப்பு வழங்குமாறு கேட்டுக்கொள்கின்றோம்.“ எனத் தெரிவிக்கப்பட்டுள்ளது.

எதிர்வரும் 2025 ஜனாதிபதித் தேர்தலில் மொட்டுக்கட்சித் தரப்பில் இருந்து சிறுபான்மை மக்களின் வாக்குகளையும் குறிவைத்து களமிறங்கப்போகும் ஜனாதிபதி வேட்பாளர் யார் என்பதை மக்கள் விடுதலை முன்னணியின் தலைவர் அநுர குமார திஸாநாயக்க அம்பலப்படுத்தியுள்ளார். 

நேற்று (10) கொழும்பு நகர மண்டபத்தில் “சிஸ்டம் பெயில்” என்ற பகிரங்க கருத்தரங்கு நிகழ்வின்போதே இவர் இவ்வாறு தெரிவித்தார்.

இதுகுறித்து அவர் மேலும் கருத்துத் தெரிவிக்கையில்,

சிங்கள பௌத்த வாக்குகளின் மூலம் அடுத்த ஜனாதிபதி தேர்தலில் வெற்றியீட்ட முடியாது என்ற காரணத்தினால் சிறுபான்மை மக்களின் வாக்குகளைப் பெற்றுக்கொள்ளக்கூடிய வேட்பாளரை களமிறக்குவது குறித்து ஆளும் கட்சியில் இரகசிய பேச்சுவார்த்தை நடாத்தப்படுகின்றது.

ஆளும் கட்சியில் பசில் ராஜபக்ச மற்றும் பீ.பி.ஜயசுந்தர ஆகியோரை விரட்ட வேண்டுமென ஒரு தரப்பு கூறி வருகின்றது.

தாம் தோல்வியடையவில்லை என்று ஜனாதிபதி கோட்டாபய ராஜபக்ச கூறுகின்றார். அண்மையில் விமல் வீரவன்ச உள்ளிட்டவர்கள் ஜனாதிபதி கோட்டாபயவை சந்திக்கச் சென்றுள்ளனர்.

மஹிந்தவை மொட்டு கட்சியின் தலைவராக்கி, மொட்டு கூட்டணிக்கு நீங்கள் தலைமை தாங்க வேண்டுமென விமல் தரப்பு ஜனாதிபதியிடம் கோரியுள்ளது.

எனக்கு அரசியல் செய்ய முடியாது நீங்கள் அரசியல் செய்து கொள்ளுங்கள், நான் அடுத்த தடவை ஜனாதிபதி தேர்தலில் போட்டியிட மாட்டேன் என கோட்டாபய கூறியுள்ளார்.

அப்பேது அங்கிருந்த நாடாளுமன்ற உறுப்பினர் ஒருவர் அதனை இப்போது சொல்ல வேண்டாம் அப்படி சொன்னால் எங்களால் அரசியல் நடாத்த முடியாது என கூறியுள்ளார்.

சிங்கள பௌத்த வாக்குளினால் நாம் வெற்றியீட்டினோம், எனினும் அடுத்த தடவை தமிழ், முஸ்லிம் சிறுபான்மை வாக்குகளையும் பெற்றுக்கொள்ளும் வேட்பாளர் ஒருவரே வெற்றியீட்டுவார் என கோட்டபாய கருதுகின்றார்,

அவ்வாறான வேட்பாளர் வேறு யாருமல்ல அது பசில் ராஜபக்சவே” என அனுரகுமார திசாநாயக்க தெரிவித்துள்ளார்.

எதிர்வரும் ஏப்ரல் 05 ஆம் திகதி முதல் தோட்டத் தொழிலாளர்களுக்கு 1000 ரூபாய் நாட் சம்பளம் வழங்குவதற்கான வர்த்தமானி இன்று (10) வெளியிடப்பட்டுள்ளது. 

சம்பள நிர்ணய சபையில் மேற்கொள்ளப்;பட்ட தீர்மானத்திற்கு அமைய, குறைந்தபட்ச நாளாந்த சம்பளம் 900 ரூபாவாகவும், வரவு செலவு திட்டக் கொடுப்பனவாக 100 ரூபாவாகவும் சேர்த்து நாளாந்த சம்பளம் 1000 ரூபாவாக அதிகரிக்கப்பட்டுள்ளது.

தொழில் அமைச்சின் செயலாளரின் கையொப்பத்துடன் இந்த வர்த்தமானி அறிவித்தல் வெளியிடப்பட்டுள்ளது.

தனக்கு சொந்தமான கட்டிடத்தை பலவந்தமாக கைப்பற்றி அதில் பொதுஜன பெரமுன அலுவலகமொன்றை அமைச்சர் ஜோன்ஸ்ரன் பர்னாந்து பேணிவருவதாக கொட்டவெஹெர சுகாதார மருத்து உத்தியோகத்தர் குற்றஞ் சாட்டுகிறார்.

அந்த மருத்துவரைக் கைதுசெய்யுமாறு அமைச்சின் ஆலோசனைப்படி ஒருவர் பொலீசில் பொய்யான முறைப்பாடு செய்துள்ளதாகவும் அதனால் பொலீசார் தன்னைக் கைதுசெய்ய தயாராகி வருவதாகவும் கூறி அந்த மருத்துவர் கட்டிடத்தின் கூரைமீது ஏறி எதிர்ப்பினைத் தெரிவித்தார். அவ்வேளையில் கூரையிலிருந்து வழுக்கி விழுந்தமையால் காயமுற்ற சகாதார மருத்துவ உத்தியோகத்தர் முதலில் நிக்கவெரட்டிய வைத்தியசாலைக்கும் பின்னர் மேலதிக சிகிச்சைக்காக குருணாகல் பொது வைத்தியசாலைக்கும் அனுப்பப்பட்டுள்ளார்.

2021  ஆம் ஆண்டின் சனவரி 01 ஆந் திகதி தொடக்கம் நேற்றைய (09) தினம் வரை  கழிந்த 68 நாட்களில் 61 யானைகள் மரணமடைந்துள்ளதோடு  இந்த காலப்பகுதிக்குள் மனிதனுக்கும் யானைகளுக்கும் இடையிலான மோதல்கள் காரணமாக 21 ஆட்களின் மரணமும் இடம்பெற்றுள்ளது.  இந்த காலப்பகுதியில் மிகஅதிகமாக யானைகளின் மரணம் பொலநறுவை வனசீவராசிகள் வலயத்திற்குள்ளேயே இடம்பெற்றுள்ளதோடு இந்த வலயத்தில் 17 யானைகள் இறந்துள்ளன. கடந்த 2020 ஆம் ஆண்டில் 322 யானைகள் மரணமடைந்துள்ளதோடு அவ்வருடத்தில் யானைகளுக்கும் மனிதனுக்கும் இடையிலான மோதல் காரணமாக ஆட்கள் 113 பேர் இறந்துள்ளனர்.  

அதேவேளையில் கலாவாவி மற்றும் பலலு வெவ ஒதுக்கத்தில் “ரேவத்த” எனப்படுகின்ற பிரபல்யமான யானை கெக்கிராவ, அலியாவெட்டுனுவெவ பிரதேசத்தின் சோளச் சேனையொன்றில் இழுக்கப்பட்டிருந்த மின்சார வேலியில் மோதியதால் நேற்று முன்தினம் (08)  இரவு மரணமடைந்திருந்தமையைக் கண்டுபிடித்ததாக வனசீவராசி உத்தியோகத்தர்கள்  கூறினார்கள்.  

இந்த யானையின் பிரேத பரிசோதனை நடவடிக்கைகள் அதே இடத்தில் வைத்து வனசீவராசிகள் கால்நடை வைத்தியரின் தலைமையில் நடாத்தப்பட்டதோடு  அந்த யானை ஏறக்குறைய 50 – 55 வயது கொண்டதாகவும் கலாவாவி மற்றும் பலலுவெவ யானைக்கூட்டத்தின் வயதுமுதிர்ந்த யானை எனவும்    வனசீவராசி உத்தியோகத்தர்கள் குறிப்பிடுகிறார்கள்.

இந்த யானை இதற்கு முன்னர்  எந்தவோர் ஆளையும் தாக்கியமையோ அல்லது காணிகளில் புகுந்து  பயிர்களுக்கு சேதம் விளைவித்தமையோ பதிவாகவில்லை என வனசீவராசி உத்தியோகத்தர்கள் கூறுகிறார்கள். 

சுமார் 50 வருடகாலமாக இந்த யானை கல்கிரியாகம, புப்போகம, கலா பலலுவெவ போன்ற பிரதேசங்களில் சஞ்சரித்துள்ளதாகவும் அவர்கள் கூறுகிறார்கள்.  அநுராதபுரம் பண்டுலுகம வனசீவராசிகள் அலுவலகத்தின் கால்நடை வைத்தியர்  சந்தன ஜயசிங்கவை உள்ளிட்ட குழுவினர் திடீர் மரண பரிசோதனையை நடத்தினார்கள்.

இந்த யானையின் மரணம் சம்பந்தமாக தற்போது சந்தேகத்தின்பேரில் ஒருவர் கைது செய்யப்பட்டுள்ளார்.

கலா பலலுவெவவிற்கு பெருமிதம் தந்த யானையாகவும் அடிக்கடி பலரை பாதுகாத்த விலங்கெனவும் “ரேவத்த” பிரபல்யம் அடைந்திருந்ததோடு கலாவெவவை ஒரு தேசிய சரணாலயமாக  பிரகடனஞ்செய்தபோதிலும்  உரிய பாதுகாப்பு இன்மை காரணமாக காட்டு விலங்குகள் கிராமங்களுக்குள் புகுவதால் மிகவும் மனிதாபிமானமற்றவகையில் இறப்பதாகவும் சுற்றாடலியலாளர்கள் சுட்டிக்காட்டுகின்றனர்.

தமிழ்… தமிழர்… பிரபாகரன் கடவுள் என்று தொடர்ந்து மேடைகளில் கொந்தளித்துக்கொண்டிருந்த தமிழ்நாட்டின் நாம் தமிழர் கட்சித் தலைவர் சீமான்,  தொடர்ந்தும் தனது பிரச்சாரத்துக்கு பயன்படுத்தி வந்த விடுதலைப் புலிகள் இயக்கத்தின் தலைவர் வே.பிரபாகரன் அவர்களின் படத்தை தற்போது நீக்கியுள்ளார். 

மேடை பதாகையில் விடுதலைப் புலிகளின் தலைவர் பிரபாகரனின் படங்களை வைத்திருந்தால் அதை தொலைக்காட்சியில் ஒளிபரப்பமாட்டார்கள் என்பதால் தான் நீக்கியதாக சீமான் தெரிவித்தார்.

மார்ச் 7ம் திகதி சென்னையில் தமிழ்நாடு சட்டமன்றத் தேர்தலுக்கான நாம் தமிழர் கட்சியின் 234 வேட்பாளர்களையும் ஒரே மேடையில் அறிமுகப்படுத்தும் மாபெரும் பொதுக்கூட்டம் நடைபெற்றது. அந்த பொதுக்கூட்டம் மேடையில் வைக்கப்பட்டிருந்த பதாகையில் பிரபாகரன் படம் நீக்கப்பட்டிருந்தது.

அதேபோல், நாம் தமிழர் கட்சியின் சமூக வலைதள பக்கங்களிலும் பிரபாகரன் படங்கள் பயன்படுத்துவது தவிர்க்கப்பட்டது.

அவர் இதுகுறித்து ஊடகங்களுக்கு கருத்து தெரிவிக்கையில்,

என்னுடைய கடவுச்சீட்டு இல்லை, என்னால் எந்த நாட்டிற்கும் போக முடியாது. LTTE-ஐ சீமானை வைத்து தான் மீண்டும் கட்டமைக்கிறார்கள் என புகார் அளித்து என்னை முடித்துவிட்டார்கள்.

பிரபாகரனின் படங்களை யூடியூபில் போட்டால் அது முடக்கப்படுகிறது, வாட்ஸ்-அப், பேஸ்புக்கில் போட்டால் அந்த பக்கத்தை முடக்குகிறார்கள். இத்தனை நெருக்கடிகளை நான் எதிர்கொண்டு ஓடுகிறேன்.” என்றார்.

இதுகுறித்து சமூக வலைத்தளங்களிலும் சீமானின் இச்செயல் குறித்து கேலிப்பேச்சுக்கள் பகிரப்பட்டு வருகின்றன. ”தலைவரிடம் இருந்து இம்முறை தேர்தலுக்கு பணம் வராததால் சீமான் தலைவர் படத்தை நீக்கிவிட்டார்.” போன்ற நையாண்டிப் பதிவுகளும் வெளிவந்தவண்ணம் உள்ளன. 

மக்கள் காங்கிரஸ் தலைவரும் நாடாளுமன்ற உறுப்பினருமான ரிஷாட் பதியுதீன் இன்று (10) குற்றப்புலனாய்வு திணைக்களத்தில் விமல் வீரவன்ச மீது முறைப்பாடொன்றை செய்துள்ளார்.

ஈஸ்டர் தாக்குதல் சூத்திரதாரி சஹரானையும் தன்னையும் தொடர்புபடுத்தி, அமைச்சர் விமல் வீரவன்ச வேண்டுமென்றே பொய்யான குற்றச்சாட்டுக்களை முன்வைத்து வருவதாக ரிஷாட் பதியுதீன் குற்றம் சாட்டியுள்ளார்.

அதன்படி அவரிடம் விசாரணை செய்து, உண்மை நிலையை வெளிப்படுத்துமாறு சி.ஐ.டியினரிடம் வேண்டுகோள் விடுத்துள்ளதாகவும் அவர் தெரிவித்தார்.

அண்மையில் வெளிவந்துள்ள ஜனாதிபதி ஆணைக்குழுவின் அறிக்கையிலும், தனக்கும் இந்த தாக்குதல் சம்பவத்துக்கும் எந்தவிதமான தொடர்பும் இல்லையென தெரிவிக்கப்பட்டுள்ளது என்பதையும் ரிஷாட் பதியுதீன் சுட்டிக்காட்டினார்.

இந்நிலையில் தனது அரசியல் இருப்புக்காக இவ்வாறு அப்பட்டமான பொய்யை கூறும் விமலுக்கு எதிராக சட்டத்தரணி ஊடாக சட்ட நடவடிக்கை எடுப்பதற்கு தயாராகி வருவதாகவும் ரிஷாட் பதியுதீன் கூறினார்