வடக்கு மாகாணங்களில் உள்ள டெல்ப், நயினாதீவு மற்றும் அனலைதீவு ஆகிய மூன்று தீவுகளில் மேற்கொள்ளப்படவிருக்கும் மின்சக்தி உற்பத்தி திட்டத்தை தம்மிடம் வழங்குமாறு இந்திய அரசாங்கம் இலங்கை அரசாங்கத்திடம் சட்டரீதியாகக் கேட்டுக்கொண்டுள்ளது. இதற்காக தாம் 12 மில்லியன் டொலர் (228 கோடி ரூபாய்) தருவதாகவும் குறிப்பிட்டுள்ளது.

இத்திட்டமானது அமைச்சரவை தீர்மானத்துடன் கடந்த தினத்தில்  சீன நிறுவனத்திற்கு டெண்டர் விடப்பட்டிருத்தது. இந்தியாவுக்கு அண்மையில் சீனா இவ்வாறு வேலைகளை செய்வது இந்தியாவின் பாதுகாப்புக்கு அச்சுறுத்தல் என்று இந்தியா குறிப்பிட்டிருந்தது. இந்தியாவின் இக்கருத்துக்கு வடக்கு அரசியல் கட்சிகளும் ஆதரவளித்து வருவதும் குறிப்பிடத்தக்கது.

பாக்கிஸ்தான் பிரதமர் இம்ரான் கானின் இலங்கை நாடாளுமன்ற உரை இரத்துச்செய்யப்பட்டுள்ள நிலையில், இலங்கை நாடாளுமன்றத்தில் பாக்கிஸ்தான் பிரதமரை உரையாற்றுவதற்கு அனுமதிப்பது இந்தியாவுடனான உறவுகளில் பாதிப்பை ஏற்படுத்தும் என இலங்கை அரசாங்கத்தின் சிலர் கருதியதாக தகவல்கள் வெளியாகியுள்ளன.

இலங்கை நாடாளுமன்ற உரையில் பாக்கிஸ்தான் பிரதமர் காஸ்மீர் விவகாரத்தை எழுப்பக்கூடும் என இந்தியா கருதலாம் என இலங்கை அரசாங்கத்தின் ஒரு தரப்பினர் கருதியுள்ளனர்.

யாழ்ப்பாண சித்த மருத்துவ பட்டதாரிகளின் ஆர்ப்பாட்டப் பேரணி

யாழ்ப்பாணத்தில் சித்த மருத்துவ பட்டதாரிகளினால் நேற்றைய தினம் (16) ஆர்ப்பாட்டப் பேரணி ஒன்று முன்னெடுக்கப்பட்டுள்ளது.

பட்டப்படிப்பை நிறைவு செய்துள்ள மாணவர்களை பட்டதாரி நியமனங்களுக்குள் உள்வாங்கப்பட வேண்டும் என்ற கோரிக்கையை முன்வைத்து இந்த ஆர்பாட்டம் பேரணி இடம்பெற்றது.

ஆர்ப்பாட்ட பேரணியில் கலந்து கொண்ட சித்த மருத்துவ பட்டதாரி மாணவர்கள், தங்களுடைய கோரிக்கைகளை ஜனாதிபதி நிறைவேற்ற வேண்டும் எனவும் தெரிவித்தனர்.

இந்த ஆர்ப்பார்ட்டப் பேரணி சித்தமருத்துவ பீடத்திலிருந்து சித்த மருத்துவ வைத்தியசாலை வரை இடம்பெற்றிருந்தது

கொரோனாவால் உயிரிழந்துள்ளதாகக் கூறப்படும் சாய்ந்தமருதைச் சேர்ந்த எம்.ஆதம்பாவின் ஜனாஸாவை 18ஆம் திகதி வரை தகனம் செய்யாமல் வைத்திருக்க வேண்டும் என்று கல்முனை மேல் நீதிமன்றம் உத்தரவிட்டுள்ளது.

ஆதம்பாவிற்கு கொரோனா தொற்று ஏற்பட்டுள்ளதாகக் கூறி, வைத்தியசாலை நிர்வாகம் ஜனாஸாவை குடும்பத்தாரிடம் வழங்க மறுப்புத் தெரிவித்திருந்தது. அவ்வாறிருக்க வாய்ப்பில்லை, மரணத்தில் சந்தேகம் இருப்பதாகக் கூறி குடும்பத்தார் கல்முனை நீதவான் நீதிமன்றத்தில் மனு தாக்கல் செய்திருந்தனர். இதனைத் தொடர்ந்தே மேற்கண்டவாறு கல்முனை மேல் நீதிமன்றம் உத்தரவைப் பிறப்பித்துள்ளது.

வீதிவிபத்துக்களால் நாளொன்றுக்கு 10 – 11 பேர் வரை உயிரிழப்பதாக போலீஸ் ஊடகப் பேச்சாளர் பிரதி பொலிஸ்மா அதிபர் அஜித் ரோஹன தெரிவித்தார்.

வீதி விபத்துக்களில் மேலும் நாளொன்றுக்கு 40 பேர் வரை காயமடைகின்றனர். வீதி விபத்துக்களினால் ஏற்படும் இழப்புகளைத் தவிர்த்துக்கொள்ள பொதுமக்கள் முழு ஒத்துழைப்பை வழங்க வேண்டும் என்றும் அவர் குறிப்பிட்டார்.

வெளியுறவுக் கொள்கை குறித்து தெளிவில்லாத ஆட்சியாளர்கள் இலங்கையை சீனாவின் காலனித்துவ நாடாக மாற்றிவிட்டனர் என்று முன்னாள் ஜனாதிபதி சந்திரிக்கா பண்டாரநாயக்க குமாரதுங்க தெரிவித்துள்ளார். 

விஜயகுமாரதுங்கவின் 33 ஆவது நினைவு தினத்தின் பின் இடம்பெற்ற ஊடக சந்திப்பிலேயே அவர் இவ்வாறு தெரிவித்தார்.

அவர் மேலும் கூறுககையில்…

“தற்போது நாட்டிற்கு இளம் தலைமுறை அவசியமாகிறது. கற்ற, ஒழுக்கமுள்ள, அரசியலை வியாபாரமாக மாற்றாத, மக்களையும் நாட்டையும் நேசிக்கும், தமது முயற்சியில் நாட்டை கட்டியெழுப்பும் புதிய அரசியல் தலைமுறைக்கு நாட்டை கொடுக்கவேண்டிய காலகட்டம் வந்துள்ளது. ஆனால் இன்று நாடு மிக மோசமான நிலையில் உள்ளது.” என்றார்.

தோட்ட முதலாளிமார் சம்மேளனத்திற்கும், தொழில் சங்கங்களுக்கும் இடையில் 2019 ஆம் ஆண்டு செய்துகொள்ளப்பட்ட கூட்டு உடன்படிக்கை நிறைவுக்கு வந்த பின்னரே, தோட்ட தொழிலாளர்களின் சம்பள அதிகரிப்பு நடைமுறைப்படுத்தப்படும் என்று அமைச்சரவை இணைப் பேச்சாளரும், அமைச்சருமான உதய கம்மன்பில தெரிவித்தார்.

இன்று அரசாங்க தகவல் திணைக்களத்தில் இடம்பெற்ற அமைச்சரவை தீர்மானங்களை அறிவிக்கும் செய்தியாளர் சந்திப்பில், தோட்ட தொழிலாளர்களுக்கு சம்பள நிர்ணய சபையின் ஊடாக அதிகரிக்கப்பட்ட நாளாந்த 1000 ரூபா சம்பள அதிகரிப்பு எப்போது நடைமுறைக்கு வரும்? என்று ஊடகவியலாளர் கேட்ட கேள்விக்கு அமைச்சர் இவ்வாறு பதிலளித்தார்.

2019 ஆம் ஆண்டு செய்துகொள்ளப்பட்ட இந்த கூட்டு உடன்படிக்கை இம்மாதம் நடுப்பகுதியில் நிறைவடைகின்றது. இதனை தொடர்ந்து தொழில் அமைச்சரினால் சம்பளம் தொடர்பிலான நடவடிக்கை முன்னெடுக்கப்படும் என்று  இணைப் பேச்சாளரும், அமைச்சருமான உதய கம்மன்பில மேலும் கூறினார்.