இலங்கையில் வாழும் அனைத்து மக்களின் நலன்கருதி கோட்டாபய ராஜபக்ஷவின் அரசாங்கம் செயற்படவில்லையென தமிழ்த் தேசியக் கூட்டமைப்பின் மட்டக்களப்பு மாவட்ட பாராளுமன்ற உறுப்பினர் இரா.சாணக்கியன் குற்றம் சாட்டியுள்ளார்.

நேற்றைய தினம் (04) தமிழ்ப் பத்திரிகையொன்றிற்கு வழங்கியிருந்த நேர்காணலிலேயே அவர் இவ்வாறு தெரிவித்துள்ளார்.

அவர் மேலும் கருத்துத் தெரிவிக்கையில்,

“இந்த அரசாங்கம் எந்தவொரு திட்டமும் இல்லாத அரசாங்கம் ஆகும். எந்த மக்களின் நலன்கருதியும் செயற்படவில்லை. அதாவது சிங்கள மக்களுக்கு அத்தகைய சிந்தனை வரக்கூடாது என்பதற்காக தமிழ்-முஸ்லிம் மக்களுக்கு எதிரானதொரு அரசாங்கமாகச் செயற்படுகிறது. இந்த அரசாங்கமானது நாட்டில் வாழும் எந்த மக்களுக்கும் எந்தவொரு நன்மையையும் செய்யாத அரசாங்கம் என்பது தான் உண்மையாகும்.” என்றார்.

இலங்கையில் முதன்முறையாக ‘ட்ரோன்’ மூலம் இறப்பர் தோட்டங்களில் பீடைகொல்லிகள் தெளிக்கும் வேலைத்திட்டம் ஆரம்பிக்கப்பட்டுள்ளது.

எட்டியாந்தோட்டை பனாவத்தை தோட்டத்தில் இறப்பர் ஆராய்ச்சி நிறுவனத்தின் அதிகாரிகளின் மேற்பார்வையில் இவ்வேலைத்திட்டம் இன்று (05) ஆரம்பமாகியது.

இவ்வேலைத்திட்டத்தினூடாக இறப்பர் மரங்களில் ஏற்படும் இலை வாடுதல் நோயினைக் கட்டுப்படுத்துவதற்கான முயற்சிகள் மேற்கொள்ளப்படுவதுடன், இச்செயற்பாடு ஏனைய தோட்டங்களிலும் முன்னெடுக்கப்படும் என்று இறப்பர் ஆராய்ச்சி நிலையம் தெரிவித்துள்ளது.

உலகம் முழுவதும் 16.8 கோடி மாணவர்கள் ஓராண்டாக பாடசாலை செல்லவில்லை என்று ஐ.நா. தெரிவித்துள்ளது.

கொரோனா பரவல் காரணமாக கடந்த மார்ச் மாதம் முதல் பெரும்பாலான உலக நாடுகள் ஊரடங்கை அமல்படுத்தின. அப்போது முதலே பாடசாலைகள் மூடப்பட்டன.

இவ்வாறு பாடசாலை செல்லாத மாணவர்களின் எண்ணிக்கையை ஐ.நா. அமைப்பான யுனிசெப் ஆய்வு செய்தது. இதில் 16.8 கோடிக்கும் அதிகமான மாணவர்கள் கடந்த சுமார் ஓராண்டாக பாடசாலை செல்லவில்லை என கண்டறியப்பட்டுள்ளது.

இதைப்போல உலகம் முழுவதும் சுமார் 21.4 கோடி மாணவர்கள் 3 காலாண்டாக நேரடி வகுப்புகளில் பங்கேற்கவில்லை. மேலும் முழு மற்றும் பாதியளவு கல்வி பாடசலைகள் மூடப்பட்டதினால் 88.8 கோடி குழந்தைகளின் கல்வி பாதிக்கப்பட்டுள்ளதாக தெரியவந்துள்ளது.

இதில் முக்கியமாக 14 நாடுகளில் கடந்த ஆண்டு மார்ச் முதல் கடந்த மாதம் வரை பெரும்பாலும் பாடசாலைகள் மூடியே உள்ளன. இதனால் 9.8 கோடி குழந்தைகள் பாதிக்கப்பட்டு இருப்பதாக யுனிசெப் அறிக்கை தெரிவித்துள்ளது.

கடந்த 2019ஆம் ஆண்டு இடம்பெற்ற ஏப்ரல்-21 உயிர்த்த ஞாயிறு பயங்கரவாதத் தாக்குதல் தொடர்பான அறிக்கை நாடாளுமன்றத்தில் விவாதத்திற்கு எடுத்துக்கொள்ளப்படவுள்ளது.

ஏப்ரல்-21 தாக்குதல் குறித்து விசாரணை செய்வதற்காக நியமிக்கப்பட்ட ஜனாதிபதி ஆணைக்குழுவின் இறுதி அறிக்கையே இவ்வாறு எதிர்வரும் 10ஆம் திகதி நாடாளுமன்றில் விவாதத்திற்கு வரவுள்ளது.

நாடாளுமன்ற தொடர்பாடல் திணைக்களம் இந்த அறிவிப்பை வெளியிட்டுள்ளது.

இதேவேளை, ஈஸ்டர் தாக்குதல் தொடர்பான ஜனாதிபதி விசாரணை ஆணைக்குழுவின் பரிந்துரைகளை ஆய்வுசெய்ய நியமிக்கப்பட்ட அமைச்சரவைத் துணைக்குழுவின் அறிக்கை எதிர்வரும் 15ஆம் திகதி ஜனாதிபதி கோட்டாபய ராஜபக்ஷவிடம் கையளிக்கப்படவுள்ளது.

இந்நிலையில், ஜனாதிபதி ஆணைக்குழுவின் இறுதி அறிக்கையின் பரிந்துரைகளை எவ்வாறு செயற்படுத்துவது என்பது குறித்து அமைச்சரவைத் துணைக்குழு தொடர்ந்தும் ஆராய்ந்து வருகின்றமை குறிப்பிடத்தக்கது.

கொழும்பு நகரின் வாயு மண்டலத்திலுள்ள ஒக்சிஜனின் அளவு, சனத் தொகை அதிகரிப்புக்கு ஏற்ப படிப்படியாக குறைவடைந்து செல்கின்றமை ஆய்வொன்றின் ஊடாக உறுதிப்படுத்தப்பட்டுள்ளதென சுற்றாடல் அமைச்சு தெரிவிக்கின்றது.

இதன்படி, கொழும்பு நகரில் வளிமண்டலம் மாசடைவதை தவிர்ப்பதற்காக சுற்றாடல் அமைச்சு மற்றும் கொழும்பு மாநகர சபை ஆகியன இணைந்து வேலைத்திட்டமொன்றை ஆரம்பித்துள்ளன.சுற்றாடல் அமைச்சர் மஹிந்த அமரவீர, கொழும்பு மாநகர மேயர் ரோஸி சேனாநாயக்க உள்ளிட்டோரின் தலைமையில், சுற்றாடல் அமைச்சில் இந்த வேலைத்திட்டம் தொடர்பிலான கலந்துரையாடல் இடம்பெற்றுள்ளது.

கொழும்பு நகரில் நாளாந்தம் ஒக்சிஜனின் அளவை ஆய்வு செய்யும் வகையிலான நடவடிக்கைகள் முன்னெடுக்கப்படவுள்ளதாக தெரிவிக்கப்படுகின்றது.

உயிர்த்த ஞாயிறு தாக்குதல் என்ற ஈஸ்டர் தாக்குதலை பயன்படுத்தி, இன்றைய அரசாங்கம், எமது அன்றைய அரசாங்கத்தை வீழ்த்தி, ஆட்சியை பிடித்தது. ஆகவே இந்த தாக்குதல், இன்றைய அரசுக்கு அரசியல் ரீதியாக உதவியுள்ளது. ஆகவே உயிர்த்த ஞாயிறு தாக்குதலால் நன்மை பெற்றது, இன்றைய இலங்கை அரசாங்கம்தான். இந்த கோணத்தில், இது பற்றி விசாரிக்கப்பட வேண்டும். அப்போதுதான் பல உறங்கும் உண்மைகள் வெளிவரும் என தமிழ் முற்போக்கு கூட்டணியின் தலைவர் மனோ கணேசன் தெரிவித்துள்ளார்.

எதிர்கட்சி தலைவர் அலுவலகத்தில் நடைபெற்ற ஊடக மாநாட்டில் உரையாற்றிய மனோ எம்பி மேலும் கூறியதாவது,

“எமது பலத்த கோரிக்கைகளின் பின்னர்தான், உயிர்த்த ஞாயிறு விசாரணை குழு அறிக்கை பாராளுமன்றத்தில் எங்களுக்கு கிடைத்துள்ளது. இது தொடர்பில் எங்களுக்கு பல கேள்விகள் இன்று எழுந்துள்ளன. சஹரான் பயங்கரவாத கும்பல் இந்த தாக்குதலை நடத்தி இருப்பதாக கூறுகிறார்கள். இந்த பயங்கரவாத கும்பலுக்கும் சாதாரண முஸ்லிம் மக்களுக்கும் தொடர்பில்லை என்பது உண்மை.

ஆனால், செய்தவர் பயங்கரவாதி சஹாரான் என்றால், செய்வித்தவர் யார் என்ற பிரதான கேள்வி எழுகிறது.

சஹாரானை தடுக்க, கைது செய்ய தவறி விட்டர்கள். பொறுப்பு கூரலில் தவறி விட்டார்கள். இந்த குற்றசாட்டுகளை முன்வைத்து முன்னாள் ஜனாதிபதி மைத்திரிபால சிறிசேன, பொலிஸ் மாஅதிபர் பூஜித ஜயசுந்தர ஆகியோரை சுட்டிக்காட்டி விட்டு மட்டும் தப்ப முடியாது. அதற்கு அப்பால் பல உண்மைகள் உள்ளன. அவை வெளியே வர வேண்டும். அவற்றை விசாரியுங்கள்.”