“பாரபட்சமான தகனக் கொள்கையை முடிவுக்குக் கொண்டுவருவதில் இருந்து அரசாங்கமும் பிரதமரும் பின்வாங்குவதைக் கண்டு ஏமாற்றமடைகிறேன். அண்மையில் நம்மை விட்டுப் பிரிந்த நமக்கு அன்புக்குரியவர்கள் மற்றும் மக்களது உரிமைகளுக்கு ஜனநாயக அரசாங்கம் மதிப்பளிக்க வேண்டும்” என்று இலங்கைக்கான அமெரிக்கத் தூதுவர் அலைனா டெப்லிட்ஸ் தெரிவித்துள்ளார்.

கடந்த பாராளுமன்ற அமர்வில் பிரதமர் ஜனாஸா அடக்கத்திற்கு அனுமதி வழங்கியபோதிலும், அதனைத் தொடர்ந்து “அது பிரதமரின் தனிப்பட்டக் கருத்து” என்று உதய கம்மன்பில தெரிவிதிருந்தார். 

காணாமல் போனோர் தொடர்பான அலுவலகம் வீண் செலவுகளை ஏற்படுத்துகிறது. அதனை தொடர்ந்து நடத்தி செல்வது பயனற்றது என்று குறிப்பிட்டுக்கொண்டு அரசாங்கம் காணாமல் போனோர் தொடர்பான அலுவலகத்தை நீக்குவதற்கு முயற்சி செய்வதாக பாராளுமன்ற உறுப்பினர்  காவிந்த ஜயவர்தன தெரிவித்துள்ளார்.

அவர் மேலும் கருத்துத் தெரிவிக்கையில்,

“ஏப்ரல் 21 குண்டுத்தாக்குதலில் பாதிக்கப்பட்டவர்கள் தற்போது நியாயத்தை கோரி நிற்பதை போன்றே வடக்கு, கிழக்கு மக்கள் நியாயம் கோருகிறார்கள். பாதிக்கப்பட்டுள்ள தமிழர்களுக்கு உரிய தீர்வை வழங்குவது அரசாங்கத்தின் பொறுப்பாகும்.

பல்லின சமூகம் வாழும் நாட்டில் ஒரு இனத்திற்கு மாத்திரம் அனைத்து விடயங்களில் முன்னுரிமை வழங்கும்போது தேவையற்ற பிரச்சினைகள் தோற்றம் பெறும்.

வளர்ச்சி பெற்றுள்ள நாடுகள் அனைத்து இன மக்களையும் ஒன்றினைத்து அரசியல் மற்றும் சமூக மட்டத்தில் முன்னேறி செல்கிறது. இதனை ஜனாதிபதி கோட்டாபய ராஜபக்ஷ தலைமையிலான அரசாங்கம் புரிந்துகொள்ள வேண்டும்.

பல்லின சமூகம் வாழும் நாட்டில் அனைத்து இன மக்களின் ஒத்துழைப்பு இருந்தால் மாத்திரமே நாடு அனைத்து துறைகளிலும் முன்னேற முடியும்.” என்றார்.

விமர்சனங்கள் மற்றும் மாற்றுக்கருத்துக்களை முன்வைத்தல் மீது இலங்கை அரசாங்கத்தினால் புதிதாக விதிக்கப்பட்டிருக்கும் கட்டுப்பாடுகள் சிவில் சமூகத்தின் சுதந்திரத்தின் மீது பாரிய தாக்கத்தை ஏற்படுத்தியிருப்பதுடன், போரின்போது சர்வதேச சட்டங்களுக்கு முரணான வகையில் இடம்பெற்ற குற்றங்களுக்கு நீதி வழங்கப்படுவதிலும் தடைகளைத் தோற்றுவித்துள்ளன. விமர்சனங்கள் மற்றும் மாற்றுக்கருத்துக்கள் ஆகியவற்றை முன்வைப்பதற்கு எதிராக இலங்கை அரசாங்கத்தினால் முன்னெடுக்கப்பட்டுவரும் நடவடிக்கைகள் உடனடியாக நிறுத்தப்பட வேண்டும்  என்று சர்வதேச மன்னிப்புச்சபை வலியுறுத்துகிறது.

‘புதிய ஆடைக்குள் இருக்கும் பழைய பிசாசு: மீண்டும் அச்சத்திற்குள் திரும்பிய இலங்கை’ என்ற தலைப்பில் சர்வதேச மன்னிப்புச்சபையினால் வெளியிடப்பட்டுள்ள புதிய அறிக்கையிலேயே இவ்வாறு குறிப்பிடப்பட்டுள்ளது.

அதில் மேலும் இவ்வாறு தெரிவிக்கப்பட்டிருந்தது…

நாட்டில் இடம்பெற்ற மூன்று தசாப்தகால ஆயுதப்போராட்டத்தின்போது நடைபெற்ற குற்றங்களுக்கு எதிராகக் குரல் கொடுப்போரை அடக்குவதற்கும் இடைக்கால நீதிப்பொறிமுறைகளைத் தடைசெய்வதற்குமான முயற்சிகளின்போது மனித உரிமை அமைப்புக்கள், ஊடகங்கள், சட்டத்தரணிகள், அரசியல் விமர்சகர்கள் உள்ளிட்ட தரப்பினர் இலங்கை அரசாங்கத்தினால் இலக்குவைக்கப்பட்டுள்ளனர்.

இலங்கை அரசாங்கம் கடந்த வருடத்தில் சிவில் சமூக செயற்பாடுகளுக்கான இடைவெளியை வெகுவாக மாற்றியமைத்துள்ளது. இது தற்போது விமர்சனங்கள் மற்றும் மாற்றுக்கருத்துக்களை முன்வைப்போர் மீது அதிகளவான கட்டுப்பாடுகள் விதிக்கப்படும் நிலையைத் தோற்றுவித்துள்ளது.

வெறுமனே அதிகாரிகளை அதிருப்திக்குள்ளாக்கும் செயற்பாடுகளில் ஈடுபட்டமை மற்றும் அத்தகைய கருத்துக்களை வெளியிட்டமை ஆகியவற்றுக்காக அனைத்து மட்டங்களிலும் உள்ள மக்கள் அச்சுறுத்தப்பட்டு, துஷ்பிரயோகத்திற்கு உள்ளாக்கப்பட்டு, சிறைகளில் அடைக்கப்பட்டுள்ளார்கள்.

அத்தோடு கருத்துச்சுதந்திரம், அமைதியான முறையில் ஒன்றுகூடுதல், தனிப்பட்ட பாதுகாப்பிற்கான உரிமை, ஆதாரங்களின்றி தன்னிச்சையாகத் தடுப்புக்காவலில் வைக்கப்படுவதிலிருந்து சுதந்திரம் பெறல் ஆகியவை உள்ளடங்கலாக சர்வதேச சட்டங்களில் கீழுள்ள கடப்பாடுகளுக்கு அரசாங்கம் மதிப்பளிக்க வேண்டும்.

“உயிர்த்த ஞாயிறு தற்கொலை குண்டுத்தாக்குதலுக்குப் பின்னால் இருந்தது இந்தியாதான்” என்று அரசாங்கத்தின் சிரேஷ்ட பாராளுமன்ற உறுப்பினர் டிலான் பெரேரா கூறியுள்ளார்.

கடந்த 15ஆம் திகதி ‘ஹிரு’ சிங்கள தொலைக்காட்சியில் ‘சலக்குன’ என்னும் அரசியல் கலந்துரையாடல் நிகழ்ச்சியில் பங்கேற்றிருந்தபோதே பொதுஜன பெரமுனாவின் பாராளுமன்ற உறுப்பினர் இவ்வாறு கூறியிருந்தார்.  

தோட்டத் தொழிலாளர்களின் எந்தவொரு நியாயமான போராட்டத்திற்கும் எந்தவொரு நிபந்தனையுமின்றி மக்கள் விடுதலை முன்னணி உடன் நிற்கும்  என்று மக்கள் விடுதலை முன்னணியின் பொதுச் செயலாளர்  டில்வின் சில்வா தெரிவித்தார்.
நேற்று (16)    மஸ்கெலியா மற்றும் நோர்வுட் பிரதேசங்களில் தோட்ட மக்களுடனானக் கலந்துரையாடலின்போதே அவர் இவ்வாறு தெரிவித்தார். 

அவர் மேலும் இவ்வாறு கருத்துத் தெரிவித்தார்.
“06 வருடங்களுக்கு முன்பிருந்தே தோட்டத் தொழிலாளர்களுடன் இணைந்து 1000 ரூபா சம்பளத்தைப் பெற்றுக்கொடுக்க நாமும் போராடிக்கொண்டு இருக்கிறோம். அன்றிருந்த வாழ்க்கைச் செலவிற்கேற்ப 1000 ரூபாய் கேட்டு நாம் போராடினோம்.
06 வருட போராட்டங்களுக்குப் பின்பு இப்போதுதான் 1000 ரூபாய் கிடைக்கவிருக்கிறது. ஆனால், இன்று விலைவாசி மற்றும் வாழ்க்கைச் செலவுகள் அதிகரித்துப்போய் உள்ளன.

நாம் கேட்ட முதற் சந்தர்ப்பத்திலேயே அரசாங்கம் 1000 ருபாய் சம்பளத்தை வழங்கிவிடவில்லை. தோட்டத் தொழிலாளர்களின் நீண்ட போராட்டத்திற்குப் பிறகே கம்பெனியின் 900 ரூபாவுடன் அரசாங்கத்தின் 100 ரூபாவையும் சேர்த்து 1000 ரூபாய் தரப்போகிறார்கள்.

கூட்டு உடன்படிக்கையில் கிடைத்த சலுகைகள் சம்பள நிர்ணய சபையினூடாக சம்பளத்தை உயர்த்தும்போது இல்லாமல் ஆக்கப்படலாம். அச்சலுகைகள் வழங்கப்படாது போனால் அதனை வென்றெடுக்கவும் நாங்கள் தயாராக உள்ளோம். 
இந்நாட்டின் பொருளாதாரத் தூண்கள் நீங்கள். அந்நிய செலாவணி மூலமும் பணத்தைத் தேடிக்கொடுக்கிறீர்கள். உங்களது வியர்வையினால் தோட்டங்கள் செழிப்புற்றது. ஆனால், நீங்கள் மனிதர்களாக வாழக்கூடியச் சூழலை இதுவரையில் எந்தவொரு அரசாங்கமும் ஏற்படுத்திக் கொடுக்கவில்லை. நீங்கள் சிந்துகின்ற வியர்வையின் பெறுமதிக்கு உரிய ஊதியம் உங்களுக்கு வழங்கப்படவில்லை. குறைந்த வசதியுடனான வீடுகள் இல்லை. அநேகமானோர் இன்னமும் லயன் காம்பிராக்களிலேயே வாழ்கிறார்கள்.

பிள்ளைகள் முறையாக கற்பதற்கு வசதிகள் அடங்கிய பாடசாலைகள் இல்லை. ஒழுங்கான அரச மருத்துவமனை இல்லை. அவ்வாறு இருந்தாலும் அங்கு மருந்துகள் இல்லை. சனசமூக நிலையங்கள் இல்லை. மனிதர்களுக்குக் கிடைக்க வேண்டிய அடிப்படைத் தேவைகள் கிடைக்காமல் தான் நீங்கள் வாழ்கிறீர்கள்.  பிள்ளைகளுக்கு விளையாடுவதற்கான மைதானமோ அல்லது வேறு வசதிகளோ இல்லை. 

தோட்டத் தொழிலாளர்களின் பிள்ளைகளுடைய கல்வித் தகைமைகள் குறைவு என்பதால் வேறு நல்ல தொழில் செய்யமுடியாத நிலைமை காணப்படுகிறது. தோட்டங்களிலேயே வேலைசெய்ய அவர்கள் நிர்பந்திக்கப்படுகிறார்கள். இது நியாயமற்றது. 

உரிமைகள் உள்ள, அந்தஸ்துள்ள கௌரவமானப் பிரஜைகளாக நீங்கள் வாழ் வேண்டும். ஆனால், அந்த உரிமையைப் பெற்றுக்கொடுக்க எவராலும் முடியாது உள்ளது.

வாழ்க்கை என்பது இதுவல்ல. இதற்கும் மேலான வாழ்க்கை ஒன்றுள்ளது. இதுவரை எந்த அரசாங்கமும், மலையகத் தலைவர்களும் அதனைப் பெற்றுக்கொடுக்கவில்லை. அதனால் சம்பள போராட்டத்தை மாத்திரம் நடத்திக்கொண்டு ஏழ்மையில் மூழ்கி இருக்கிறோம். இந்த வாழ்க்கையை நாம் மாற்றியமைத்துக்கொள்ள வேண்டாமா? உங்களது பிள்ளைகள் சிறந்ததொரு வாழ்க்கை வாழ்வதை பார்க்க நீங்கள் ஆசைப்படவில்லையா? எமது பிள்ளைகளின் எதிர்காலத்திற்காக நாம் அனைவரும் ஒன்றிணைவோம்.”

பொத்துவில் தொடக்கம் பொலிகண்டி வரையிலான போராட்டத்திற்கு கிடைத்த ஆதரவு என்பது தமிழ் சமூகத்தில் நீடகாலத்தின் பின்னர் ஏற்பட்ட எழுச்சி ஆகும் என தமிழ்த் தேசியக் கூட்டமைப்பின் மட்டக்களப்பு மாவட்ட பாராளுமன்ற உறுப்பினர் இரா.சாணக்கியன் தெரிவித்துள்ளார். 

 தற்போது ஒரு தேர்தல் நடந்தால் வடக்கு கிழக்கல் அரசோடு இருக்கின்ற எவரும் தெரிவு செய்யப்படக் கூடிய நிலைமை இருக்காது என்றே நினைக்கின்றேன் எனவும் குறிப்பிட்டார்.   

அவர் மேலும் கருத்துத் தெரிவிக்கையில்…

“இந்தப் பொத்துவில் தொடக்கம் பொலிகண்டி வரையிலான போராட்டமானது உலகம் பூராகவும் பார்க்க வேண்டும். எமது மக்களின் பிரச்சினைகள் உற்றுநோக்கப்பட வேண்டும் என்பதற்காகவே செய்திருந்தோம்.

இந்தப் போராட்டமானது தமிழ் மக்களினதும், தமிழ்பேசும் மக்களினதும் பிரச்சினைகளை வெளிக்கொண்டு வருவதற்கான போராட்டமாகவே நடத்தியிருந்தோம். இதனை எவரும் திசைதிருப்பக்கூடாது.” என்றார்.

2020 டிசம்பர் மாதம் இடம்பெறவிருந்த க.பொ.த. சாதாரண தரப் பரீட்சை, 2021 மார்ச் 1 முதல் 11 வரை நடைபெறவுள்ளதுடன் சாதாரண தரப் பரீட்சை எழுதும் மாணவர்களுக்கு பெப்ரவரி இன்று (17) முதல் பெப்ரவரி 25 வரை கற்றல் விடுமுறை வழங்குவதற்கு நடவடிக்கை எடுக்குமாறு அனைத்து மாகாண, வலய மற்றும் பிரதேச கல்வி அதிகாரிகள், சுற்றுச்சூழல் ஆர்வலர்கள் மற்றும் அதிபர்களுக்கும் கல்வி அமைச்சின் செயலாளர் பேராசிரியர் கபில பெரேரா ஆலோசனை வழங்கியுள்ளார்.

அத்துடன் பரீட்சைக்கு தோற்றும் மாணவர்களுக்கு பரீட்சை அனுமதி அட்டை வழங்கும் போது அவர்களது கற்றல் விடுமுறைக்கு தடையாக இருக்கக் கூடாது என்றும் செயலாளர் மேலும் தெரிவித்தார்.