இலங்கை பெத்தலியற் கூட்டுத்தாபனத்திற்கு (CEYPETCO) சொந்தமான புதிய எரிபொருள் நிரப்பு நிலையங்கள் 75ஐ நாடு முழுவதும் அடையாளம் காணப்பட்ட பிரதேசங்களில் ஸ்தாபிக்க அரசாங்கம் திட்டமிட்டுள்ளது.
இது தொடர்பில் மொரட்டுவ பல்கலைக்கழகத்துடன் இணைந்து விஞ்ஞானபூர்வமான ஆய்வு ஒன்று நடத்தப்பட்டுள்ளதுடன், எரிபொருள் நிரப்பு நிலையங்கள் அமைக்கப்பட வேண்டிய மிகவும் பொருத்தமான 70 இடங்களும் அந்த ஆய்வின் மூலம் அடையாளம் காணப்பட்டுள்ளன.
தனியார் பெத்தலியற் கம்பனிகள் எரிபொருள் விநியோகத்தைக் கட்டுப்படுத்தியதன் காரணமாக நாடு முழுவதும் பல பிரதேசங்களில் நீண்ட வரிசைகள் மற்றும் எரிபொருள் நிரப்பு நிலையங்கள் மூடப்படும் சம்பவங்கள் பதிவாகியதை அடுத்து, இந்த வேலைத்திட்டத்தை துரிதப்படுத்துவது தொடர்பில் இலங்கை பெத்தலியற் கூட்டுத்தாபனத்தின் கவனம் திரும்பியுள்ளது.
இது தொடர்பாக ஊடகங்களுக்குக் கருத்துத் தெரிவித்த துறைமுகங்கள், சிவில் விமான சேவைகள் மற்றும் எரிசக்தி அமைச்சர் அநுர கருணாதிலக, நெருக்கடி நிலைகளின்போது எரிபொருள் நுகர்வோர் எதிர்கொள்ளும் சிக்கல்களைக் குறைப்பதற்காக இந்த நடவடிக்கை எடுக்கப்பட்டுள்ளதாகத் தெரிவித்தார். தற்போதைய நட்டத்தைத் தாங்கிக்கொள்ள முடியாது எனத் தெரிவித்து, தனியார் எரிபொருள் விநியோகஸ்தர்கள் சந்தைக்கு எரிபொருள் விநியோகத்தை ஒரு குறிப்பிட்ட அளவுக்குக் கட்டுப்படுத்த நடவடிக்கை எடுத்திருந்தனர். அதனால் நுகர்வோருக்கு ஏற்படும் தாக்கத்தைக் குறைப்பதற்காக, இலங்கை பெத்தலியற் கூட்டுத்தாபனம் ஊடாக முன்னர் காணப்பட்ட 55% என்ற சந்தை விநியோக அளவை 80% வரை உயர்த்த நடவடிக்கை எடுக்கப்பட்டுள்ளது. நெருக்கடி காலப்பகுதி தணிந்த பின்னர் நியாயமான இலாபத்துடன் வர்த்தக நடவடிக்கைகளைத் தொடர வாய்ப்பு கிடைக்கும் என்பதால், அதுவரை பொறுமையுடன் செயற்படுமாறு தனியார் விநியோகஸ்தர்களிடம் அமைச்சர் அநுர கருணாதிலக கேட்டுக்கொள்கிறார்.
தற்போது நாடு முழுவதும் 1,440 எரிபொருள் நிரப்பு நிலையங்கள் இயங்கி வருவதுடன், அதில் 887 எரிபொருள் நிரப்பு நிலையங்களை, அதாவது 61% அளவிலான செயற்பாடுகளை இலங்கை பெத்தலியற் கூட்டுத்தாபனமே (Ceypetco) மேற்கொண்டு வருகிறது. எஞ்சிய எரிபொருள் நிரப்பு நிலையங்களை தனியார் கம்பனிகள் நிர்வகிப்பதுடன், அவற்றுள் லங்கா ஐ.ஓ.சி (Lanka IOC) கம்பனி 273 நிலையங்களையும்,சினோபெக் எனர்ஜி லங்கா (Sinopec Energy Lanka) கம்பனி 150 நிலையங்களையும், ஆர். எம். பார்க்ஸ் (RM Parks) கம்பனி 130 நிலையங்களையும் நிர்வகிக்கின்றன. நாட்டில் டீசல் விநியோகம் மற்றும் வழங்குவதில் 80% க்கும் அதிகமான பங்கை இலங்கை பெத்தலியற் கூட்டுத்தாபனமே கையாண்டு வருகிறது.
விலை அதிகரிப்புகள் காரணமாக எழுந்துள்ள தற்போதைய நெருக்கடியைத் தவிர்த்துக் கொள்வதற்காக, ஒப்பந்தங்களின் கட்டமைப்பிற்குள் மற்றும் இலங்கை பெத்தலியற் கூட்டுத்தாபனச் சட்டத்தின் கீழ் அமைச்சுக்குரிய அதிகாரங்களின் பிரகாரம் சட்ட ஆலோசனைகளைப் பெற்றுக்கொள்ளவும் அரசாங்கம் தீர்மானித்துள்ளது.
சில பிரதேசங்களில் காணப்படும் தனி எரிபொருள் நிரப்பு நிலைய செயற்பாடுகள் காரணமாக எழும் சிக்கல்களுக்குத் தீர்வாக புதிய எரிபொருள் நிரப்பு நிலைய வலையமைப்பொன்றை ஆரம்பிப்பது எதிர்காலத்தில் முன்னெடுக்கப்படும் எனவும் தற்போது வெளிப்படுத்தப்பட்டுள்ளது.
