ராஜபக்ஸர்களின் விவகாரத்தில், மெல்லவும் முடியாமல் விழுங்கவும் முடியாமல் திண்டாடுபவரின் மனநிலையில் சஜித் பிரேமதாச இருக்கிறாராம். “நேரடியாகவும் வெளிப்படையாகவும் ராஜபக்ஸர்களுக்காகக் குரல் கொடுக்க முடியாமல் அவர் தவிக்கிறாரா? மஹிந்த செய்த உதவிக்கு கைமாறு செய்ய முடியாமல் அவதிப்படுகிறாரா?” என்ற கேள்வியும் அரசியல் அரங்கில் எழுகிறது.

வெளிப்படையாக ஒருவரையொருவர் விமர்சித்துக் கொண்டாலும், தேவையான சந்தர்ப்பங்களில் ஒருவரை ஒருவர் பாதுகாத்துக்கொண்ட அரசியல் பாசறையைச் சேர்ந்தவர்களாகவே ராஜபக்ஸர்களும் சஜித் பிரேமதாச தரப்பினரும் செயற்பட்டு வந்துள்ளனர். தங்களைத் தாங்களே திட்டிக்கொண்டாலும், அரசியல் ரீதியாக ஒருவருக்கொருவர் பாதுகாப்பாகவும் ஆதரவாகவும் செயற்பட்ட சந்தர்ப்பங்கள் இல்லாமல் இல்லை.

அதற்கான ஒரு முக்கியமான உதாரணமாக 2014 மார்ச் 25 ஆம் திகதி இடம்பெற்ற சம்பவத்தைச் சுட்டிக்காட்டலாம். முன்னாள் ஜனாதிபதி ரணசிங்க பிரேமதாசவின் மகளும் சஜித் பிரேமதாசவின் தங்கையுமான துலாஞ்சலி ஜயகொடி, 5,000 ரூபா போலி நாணயத்தாள்களுடன் சிக்கிக்கொண்டார். இதன்போது, அப்போதைய ஜனாதிபதி மஹிந்த ராஜபக்ஸ இவ்விடயத்தில் நேரடியாகத் தலையிட்டு, சிறைக்குச் செல்லவிருந்த சஜித் பிரேமதாசவின் தங்கையை மீட்டதாக அரசியல் களத்தில் குற்றச்சாட்டுகள் முன்வைக்கப்பட்டன.

இச்சம்பவம் குறித்து மஹிந்த ராஜபக்ஸ கருத்துத் தெரிவித்தபோது, “துலாஞ்சலி போலி நாணயத்தாள்களுடன் வங்கியில் சிக்கியிருந்தபோது, தாம் விரும்பியிருந்தால் விளக்கமறியலில் வைத்து, விவகாரத்தைப் பெரிதாக்கி சஜித் பிரேமதாசவின் அரசியல் வாழ்க்கையையே பாதித்திருக்க முடியும்” என்று குறிப்பிட்டிருந்தார்.

இந்தப் பின்னணியில்தான், ராஜபக்ஸ குடும்பத்தைச் சுற்றி தற்போது தீவிரமடைந்துள்ள சட்ட நடவடிக்கைகளையும், சஜித் பிரேமதாச தரப்பின் அரசியல் நகர்வுகளையும் தனித்தனியாகப் பார்க்க முடியாத நிலை ஏற்பட்டுள்ளது. ஒருபுறம் ராஜபக்ஸ குடும்பத்தின் பல உறுப்பினர்கள் பல்வேறு வழக்குகளையும் விசாரணைகளையும் எதிர்கொண்டு வருகின்றனர். மறுபுறம், அவர்களுடன் நீண்டகால அரசியல் தொடர்புகளைக் கொண்ட தரப்புகள் அரசாங்கத்திற்கு எதிரான அரசியல் எதிர்ப்பை முன்னெடுத்து வருகின்றன.

மஹிந்த ராஜபக்ஸ, எயார்பஸ் மற்றும் ஸ்ரீலங்கன் எயார்லைன்ஸ் விவகாரம் தொடர்பாக விசாரணைக்கு உட்படுத்தப்பட்டுள்ளார். இந்த விவகாரம் இன்னும் விசாரணை நிலையிலேயே உள்ளது.

கோட்டாபய ராஜபக்ஸ, 2006 ஆம் ஆண்டு மிக்-27 விமானக் கொள்வனவு முறைகேடு தொடர்பான நிதிக் குற்ற விசாரணைப் பிரிவின் விசாரணையை எதிர்கொண்டு வருகிறார். 2026 செப்டம்பர் 11 ஆம் திகதி அவர் மீண்டும் வாக்குமூலம் வழங்கினார். 2011 ஆம் ஆண்டு காணாமல் போன லலித் வீரராஜ் – குகன் முருகானந்தன் தொடர்பான வழக்கில் சாட்சியமளிக்கவும் அவர் அழைக்கப்பட்டுள்ளார். ஈஸ்டர் தாக்குதல் தொடர்பாக கைது செய்யப்படுவதைத் தடுக்கும் வகையில் அவர் தாக்கல் செய்த வழக்கும் உள்ளது. வெளிநாடு செல்லவும் அவருக்கு நீதிமன்றம் தடை விதித்துள்ளமை யாவரும் அறிந்ததே.

பசில் ராஜபக்ஸ, பிரவுன்ஸ் ஹில் அல்லது எலியாகந்த சொத்து தொடர்பான வழக்கை எதிர்கொண்டு வருகிறார். நீதிமன்றத்தில் ஆஜராகாததால் அவருக்கு எதிராகப் பிடியாணைகள் நிலுவையில் உள்ளன.

நாமல் ராஜபக்ஸ, எயார்பஸ் கொள்வனவு தொடர்பான இலஞ்ச விசாரணையில் செப்டம்பர் 4, 2026 அன்று கைது செய்யப்பட்டு விளக்கமறியலில் வைக்கப்பட்டார். இலஞ்சம் அல்லது ஊழல் குற்றச்சாட்டுகளை விசாரிக்கும் ஆணைக்குழுவின் விசாரணையும், குற்றப் புலனாய்வுத் திணைக்களத்தின் பணச்சலவை விசாரணையும் இணைத்து ஒரே உயர் நீதிமன்றக் குற்றப்பத்திரிகை தாக்கல் செய்ய நடவடிக்கை எடுக்கப்படுகிறது.

இதற்கு மேலதிகமாக, எயார்பஸ் இலஞ்ச வழக்கு, எயார்பஸ் தொடர்பான பணச்சலவை விசாரணை, கிரிஷ் நிறுவனத்தின் 70 மில்லியன் ரூபா குற்றவியல் நம்பிக்கை மோசடி வழக்கு, என்.ஆர். கன்சல்டன்சி பணச்சலவை வழக்கு, 2017 ஆம் ஆண்டு ஹம்பாந்தோட்டை போராட்ட வழக்கு மற்றும் டாங்கல் பே ஹோட்டல் கொள்வனவு தொடர்பான விசாரணை ஆகியவையும் நாமல் ராஜபக்ஸவுடன் தொடர்புடைய விவகாரங்களாக உள்ளன.

யோஷித்த ராஜபக்ஸ, 2006 ஆம் ஆண்டு கடற்படை ஆட்சேர்ப்பு முறைகேடு தொடர்பான இலஞ்ச விசாரணை மற்றும் வழக்கை எதிர்கொண்டு வருகிறார். தனியான பணச்சலவை வழக்கும் தொடர்கிறது. அந்த வழக்கில் அவர் குற்றச்சாட்டை எதிர்த்து மேல்முறையீட்டு நடவடிக்கையையும் மேற்கொண்டுள்ளார்.

ஷிரந்தி ராஜபக்ஸ தொடர்பில், சிறிலிய சவிய அமைப்பின் வங்கிக் கணக்கு மற்றும் நிதிப் பரிவர்த்தனைகள் தொடர்பான நிதிக் குற்ற விசாரணைப் பிரிவு விசாரணை உட்பட பல்வேறு விவகாரங்கள் உள்ளன.

ஷஷீந்திர ராஜபக்ஸ, தீ விபத்தில் சேதமடைந்த சொத்துக்கான இழப்பீட்டுத் தொகை தொடர்பான வழக்கை எதிர்கொண்டு வருகிறார். இந்த வழக்கு தற்போது நீதிமன்றத்தில் உள்ளது. அடுத்த விசாரணை செப்டம்பர் 28 ஆம் திகதி நடைபெறவுள்ளதாக நீதிமன்றக் கால அட்டவணை தெரிவிக்கிறது.

ரோஹித ராஜபக்ஸ, 19 மில்லியன் ரூபா முதலீடு தொடர்பாக விசாரணைக்கு அழைக்கப்பட்டுள்ளார்.

இவ்வாறாக ராஜபக்ஸ குடும்பத்தின் பல உறுப்பினர்கள் பல்வேறு வழக்குகளையும் விசாரணைகளையும் எதிர்கொண்டிருக்கும் நிலையில், அவர்களது அரசியல் பாசறையைச் சேர்ந்த கெஹெலிய ரம்புக்வெல்ல, ஜொன்ஸ்டன் பெர்ணான்டோ, பிரசன்ன ரணதுங்க, எஸ். எம். சந்திரசேன, சி. பி. ரத்நாயக்க உள்ளிட்ட பலரும் வழக்கு விசாரணைகளுக்கு முகங்கொடுத்து வருகின்றனர். இவர்களின் ஒருமித்த கோசமாக, “அரசாங்கத்தைக் கவிழ்க்க வேண்டும்” என்றிருக்கிறது. அரசாங்கம் கொண்டுவர முனையும் 22 ஆவது திருத்தச் சட்டத்திற்கு கடுமையான எதிர்ப்பையும் அவர்கள் வெளிப்படுத்தி வருகின்றனர். எதுவும் செய்ய இயலாத நிலையில் சோர்ந்து போயிருந்த இந்தத் தரப்பின் அரசியல் எதிர்ப்புக்கு தற்போது சஜித் பிரேமதாச தரப்பும் ஒரு முகமாக மாறியுள்ளது.

22 ஆவது திருத்தச் சட்டம் ஜனநாயகத்திற்கு விரோதமானது எனக் கூறி, திருத்தச் சட்டம் தொடர்பான முழுமையான விளக்கமில்லாத தமது தொண்டர் படையுடன் சஜித் பிரேமதாச தரப்பு பாராளுமன்றத்திற்கு அருகில் வந்து ஆர்ப்பாட்டத்தையும் நடத்தியது. நூற்றுக்கணக்கானவர்களின் அந்த எதிர்ப்பினால் கோடிக்கணக்கான மக்களின் இயல்பு வாழ்க்கைக்கு எவ்விதப் பாதிப்பும் ஏற்படவில்லை என்பதும் கவனிக்கத்தக்கது. அத்தோடு, சுதந்திரமாக கைகால்களை வீசி ஆர்ப்பாட்டத்தில் ஈடுபடுவதற்கான எல்லாவிதமான வசதி வாய்ப்புகளையும் திசைகாட்டி அரசாங்கம் ஏற்படுத்திக் கொடுத்திருந்தது. கூடுதலாக, பாராளுமன்ற நுழைவாயிலைக் கூட திறந்து வைத்திருந்தார்கள். போராடுவதற்கான உரிமை அனைவருக்கும் உள்ளது என்பதை இதன்மூலமாக அரசாங்கம் தெரியப்படுத்தியது.

குறித்த எதிர்ப்புக்கு ஆதரவாக எம்மோடு ஐக்கிய தேசியக் கட்சியும் உடனிருப்பதாக சஜித் பிரேமதாச தெரிவித்திருந்தார். ஆனால், அக்கட்சியைச் சேர்ந்த முன்னாள் ஜனாதிபதி ரணில் விக்ரமசிங்கவுக்கும் அரச நிதியை முறைகேடாகப் பயன்படுத்திய லண்டன் பயணம் தொடர்பான வழக்கு விசாரிக்கப்பட்டு வருகின்றது. அதேவேளை, ஐக்கிய தேசியக் கட்சியும் தாமும் ஒன்றிணைந்து விட்டதாக சஜித் பிரேமதாச தெரிவித்தபோதிலும், குறித்த எதிர்ப்பு ஆர்ப்பாட்டத்தில் அக்கட்சியின் முக்கியஸ்தர்களில் ஒருவரைக்கூட காணக்கிடைக்கவில்லை.

அது ஒருபுறமிருக்க, இந்த ஆர்ப்பாட்டத்தைப் பார்த்தால், இதுவொன்றும் இலங்கையை உலுக்கிய, மக்கள் ஆதரவு பொங்கி வழிந்த மிகப் பெரிய ஆர்ப்பாட்டமாக இருக்கவில்லை. கடந்த காலங்களில் ராஜபக்ஸர்களால் முன்னெடுக்கப்பட்டு, இறுதியில் தோல்வியுற்ற எதிர்ப்பு நடவடிக்கைகளைவிட பலவீனமானதும் தோல்வியுற்றதுமாகவே இது அமைந்துள்ளது.

ஒரு காலத்தில் இலட்சக்கணக்கில் இருந்த ராஜபக்ஸர்களின் ஆதரவாளர்கள் சுருங்கிச் சுருங்கி ஆயிரக்கணக்குக்குள் அடங்கியுள்ளதைப் போல, சஜித் பிரேமதாசவின் ஆதரவு வட்டமும் சுருங்கிப் போயிருப்பதை இந்த ஆர்ப்பாட்டம் வெளிச்சம் போட்டுக் காண்பித்துள்ளது.

இந்நிலையில், 22 ஆவது திருத்தச் சட்டத்தைச் சுற்றியுள்ள சட்டநிலையும் முக்கியமானது. உயர் நீதிமன்றம், 22 ஆவது திருத்தச் சட்டமூலத்தின் எந்தவொரு ஏற்பாடும் மக்கள் கருத்துக்கணிப்பு மூலம் அங்கீகரிக்கப்பட வேண்டியதில்லை எனத் தீர்மானித்துள்ளது. அதேவேளை, தனியான நீதித்துறை திருத்தச் சட்டமூலம் அரசியலமைப்புக்கு முரணற்றது என்றும், அதனை பாராளுமன்றத்தின் சாதாரண பெரும்பான்மையுடன் நிறைவேற்ற முடியும் என்றும் தீர்மானிக்கப்பட்டுள்ளது. இந்தத் தீர்மானம் செப்டம்பர் 22 ஆம் திகதி சபாநாயகரால் பாராளுமன்றத்தில் அறிவிக்கப்பட்டது.

22 ஆவது திருத்தச் சட்டமூலம் உயர் நீதிமன்றம் மற்றும் மேன்முறையீட்டு நீதிமன்ற நீதியரசர்களின் ஓய்வு வயதை நீடிப்பதற்கான ஏற்பாடுகளை உள்ளடக்கியுள்ளது. தனியான நீதித்துறை திருத்தச் சட்டமூலம் உயர் நீதிமன்றம், நீதவான் நீதிமன்றம் உள்ளிட்ட ஏனைய நீதிமன்றங்களின் நீதிபதிகளின் ஓய்வு வயதை நீடிப்பதை நோக்கமாகக் கொண்டுள்ளது.

22 ஆவது திருத்தச் சட்டமூலத்தின் மீதான எதிர்ப்பும், அதனைத் தொடர்ந்து முன்னெடுக்கப்படும் அரசியல் போராட்டமும், வெறுமனே ஒரு சட்டமூலத்தை எதிர்ப்பதாக மட்டும் பார்க்கப்பட முடியாது. ராஜபக்ஸர்களைச் சுற்றியுள்ள சட்ட நடவடிக்கைகள் தீவிரமடைந்துள்ள இந்தக் காலகட்டத்தில், அவர்களது அரசியல் பாசறையைச் சேர்ந்த பலரும் அரசாங்கத்திற்கு எதிரான அரசியல் அழுத்தத்தை உருவாக்க முயற்சிக்கின்றனர்.

அரசாங்கத்தின் விளக்கத்தின்படி, இந்த மாற்றங்களின் நோக்கம் நீதித்துறையின் செயற்பாட்டை வலுப்படுத்துவதும், நிலுவையில் உள்ள வழக்குகளை விரைவாக முடிவுக்குக் கொண்டு வந்து மக்களது சுமையைக் குறைப்பதும், நீதிமன்றக் கட்டமைப்பின் சுயாதீனத் தன்மையை உறுதிப்படுத்துவதுமாகும்.

அதுபோல, கடந்த காலங்களைக் காட்டிலும் திசைகாட்டியின் இரண்டுவருட ஆட்சியில் பாரபட்சமின்றி வழக்கு விசாரணைகள் முன்னெடுக்கப்படுவதோடு, தண்டனைகளும் வழங்கப்பட்டு வருகின்றன. அரசியல் பலம், பணபலம், குடும்பச் செல்வாக்கு போன்றவற்றைப் பயன்படுத்தி குற்றச் செயல்களில் ஈடுபட்டும், தண்டனைகளிலிருந்து தப்பித்தும் உலாவித் திரிந்தவர்கள் மீதும் சட்டம் பாய்வதற்கான நிலைமை உருவாக்கப்பட்டிருக்கிறது.

இதற்கு முன்னர் அவ்வாறான பாதுகாப்பும் சுயாதீனமும் நீதித்துறைக்கு இருந்திருக்கவில்லை. ஜே. ஆர். ஜெயவர்த்தனவின் ஆட்சியாகட்டும், மஹிந்த ராஜபக்ஸவின் ஆட்சியாகட்டும், தமது தரப்புக்கு எதிரான தீர்ப்பை வழங்கத் தயாராக இருந்த நீதியரசர்கள் அச்சுறுத்தப்பட்டனர், பழிவாங்கப்பட்டனர். இவ்வாறாக சட்டத்தைப் பிரபுத்துவ அரசியல்வாதிகள் தமக்கேற்றவாறு வளைத்துக்கொண்டு, தண்டனைகளிலிருந்து தப்பித்து வந்தனர். ஆனால், தற்போது அதற்கான வாய்ப்பு முற்றிலுமாக இல்லாதொழிக்கப்பட்டுள்ளது.

இந்தச் சூழ்நிலையில், எதிரணியினரின் அரசியல் நகர்வுகளிலும் ஒரு பொதுவான அம்சத்தை அவதானிக்க முடிகிறது. விசாரணைகள் தீவிரமடையும் நிலையில் ஒருவரையொருவர் பாதுகாத்துக்கொள்வதற்கும், சார்பாக இயங்குவதற்கும், இறுதியில் ஒன்றிணைவதற்கும் முயற்சிக்கின்றனர். அதேவேளை, திடீரென்று மனம் மாறி அதிகாரத்தைக் கைப்பற்றுவதை நோக்கமாகக் கொண்டு, தனித்தனியாகவும் தந்திரமாகவும் இயங்குவதையும் அவ்வப்போது காணமுடிகிறது.

நாமல் ராஜபக்ஸ சிறைக்குச் செல்வதற்கு முன்னர், “அடுத்த ஜனாதிபதி நான்தான்” எனும் பிம்பத்தைக் கட்டியெழுப்பப் படாதபாடுபட்டார். கிடைக்கும் சந்தர்ப்பங்களில் எல்லாம் சஜித் பிரேமதாசவின் இயலாமையை வெளிப்படுத்திக் கருத்துத் தெரிவித்திருந்தார்.

அதேபோன்று, திடீரென்று தோற்றம் பெறுகின்ற முன்னாள் ஜனாதிபதி ரணில் விக்ரமசிங்கவும் நாட்டை மீட்டெடுக்கத் தான் தயாரென்று உரையாற்றுகிறார். மீண்டும் ஒரு பொருளாதார நெருக்கடி வந்துவிடும் என்று மக்களைப் பயமுறுத்தப் பார்த்து, அது எடுபடாமல் போன பின்னர் மீண்டும் இருளுக்குள் அமைதியாக ஒளிந்துகொள்கிறார். மீண்டும் அவர் வெளியில் வரக்கூடும். வந்தவர் மீண்டும் இருந்த இடத்திற்கே சென்று அமைதியாகிவிடுவார்.

மறுபுறத்தில், சஜித் பிரேமதாசவை ஒரு தனித்துவமான தலைமை என்று காண்பிப்பதற்கு ஐக்கிய மக்கள் சக்தி அரசியல்வாதிகள் கடுமையாக முயற்சிக்கின்றனர். அதற்காக, அவர்களும் சில சந்தர்ப்பங்களில் ஏனையோரைத் தவிர்த்துவிட்டு அல்லது இணைத்துக்கொள்ளாமல் அரசியல் நகர்வுகளை முன்னெடுத்து, அதன் மூலம் பெயர்போட்டுக்கொள்ள முயற்சிக்கின்றனர்.

இவ்வாறு, வெளிப்படையான அரசியல் மோதல்களுக்கு அப்பால், தேவையான சந்தர்ப்பங்களில் ஒருவருக்கொருவர் பாதுகாப்பாகவும் ஆதரவாகவும் செயற்படும் போக்கையும், அதே நேரத்தில் தத்தமது அரசியல் எதிர்காலத்திற்காக தனித்தனியான நகர்வுகளை மேற்கொள்ளும் போக்கையும் எதிரணியில் காணமுடிகிறது. தனியாக அதிகாரத்தை கைப்பற்றவே அவர்கள் முயற்சிக்கிறார்கள்.

ஆனால், இவர்களது இந்த முயற்சிகள் அனைத்தும் படுதோல்வியைச் சந்தித்து வருகின்றன. ஏனெனில், மக்கள் எதிர்பார்க்கின்ற மாற்றத்தை திசைகாட்டி அரசாங்கம் ஏற்படுத்தி வருகிறது. இதில் நாம் கூர்ந்து கவனிக்க வேண்டிய விடயம்தான், எதிரணியினர் சேர்ந்து மள்ளுக்கட்டினாலும் அல்லது தனித்தனியாக நின்று சவால் விடுத்தாலும் நிகழ்காலத்தில் அது எடுபடுவதற்கான வாய்ப்பு இல்லை என்பதையாகும்.

அநுர குமார திசாநாயக்க ஜனாதிபதி பதவியை ஏற்று இரண்டு வருடங்கள் நிறைவுற்றிருக்கின்ற நிலையில், ஆரம்பத்தைக் காட்டிலும் தற்போது அவருக்கு மக்கள் செல்வாக்கு அதிகரித்திருக்கிறது. பேதங்களின்றி எல்லா மக்களும் ஏற்றுக்கொள்ளக்கூடிய, போற்றுகின்ற ஒரு தலைவராக அவர் பரிணமித்திருக்கிறார். ஆகவே, ஐந்து வருடங்கள் முடியும்போது எதிர்த்தரப்பில் இருக்கும் ஒருவராலும் அவரையோ அல்லது திசைகாட்டி பிரதிநிதிகளையோ நெருங்க முடியாத நிலை உருவாகப் போகிறது.

கடந்த காலங்களில் ஆட்சிக்கு வந்தவுடன் ஜனாதிபதிகள் ஜனாதிபதி செயலகத்துக்குள் முடங்கிப் போயினர். அமைச்சர்கள் அமைச்சுக்குள் முடங்கிப் போயினர். முன்பு அரசாங்கத்துக்கும் மக்களுக்கும் இடையில் பரஸ்பரத் தொடர்பு இருக்கவில்லை. ஆனால், தற்போது அப்படியல்ல! இந்த அரசியல் முறை மாற்றம் கண்டிருக்கிறது. ஆட்சியாளரை மக்கள் கேள்வி கேட்கும், ஆட்சியாளருக்கும் மக்களுக்கும் இடையில் நல்லதொரு உறவை உருவாக்கும், ஆட்சியாளர் மக்களுக்குப் பொறுப்புக்கூறும் நிலைமை தோற்றுவிக்கப்பட்டுள்ளது.

எனவே, இந்த இரண்டு ஆண்டுகள் நிறைவடையும் இந்தச் சந்தர்ப்பத்தில், நமது நாடு புதிய உத்வேகத்துடனும் புதிய மாற்றத்துடனும் முன்னோக்கிச் செல்லத் தொடங்கியுள்ளது.

இதற்கு முன்னர் நடந்தது என்னவென்றால், அரசாங்கம் ஒன்றை அமைக்கும்போது மக்கள் மத்தியில் அதற்கான ஆதரவு அதிகமாக இருக்கும். ஆனால், ஆட்சி நிர்வாகம் முன்னெடுக்கப்படத் தொடங்கியதும் அந்த ஆதரவு படிப்படியாகக் குறைந்து செல்வதே வழக்கமாக இருந்தது. ஆனால், இலங்கை அரசியல் வரலாற்றில் முதன்முறையாக, அரசாங்கத்தை அமைத்தபோது இருந்த மக்கள் ஆதரவைக் காட்டிலும், ஆட்சியை நடத்தும் காலத்தில் மேலும் அதிகமான மக்கள் ஆதரவைப் பெற்ற அரசாங்கமாக திசைகாட்டி அரசாங்கம் மாறியுள்ளது.

அதனால்தான், “கடந்த தேர்தலில் திசைகாட்டிக்கு வாக்களித்த அனைவராலும் இன்றும் வெளியே வந்து, ‘நாங்கள் திசைகாட்டிக்கு வாக்களித்தோம்’ என்று பெருமையாகக் கூற முடியும்” என்று ஜனாதிபதி குறிப்பிட்டார்.

அதன்படி, வாக்களித்த ஒவ்வொரு வாக்காளரினதும் கௌரவத்தைப் பாதுகாக்கும் வகையில் அரசாங்கம் செயலாற்றி வருகிறது. நாட்டு மக்களுக்கு சாதகமான எதிர்காலத்தை உருவாக்குவதற்கான மாற்றங்களை முன்னெடுத்து வருகிறது.

இத்தகைய நிலையில், எதிரணியைச் சேர்ந்தவர்கள் ஒன்றுசேர்ந்தோ அல்லது தனித்தனியாகவோ புறப்பட்டு வந்து எதிர்ப்பில் ஈடுபடுவதால், நாட்டின் அரசியல் பயணத்தை மீண்டும் பழைய பாதைக்குத் திருப்பிவிட முடியாது. ஏனெனில், மக்கள் எதிர்பார்த்த மாற்றம் ஏற்கனவே தொடங்கிவிட்டது. ஆகவே, பழைய நிலைமைக்கு மக்களும் இந்நாடும் இனிமேல் திரும்பிச் செல்லப் போவதுமில்லை.