பெர்லின் சிவப்பாகிறது!

2029 ஆம் ஆண்டு நடைபெறவுள்ள ஜெர்மனியின் பாராளுமன்றத் தேர்தலுக்கு முன்னதாக, 2026 செப்டம்பர் 20 ஆம் திகதி ஞாயிற்றுக்கிழமை நடைபெற்ற ஃபெடரல் சபை இடைத்தேர்தலில், தீவிர வலதுசாரி AfD கட்சி, ஆளும் CDU லிபரல் கட்சி மற்றும் SPD ஆகியவற்றைத் தோற்கடித்து, ஏழைகளின் குரலாகக் கருதப்படும் DIE LINKE கட்சியினால் வேட்பாளராக நிறுத்தப்பட்ட எலிஃப் எர்சல்ஃப் (ELIF ERSALF) 25% வாக்குகளைப் பெற்று வெற்றியீட்டியுள்ளார்.

DIE LINKE கட்சியினால் களமிறக்கப்பட்டு வெற்றிபெற்ற துருக்கியைப் பூர்வீகமாகக் கொண்ட எலிஃப் எர்சல்ஃப் பெற்ற இந்த வெற்றி, ஐரோப்பாவிலுள்ள அனைத்து இடதுசாரி கட்சிகளுக்கும் புதிய நம்பிக்கையை அளித்துள்ளதாக செய்திகள் தெரிவிக்கின்றன.

பாரம்பரியக் கட்சிகளை மேவி, தீவிர வலதுசாரிக் கட்சிகளை நிராகரித்து மக்கள் மாற்று வழிகளை நோக்கி நகர்வதை இந்த வெற்றி மேலும் உறுதிப்படுத்துவதாக அரசியல் ஆய்வாளர்கள் சுட்டிக்காட்டுகின்றனர். ஸ்வீடனில் இடதுசாரி முன்னணி பெற்ற வெற்றியையும் அவர்கள் இதற்காக மேற்கோள் காட்டுகின்றனர். அதற்கமைய, ஜெர்மனியிலும் ஐரோப்பாவிலும் தீவிர வலதுசாரிகளின் எழுச்சிக்கு மாற்றாக, மாற்று இடதுசாரி இயக்கங்கள் அதிவேகமாக முன்னெழும்பத் தொடங்கியுள்ளன.

சட்டத்தரணியான எலிஃப் எர்சல்ஃப், பெர்லினின் வீட்டுவசதி நெருக்கடி மற்றும் விலைவாசி உயர்வுக்கு எதிராகத் தனது தேர்தல் பிரசாரத்தை முன்னெடுத்திருந்தார். அவர் ஜெர்மன் தலைநகரின் முதலாவது தீவிர இடதுசாரி மேயராகப் பதவியேற்கவுள்ளார்.

ஆரம்பக்கட்ட மதிப்பீடுகளின்படி 25% வாக்குகளைப் பெற்றுத் தேர்தலில் முன்னிலை வகிக்கும் 45 வயதான எலிஃப் எர்சல்ஃப், தனது வெற்றி குறித்துத் தெரிவிக்கையில்:

“ஒருபோதும் விட்டுக் கொடுக்காதீர்கள், எப்போதும் மீண்டும் மீண்டும் எழுந்து நில்லுங்கள், முழு மக்களும் ஏற்றுக்கொள்ளும் வரை போராட்டத்தில் நிலைத்திருங்கள் என்ற உயரிய விழுமியங்களை எனக்குள் விதைத்த எனது பெற்றோருக்கு நான் நன்றிய தெரிவிக்கின்றேன்” எனக் குறிப்பிட்டுள்ளார்.

எவ்வாறாயினும், அவரது மேயர் கனவு நனவாக வேண்டுமாயின், நீண்டகாலமாகத் தலைநகரை ஆட்சி செய்த போதிலும், இத்தேர்தலில் வரலாற்றுப் பின்னடைவாக 12% வாக்குகளை மட்டுமே பெற்ற SPD சமூக ஜனநாயகக் கட்சியையும், 15% வாக்குகளைப் பெற்ற பசுமைக் கட்சியையும் (Green Party) இணங்கச் செய்ய வேண்டும்.

அது வெற்றியளிக்கும் பட்சத்தில், குடியேற்றப் பின்னணியைக் கொண்ட பெர்லினின் முதலாவது பெண் மேயராக அவர் திகழ்வார்.

அவரது தேர்தல் திட்டத்தில் வீட்டுவசதிப் பிரச்சினைக்கு முன்னுரிமை அளிக்கப்பட்டுள்ளதுடன், பெர்லினில் மூடப்பட்டுள்ள 270,000 வீடுகளைப் பொதுமக்களின் பயன்பாட்டிற்கு கொண்டு வருவதற்காக, அவற்றின் உரிமையாளர்களான பெரிய அளவிலான சொத்து வர்த்தகக் குழுக்களிடமிருந்து அவற்றைக் கையகப்படுத்த அவர் எதிர்பார்க்கிறார். பசுமைக் கட்சி இதற்கு ஆதரவளித்த போதிலும், SPD வேட்பாளர் ஸ்டீபன் கிராச் (Stefan Krach) வியாழக்கிழமை நடைபெற்ற இறுதி விவாதத்தில் இது “சரியான பாதையல்ல” எனத் தெரிவித்தார். இது ஒரு நீண்ட செயல்முறை என்றும், இதற்கு 20 பில்லியன் முதல் 30 பில்லியன் யூரோக்கள் வரையிலான பிரமாண்டமான நிதிப் மூலதனம் தேவைப்படும் என்றும் அவர் சுட்டிக்காட்டினார்.

எவ்வாறாயினும், பெர்லினின் மிகப்பெரிய சமூக சவாலாக வீட்டுவசதிப் பிரச்சினையே கருதப்படுகிறது. திருமணமானவரும் இரு பிள்ளைகளின் தாயாருமான எலிஃப் எர்சல்ஃப், தனது குடும்பத்தைக் குடியமர்த்துவதற்காகப் பல வருடங்களாக ஒரு வீட்டைத் தேடி அலைந்ததாகக் கூறுகிறார். 1981 இல் முனிச் நகரில் பிறந்த எலிஃப் எர்சல்ஃப், 1980 இல் தனது தாய்நாட்டிலிருந்து தப்பி வந்த ஒரு துருக்கிய தொழிற்சங்கத் தலைவரின் மகளாவார். கிழக்கு ஜெர்மன் கம்யூனிஸ்ட் கட்சியான SED ஐ வேராகக் கொண்ட DIE LINKE கட்சியில் இணைவதற்கு முன்னர், அவர் மனித உரிமைகளுக்காகவும், குறிப்பாகக் குடியேறியவர்களுக்காகவும் தனது சட்டத்துறை வதிவிடச் சேவை மூலம் குரல் கொடுத்து வந்தார்.

ஜெர்மனியில் அவரது குடும்பத்தினர் ஆரம்பக் காலத்தில் கழித்த மிகவும் கடினமான காலப்பகுதியே, அவர் அரசியலுக்குள் நுழைவதற்குப் பெரிதும் செல்வாக்குச் செலுத்தியதாக அவர் தெரிவித்துள்ளார்.

“நான் பல அநீதிகளை எதிர்கொள்ள வேண்டியிருந்தது. பெர்லினில் குடியேற்றப் பின்னணியைக் கொண்ட ஒருவர் மேயரானால், அது உண்மையிலேயே ஒரு வலுவான செய்தியாக அமையும்,” என அவர் அண்மையில் ஊடகங்களுக்கு விளக்கியிருந்தார்.

இதனிடையே, செப்டம்பர் 20 ஆம் திகதி நடைபெற்ற தேர்தலில் நாட்டின் கிழக்குப் பகுதியிலுள்ள மெக்லன்பர்க் (Mecklenburg) மாநிலத்தில் தீவிர வலதுசாரிக் கட்சியான Alternative for Germany (AfD) 37% வாக்குகளைப் பெற்று வெற்றியடைந்தது. மெக்லன்பர்க் மாநிலம் தீவிர வலதுசாரி, குடியேற்ற எதிர்ப்புவாதிகளின் தளமாகக் கருதப்படுகிறது. இரண்டாம் உலகப் போருக்குப்க்குப் பின்னர் AfD கட்சி ஜெர்மனி முழுவதும் தனது பலத்தை உறுதிப்படுத்தி வருவது முழு ஐரோப்பாவிலும் தீவிர அவதானத்திற்கு உள்ளாகியுள்ளது.

எலிஃப் எர்சல்ஃபின் வெற்றியில் அவரது வெளிநாட்டுப் பூர்வீகம் மற்றும் அவரது இடதுசாரிப் பின்னணி காரணமாக, அரசியல் விமர்சகர்கள் அவரை நியூயோர்க் நகரின் மேயராகப் பதவியேற்ற வெளியாளரான ஜோஹ்ரான் மம்தானியுடன் (Zohran Mamdani) ஒப்பிட்டுப் பேசத் தொடங்கியுள்ளனர்.

அவரைப் போலவே, எலிஃப் எர்சல்ஃப் மற்றும் DIE LINKE கட்சி பாலஸ்தீன மக்களுக்கு நேரடியாகக் குரல் கொடுத்து வருவதால் யூத எதிர்ப்புச் சாட்டங்களுக்கும் உள்ளாகியுள்ளனர். அக்குற்றச்சாட்டுகளைத் திட்டவட்டமாக மறுக்கும் எலிஃப் எர்சல்ஃப், தனது தேர்தல் பிரசாரத்தின் போது “பெர்லினில் யூத வாழ்க்கையைப் பாதுகாப்பதற்கான” திட்டத்தை வலியுறுத்தியதாகக் குறிப்பிட்டார். மேலும், எந்தவொரு வடிவத்திலான யூத எதிர்ப்பையும் தான் சகித்துக்கொள்ளப் போவதில்லை என்றும், “இஸ்ரேலையும் யூத மதத்தையும் தொடர்ச்சியாகக் குழப்பிக்கொள்வதற்கும்” எதிர்ப்பைத் தெரிவிப்பதாக அவர் வலியுறுத்தினார்.

எலிஃப் எர்சல்ஃப் மற்றும் அவரது DIE LINKE கட்சி ஆகியவை, சர்வதேச ரீதியில் பாரம்பரிய ஜெர்மனியக் கட்சிகளை விட இஸ்ரேலிய அரசாங்கத்தின் மீது கடுமையான விமர்சனங்களையும் இராணுவ எதிர்ப்பு நிலப்பாட்டையும் கொண்டுள்ளன. அத்துடன் பாலஸ்தீனர்களுக்குத் தங்களுக்கான சொந்த அரசுக்கான உரிமை மற்றும் சர்வதேச சட்டத்தின் அடிப்படையிலான அணுகுமுறையைத் தொடர்ந்து பாதுகாத்து வருகின்றன.

நியூயோர்க் மேயர் ஜோஹ்ரான் மம்தானியைப் போலவே, எலிஃப் எர்சல்ஃபும் வீட்டுவசதி, வாழ்க்கைச் செலவு, இளைஞர் பிரச்சினைகள் மற்றும் சமூக சமத்துவமின்மைக்கு முன்னுரிமை அளிக்கும் புதிய இடதுசாரித் தலைமுறையைப் பிரதிநிதித்துவப்படுத்துகிறார். 1989 சோவியத் முகாமின் வீழ்ச்சியின் அடையாள நகரமாகக் கருதப்படும் ஜெர்மனியின் பெர்லின் போன்றதொரு நகரத்திலிருந்து ஆரம்பமாகும் இந்த புதிய இடதுசாரிப் போக்கு, ஐரோப்பாவில் அதிவேகமாகத் தலைதூக்கி வரும் தீவிர வலதுசாரி நாசிசத்திற்கு எதிரான ஒரே மாற்றாக உருவெடுப்பதற்கான சாத்தியக்கூறுகள் ஒரு அபூர்வமான நிகழ்வு என அரசியல் விமர்சகர்கள் சுட்டிக்காட்டுகின்றனர்.