சமூக வலைத்தளப் பதிவு ஒன்றின் காரணமாக சவூதி அரேபியாவில் மரண தண்டனை விதிக்கப்பட்டுள்ள அனோஜன் சிவராஜாவின் உயிரைக் காப்பாற்றும் விசேட பணி, ஜனாதிபதி சட்டத்தரணி பைஸர் முஸ்தபா மற்றும் ஜனாதிபதி சட்டத்தரணி உபுல் குமரப்பெரும ஆகியோரால் நேற்று (23) உத்தியோகபூர்வமாக ஆரம்பிக்கப்பட்டுள்ளது.
ஜனாதிபதி அனுரகுமார திசாநாயக்க மற்றும் வெளிவிவகார அமைச்சர் விஜித ஹேரத் ஆகியோரின் நேரடி தலையீட்டில் முன்னெடுக்கப்படும் இத் தீர்க்கமான இராஜதந்திர விஜயத்திற்கு, அரசாங்கத்தின் நிதியைப் பயன்படுத்தாமல், சட்டத்தரணிகள் இருவரும் தங்களின் சொந்தப் பணத்தையே செலவிடுகின்றமை குறிப்பிடத்தக்கது.
அனோஜனின் உயிரைக் காப்பதற்காக விசேட இராஜதந்திர தூதுவர்களாக இவ்விருவரையும் உடனடியாக சவூதி அரேபியாவுக்கு அனுப்பி வைக்க அரசாங்கம் கடந்த 22ஆம் திகதி தீர்மானித்ததுடன், அது தொடர்பான தகவலை வெளிவிவகார அமைச்சர் விஜித ஹேரத் நேற்று பாராளுமன்றத்தில் உத்தியோகபூர்வமாக அறிவித்தார்.
இப் பணியின் முதற்கட்டமாக, சட்டத்தரணிகளான பைஸர் முஸ்தபா மற்றும் உபுல் குமரப்பெரும ஆகியோர் இலங்கையின் நீண்டகால நண்பரும் மாலைதீவின் முன்னாள் ஜனாதிபதியுமான மொஹமட் நஷீட்டை நேற்று மதியம் மாலைதீவில் சந்தித்து, இது தொடர்பான கோரிக்கை குறித்து விரிவாகக் கலந்துரையாடியுள்ளனர்.
மாலைதீவின் ஜனநாயக முறைப்படி தேர்ந்தெடுக்கப்பட்ட முதலாவது ஜனாதிபதியான மொஹமட் நஷீட், சர்வதேச ரீதியில் அறியப்பட்ட ஒரு முக்கிய அரசியல்வாதியும் மனித உரிமைச் செயற்பாட்டாளருமாவார்.
இச் சந்திப்பின் போது கருத்துத் தெரிவித்த முன்னாள் ஜனாதிபதி மொஹமட் நஷீட், அனோஜனின் பதிவு இஸ்லாமிய சமூகத்திற்கு எதிரான ஒரு தீவிரமான கருத்து என்ற போதிலும், ஒரு நிர்க்கதியான இளைஞனின் உயிரைக் காப்பாற்றுவதற்காகத் தான் மனிதநேய அடிப்படையில் அவருக்காகத் தோன்றுவதாகத் தெரிவித்தார். அத்துடன், அனோஜனின் உயிரைப் பாதுகாப்பதற்குத் தன்னால் இயன்ற முழுமையான ஒத்துழைப்பை வழங்குவதாகவும் அவர் இதன்போது உறுதியளித்துள்ளார்.
மாலைதீவில் இடம்பெற்ற இச் சந்திப்பு மிகவும் வெற்றிகரமாக அமைந்ததாகவும், எதிர்வரும் நாட்களில் தாம் சவூதி அரேபியா நோக்கிப் பயணிக்கத் தயாராக உள்ளதாகவும் ஜனாதிபதி சட்டத்தரணி உபுல் குமரப்பெரும உறுதிப்படுத்தியுள்ளார்.
