கடந்த 2023 ஆம் ஆண்டு டிசம்பர் 31 ஆம் திகதி வெலிகம, பெலென பகுதியில் அமைந்துள்ள ஹோட்டலொன்றில் இடம்பெற்ற துப்பாக்கிச் சூட்டுச் சம்பவம் தொடர்பாக, முன்னாள் பொலிஸ் மா அதிபர் தேஷபந்து தென்னகோன் உள்ளிட்ட 08 சந்தேகநபர்களுக்கு எதிராக மாத்தறை மேல் நீதிமன்றத்தில் இன்று (07) குற்றப்பத்திரிகை கையளிக்கப்பட்டுள்ளது.

குறித்த வழக்கு இன்று விசாரணைக்கு எடுத்துக்கொள்ளப்பட்ட போதே இக்குற்றப்பத்திரிகை கையளிக்கப்பட்டுள்ளது.

வழக்கு விசாரணைக்கு எடுத்துக்கொள்ளப்பட்ட போது முன்னாள் பொலிஸ் மா அதிபர் தேஷபந்து தென்னகோன் உள்ளிட்ட 08 சந்தேகநபர்களும் மாத்தறை மேல் நீதிமன்றத்தில் ஆஜராகியிருந்தனர்.

குற்றப்பத்திரிகை கையளிக்கப்பட்டதை அடுத்து, தேஷபந்து தென்னகோன் உள்ளிட்ட 08 சந்தேகநபர்களும் தலா 250,000 ரூபா ரொக்கப் பிணை மற்றும் தலா 50 இலட்சம் ரூபா பெறுமதியான 04 சரீரப் பிணைகளில் விடுவிக்க உத்தரவிடப்பட்டுள்ளது.

மேரி லூட்ஸ் விக்கிரமசிங்க எனப்படும் ஷிரந்தி ராஜபக்ஷ நேற்று (06) அதிகாலை நாட்டிற்கு வருகை தந்துள்ள நிலையில், ரணில் விக்கிரமசிங்க திடீரென சிங்கப்பூர் நோக்கி புறப்பட்டுச் சென்றுள்ளமை குறித்து அரசியல் அவதானிகளின் விசேட கவனம் திரும்பியுள்ளது.

ஷிரந்தி ராஜபக்ஷ அவசர மருத்துவ சிகிச்சைக்காக எனத் தெரிவித்து சிங்கப்பூர் சென்றிருந்த போதிலும், அவர் மலேசியாவிலிருந்தே மீண்டும் நாடு திரும்பியுள்ளார். இதேவேளை, ரணில் விக்கிரமசிங்கவும் மருத்துவ சிகிச்சை பெறப்போவதாகத் தெரிவித்தே திடீரென சிங்கப்பூர் சென்றுள்ளார். மத்திய வங்கி பிணைமுறி மோசடியுடன் தொடர்புடைய அர்ஜுன் மகேந்திரன் சிங்கப்பூரின் குடியுரிமையைப் பெற்று அங்கு வசித்து வருகின்றமை குறிப்பிடத்தக்கது.

‘ஐஸ்’ போதைப்பொருள் கடத்தல் தொடர்பாக கைது செய்யப்பட்டுள்ள மஹிந்த கஹந்தகம, ராஜபக்ஷ குடும்பத்தின் நெருங்கிய சகா என்பதுடன், 2017 ஒக்டோபர் மாதம் ரஷ்யாவில் நடைபெற்ற உலக இளைஞர் மற்றும் மாணவர் விழாவில் பங்கேற்ற இலங்கைக் குழுவில் பிரதிநிதித்துவப்படுத்தியிருந்தார் என்பதும் சுட்டிக்காட்டத்தக்கது.

அவர், சுயதொழில் செய்வோரின் தலைவர் எனத் தன்னைக் கூறிக்கொண்டு புறக்கோட்டை வியாபாரிகளிடம் கப்பம் வசூலித்த காலத்தில், நாமல் ராஜபக்ஷவின் ‘நீல பலகாய’ அமைப்புடன் நெருங்கிய தொடர்பைப் பேணி வந்தார். அந்தத் தொடர்புகளின் காரணமாகவே உலக இளைஞர் மற்றும் மாணவர் விழாவில் பங்கேற்கும் வாய்ப்பு மஹிந்த கஹந்தகமவுக்கு வழங்கப்பட்டிருந்தது.

அவர் ஐஸ் போதைப்பொருளுடன் கைது செய்யப்பட்டதைத் தொடர்ந்து சமூக ஊடகங்களில் வெளியிடப்பட்ட காணொளிகள் மூலம், நாட்டில் தலைமறைவாகியுள்ள பாதாள உலகத் தலைவர்களுடன் அவர் மிக நெருங்கிய தொடர்பைப் பேணி வந்துள்ளமை தெரியவந்துள்ளது. அந்தப் பாதாள உலகத் தலைவர்கள் மஹிந்த கஹந்தகமவை ‘டாடா’ (Dada) என்றே அழைத்து வந்துள்ளனர்.

அரசாங்கத்தினால் ஆரம்பிக்கப்பட்டுள்ள சிறு மற்றும் நடுத்தர அளவிலான தொழிலதிபர்களுக்கான குறைந்த வட்டி கடன் திட்டம் தொடர்பில் பலருக்கு தெளிவான அவதானம் இல்லையென தெரியவந்துள்ளது.

இதற்கு தீர்வாக, தொழில் வளர்ச்சி அமைச்சர் சுனில் ஹந்துன்னெத்தி தனது உத்தியோகபூர்வ பேஸ்புக் (Facebook) பக்கத்தில் #AskHandun எனும் விசேட அம்சத்தை அறிமுகப்படுத்தியுள்ளார். இந்த அம்சத்தின் ஊடாக மக்களின் கேள்விகளுக்கு நேரடியாக பதிலளிப்பதற்கு அவர் நடவடிக்கை எடுத்துள்ளார்.

இதேவேளை, சிறு மற்றும் நடுத்தர தொழிலதிபர்களுக்கு சலுகை வட்டி கடன்களை வழங்குவதற்காக எதிர்வரும் வரவு செலவுத் திட்ட முன்மொழிவுகளில் மேலும் 13,000 மில்லியன் ரூபாவை ஒதுக்குவதற்கு திட்டமிடப்பட்டுள்ளது.

தொழில்முனைவோரின் சந்தேகங்களை தெளிவுபடுத்தும் வகையில் #AskHandun ஊடாக உங்கள் கேள்விகளையும் அவரிடம் நேரடியாக முன்வைக்க முடியும்.

உயிரிழந்த உறவுகளை நினைவுகூருவதற்கு அனைவருக்கும் உரிமையுள்ளதாகவும், அதனை அரசு தடுக்கவில்லை எனவும் பாதுகாப்பு பிரதி அமைச்சர் அருண ஜயசேகர தெரிவித்துள்ளார்.

எனினும், தடை செய்யப்பட்ட அமைப்புகளை மீளுருவாக்கும் எந்தவொரு முயற்சிக்கும் ஒருபோதும் இடமளிக்க முடியாது என அவர் வலியுறுத்தியுள்ளார்.

பாராளுமன்றத்தில் நேற்று (06) வாய்மூல விடைக்கான வினாக்கள் நேரத்தில் ஐக்கிய மக்கள் சக்தியின் குருநாகல் மாவட்ட பாராளுமன்ற உறுப்பினர் தயாசிறி ஜயசேகர எழுப்பிய கேள்விக்கு பதிலளிக்கும்போதே அவர் இதனைத் தெரிவித்துள்ளார்.

வடக்கு, கிழக்கில் ஆயுத மோதல்கள் இடம்பெற்ற காலத்தில் செயற்பட்ட ஏழு துணை ஆயுதக் குழுக்கள் தொடர்ந்து கண்காணிக்கப்பட்டு வருவதாகவும், அவற்றிடமிருந்து இராணுவத்தினரால் மொத்தம் 801 ஆயுதங்கள் கைப்பற்றப்பட்டுள்ளதாகவும் அவர் குறிப்பிட்டுள்ளார்.

அவற்றில், ஈ.பி.டி.பி.யிடமிருந்து கைப்பற்றப்பட்ட 30 ஆயுதங்கள், டக்ளஸ் தேவானந்தாவுடன் தொடர்புடைய விசாரணைகளுக்காக குற்றப் புலனாய்வுத் திணைக்களத்திடம் ஒப்படைக்கப்பட்டுள்ளதாகவும் தெரிவித்துள்ளார்.

குறித்த குழுக்களின் தலைவர்களும் பெரும்பாலான உறுப்பினர்களும் தற்போது அரசியல் நீரோட்டத்தில் இணைந்துள்ள போதிலும், தேசிய பாதுகாப்புக்கு ஏதேனும் அச்சுறுத்தல் ஏற்படுகிறதா என்பது தொடர்பில் பாதுகாப்புப் படையினரும் புலனாய்வுப் பிரிவினரும் தொடர்ச்சியாக கண்காணித்து வருவதாகவும் அவர் தெரிவித்துள்ளார்.

மேலும், தடை செய்யப்பட்ட அமைப்புகளை மீளுருவாக்குவதும், அது தொடர்பான செயற்பாடுகளை வெளிப்படுத்துவதும் சட்டப்படி குற்றமாகும் எனவும், வடக்கில் திலீபனின் சிலை அமைக்கப்பட்டமை தொடர்பில் பொலிஸ் விசாரணைகள் முன்னெடுக்கப்பட்டு நீதிமன்றத்தில் அறிக்கை சமர்ப்பிக்கப்பட்டுள்ளதாகவும் பாதுகாப்பு பிரதி அமைச்சர் அருண ஜயசேகர குறிப்பிட்டுள்ளார்.

முன்னாள் அமைச்சர் பசில் ராஜபக்சவுக்குச் சொந்தமானது எனக் கூறப்படும் மாத்தறையில் அமைந்துள்ள ‘பிரவுன்ஸ் ஹில்’ காணியின் பயன்பாட்டை இடைநிறுத்த நடவடிக்கை எடுக்கப்பட்டுள்ளதாக நிதிக் குற்றப் புலனாய்வுப் பிரிவு நீதிமன்றத்துக்கு அறிவித்துள்ளது.

இது தொடர்பில் நிதிக் குற்றப் புலனாய்வுப் பிரிவு மாத்தறை நீதவான் நீதிமன்றத்திடம் இருந்து உத்தரவைப் பெற்றுள்ளதாகவும், குறித்த காணி தொடர்பில் உரிமை கோருவதற்கு 14 நாட்கள் கால அவகாசம் வழங்கப்பட்டுள்ளதாகவும் மேலும் தெரிவிக்கப்பட்டுள்ளது.

2027ஆம் ஆண்டுக்கான ஒதுக்கீட்டுச் சட்டமூலத்தின் முதலாம் வாசிப்பு இன்று (07) பாராளுமன்றத்தில் இடம்பெறவுள்ளது.

நிதி அமைச்சராக ஜனாதிபதி அநுர குமார திசாநாயக்க, எதிர்வரும் நவம்பர் 12ஆம் திகதி வரவு செலவுத் திட்ட உரையை நிகழ்த்தவுள்ளார்.

முன்னாள் ஜனாதிபதி மஹிந்த ராஜபக்சவின் மனைவி ஷிரந்தி ராஜபக்ச, இலஞ்சம் அல்லது ஊழல் குற்றச்சாட்டுகளை விசாரிக்கும் ஆணைக்குழுவின் அதிகாரிகளால் இன்று (7) காலை கைது செய்யப்பட்டுள்ளார்.

கொழும்பு, கிருலப்பனையில் உள்ள முன்னாள் ஜனாதிபதி மஹிந்த ராஜபக்ச தற்போது தங்கியிருக்கும் இல்லத்தில் வைத்து அவர் கைது செய்யப்பட்டுள்ளார்.

ஷிரந்தியிடம் வாக்குமூலம் பதிவு செய்வதற்காக இன்று காலை ஆணைக்குழுவின் அதிகாரிகள் சென்றிருந்த நிலையில், இந்தக் கைது நடவடிக்கை இடம்பெற்றுள்ளது.

அரச வங்கி ஒன்றிலிருந்து 10 மில்லியன் ரூபாவைப் பெற்றுக்கொண்டு, அதனைத் தவறாகப் பயன்படுத்தியதாகக் கூறப்படும் குற்றச்சாட்டுகளின் அடிப்படையிலேயே அவர் கைது செய்யப்பட்டுள்ளார். இந்தச் செயற்பாடு பொதுச் சொத்துச் சட்டம் மற்றும் ஊழல் தொடர்பான சட்ட விதிகளை மீறும் குற்றமாகக் கருதப்படுவதாக இலஞ்ச, ஊழல் ஆணைக்குழு தெரிவித்துள்ளது.

‘கிரிஷ்’ (Krrish) கொடுக்கல் வாங்கல் சம்பவம் தொடர்பில் சந்தேகத்தின் பேரில் விளக்கமறியலில் வைக்கப்பட்டுள்ள முன்னாள் ஜனாதிபதி மஹிந்த ராஜபக்ஷவின் மகனும், ஸ்ரீலங்கா பொதுஜன பெரமுனவின் தேசிய அமைப்பாளரும், பாராளுமன்ற உறுப்பினருமான நாமல் ராஜபக்ஷ மற்றும் அக் கம்பனியின் முன்னாள் பணிப்பாளரான ஜானகி சிறிவர்தன ஆகியோரை எதிர்வரும் 16ஆம் திகதி வரை தொடர்ந்து விளக்கமறியலில் வைக்குமாறு கொழும்பு மேலதிக நீதிவான் அசங்க எஸ். போதரம இன்று (06) உத்தரவிட்டுள்ளார்.

லஞ்ச ஊழல் ஒழிப்பு ஆணைக்குழுவின் அதிகாரிகள் மற்றும் சந்தேகநபர்களின் சட்டத்தரணிகள் முன்வைத்த கருத்துக்களை பரிசீலித்த பின்னரே நீதிவான் இந்த உத்தரவை பிறப்பித்துள்ளார்.

சந்தேகநபர்களின் பிணை கோரிக்கை தொடர்பான உத்தரவும் அன்றைய தினமே அறிவிக்கப்படும் என்றும் அந்த உத்தரவில் மேலும் குறிப்பிடப்பட்டுள்ளது.

வெளிநாட்டிலிருந்து நேற்று (05) இரவு நாட்டிற்கு வருகை தந்த, முன்னாள் ஜனாதிபதி மஹிந்த ராஜபக்ஷவின் மனைவியான ஷிரந்தி ராஜபக்ஷவை எதிர்வரும் அக்டோபர் 13ஆம் திகதி நிதி குற்றப் புலனாய்வுப் பிரிவில் (FCID) ஆஜராகுமாறு பொலிஸார் அறிவித்துள்ளதாக தகவல்கள் தெரிவிக்கின்றன.

நிதி குற்றப் புலனாய்வுப் பிரிவினரால் மேற்கொள்ளப்பட்டு வரும் விசாரணை ஒன்றுக்கு அமைவாகவே அவரை இவ்வாறு ஆஜராகுமாறு அறிவிக்கப்பட்டுள்ளது.

முன்னதாக கடந்த செப்டம்பர் 24ஆம் திகதி குறித்த விசாரணைப் பிரிவில் ஆஜராகுமாறு அறிவிக்கப்பட்டிருந்த போதிலும், அதில் பங்கேற்காது மருத்துவ சிகிச்சை பெறவென கடந்த செப்டம்பர் 16ஆம் திகதி ஷிரந்தி ராஜபக்ஷ சிங்கப்பூர் சென்றிருந்தார்.

எவ்வாறாயினும், தன்னைக் கைது செய்வதைத் தடுக்கும் உத்தரவொன்றைப் பிறப்பிக்குமாறு கோரி ஷிரந்தி ராஜபக்ஷவினால் மாளிகாகந்த நீதவான் நீதிமன்றத்தில் நேற்று (05) எதிர்பார்ப்பு பிணை மனுவொன்றும் தாக்கல் செய்யப்பட்டது குறிப்பிடத்தக்கது.