ரஞ்சன் ராமநாயக்கவின் நாடாளுமன்ற உறுப்பினர் பதவி வெற்றிடமாகி உள்ளதாக இன்று (07)  சபாநாயகர் மஹிந்த யாப்பா அபேவர்த்தன அறிவித்துள்ளார்.

இன்றைய (07) நாடாளுமன்ற அமர்வின் போது சபாநாயகர் இந்த அறிவிப்பினை சற்று முன்னர் வெளியிட்டார்.

நீதிமன்றத்தை அவமதித்தார் என்ற குற்றச்சாட்டின் பேரில் கைது செய்யப்பட்டு நான்கு வருட கடூழிய சிறைத்தண்டனை விதிக்கப்பட்டுள்ள ரஞ்சன் ராமநாயக்க சிறைச்சாலையில் அடைக்கப்பட்டுள்ளார் என்பதும் குறிப்பிடத்தக்கது.

இவர் கைது செய்யப்பட்டமைக்கு எதிராகவும் கருத்துக்கள் பரவலாக பேசப்பட்டமையும் இங்கு குறிப்பிடத்தக்கது. 

25 வருடங்களாக தொடரும் ஆசிரியர், அதிபர்களின் சம்பள முரண்பாட்டை நீக்கி சம்பளத்தை உடனடியாக உயர்த்தக்கோரி, இன்று (06) பெரும் திரளான ஆசிரியர்கள், அதிபர்கள் பதுளை நகரில் அணி திரண்டு போராட்டம் செய்தனர்.

பதுளை மாகாண சபை கட்டிட பகுதிக்கு முன்பாகவே இம்மாபெரும் போராட்டம் இடம்பெற்றது.

பதுளை மாவட்டத்தில் அதிபர்கள் ஆசிரியர்கள் இன்றைய தினம் (06) சுகயீன விடுமுறையை அறிவித்து போராட்டக்களத்தில் குதித்திருந்தனர்.

இலங்கை ஆசிரியர் சேவை சங்கத்தின் தலைமையில் ஏற்பாடு செய்யப்பட இப்போராட்டம் மாபெரும் வெற்றிகொண்டது. 

இலங்கையில் முப்பது வருடங்களாகத் தொடர்ச்சியாக இடம்பெற்றிருந்த கொடிய இனவாத யுத்தத்தினால் வடக்கின் தமிழ்ப் பெண்கள் பலரும் தமது கணவன்மாரையும், ஏனைய குடும்ப உழைப்பாளிகளையும் இழந்து வறுமைக் கோட்டிலும், வறுமைக் கோட்டின்கீழும் சொல்லாணாத் துயரங்களோடு தமது சீவனோபாயத்தை மேற்கொண்டிருநதனர்.

இவ்வாறான சமூகக் கள அமைப்பின்போது நுண்நிதி நிறுவனங்கள் எனத் தம்மை அடையாளப்படுத்திக்கொண்டு இப்பெண்களை அந்நிறுவனத்தினர்கள் அணுகித் தாம் அவர்களுக்கு கடன் வழங்கி அவர்களுடைய வறுமையை அகற்றுவதாக ஆசைகாட்டி அவர்களைத் தம்பக்கம் கவர முயற்சித்து அம்முயற்சியில் பெரு வெற்றியும் பெற்றிருந்தார்கள். வறுமையில் வாடிய மகளிரும் இந் நுண்நிதி நிறுவனங்களின் இயக்குனர்கள் தம்முடைய வறுமையை ஒழித்து தம்மை வளங்கொழிக்க வாழவைக்க அவதாரமெடுத்த “மீட்பர்கள்” என எண்ணிக் கடனும் பெற்றார்கள்.

இந் நதி நிறுவனங்கள் அவர்களுக்கு இக் கடன்களை வழங்கும்போது அவர்களுடைய பொருளாதாரப் பின்னணியின் பலத்தை அறிவதற்கான தரவுகளைச் சேகரித்து அத் தரவுகளின்பால் அப்பெண்களின் உடைமையாகவுள்ள பொருளாதாரப் பலத்திற்கேற்பக் கடன்களை வழங்கியிருக்க வேண்டும். அதுவும், அவர்கள் தாம் பெற்ற கடன்களைத் திருப்பிச் செலுத்தப்டாதவிடத்து அவர்கள் குடியிருக்கும் வீடு, அவர்களின் அன்றாட அடிப்படைச் சீவனோபாயத்திற்கேற்ற அiசாய, அசையும் சொத்துக்கள் தவிர்ந்த மேலதிக சொத்துக்கள் இருந்திருந்தால் மட்டும் அச்சொத்துக்களின் பெறுமதியிலும் பார்க்கச் குறிப்பிடக்கூடிய குறைந்தளவு கடன் தொகையை வழங்கியிருக்க வேண்டும். அவ்வாறாக அந்நிதி நிறுவனங்கள் செயற்பட்டிருந்தால், இன்று அப்பெண்கள் கடனை திருப்பிச் செலுத்தமுடியாத நிலை ஏற்பட்டிருக்காது. அவர்களுக்கு கடன் வழங்கிய நிதி நிறுவனங்களின் அதிகாரிகளும், ஊழியர்களும் இரவு வெகுநேரம் கழித்துக்கூட அவர்களுடைய வீடுகளுக்குச் சென்று தகாத வார்த்தைகளால் இழிவுபடுத்தியும், பயமுறுத்தியும், பாலியல் இலஞ்சம் கேட்டும் மிகவும் கேவலமாகவும், அநாகரிகமாகவும் துன்புறுத்தி வருவது கண்கூடு.

நுண்கடன் நிதி நிறுவனங்களின் அதிகாரிகளினதும், ஊழியர்களினதும் இழிவான நடைமுறைகளுக்கு தாக்குப்பிடிக்க முடியாமல் நுண்கடன் பெற்ற மங்கையர் பலர் மனநோயினால் பீடிக்கப்பட்டிருப்பதோடு தற்கொலைகளையும் மேற்கொண்டுள்ளனர்.

இந் நிதி நிறுவனங்களை நம்பிக் கடன் பெற்றுத் தமது வறுமை நிலையை நீக்கி வளமாக வாழலாம் என நம்பிய வனிதையர் பெரும் ஏமாற்றத்திற்குள்ளாக்கப்பட்டது மட்டுமல்ல, சாமான்யப் பொருளாதார பலத்தோடு வாழ்ந்தவர்கள் வறுமைக்கோட்டுக்கும், வறுமைக்கோட்டின் மீது வாழ்ந்தவர்கள் வறுமைக்கோட்டின் கீழும் பின்தள்ளப்பட்டுள்ளார்கள்.

எனவே, இந் நிதி நிறுவனங்களின் அடாவடியினால் வெகுவாகப் பாதிக்கப்பட்டு வறுமைக்கும், தற்கொலைக்கும் தாராளமாகத் தள்ளப்பட்டுள்ள பெண்களைப் பாதுகாப்பது அரசின் உடனடிக் கடமையாகவுள்ளது. அதனால், அரசானது சிறிதளவும் காலதாமதஞ் செய்யாமல் இப்பெண்களை நுண்நிதி நிறுவனங்களின் இறுக்கப்பாட்டிலிருந்து மீட்டெடுப்பதோடு மட்டும் நின்றுவிடாது இனிமேலும் மேற்கொள்ளப்படும் மக்கள் விரோத, மனிதாபிமானமற்ற நிதி நிறுவனங்கள் நம் மண்ணில் முளைத்தெழுவதற்கு ஆப்பு வைப்பதோடு, தற்போது இயங்கிக்கொண்டிருக்கும் இந்நிறுவனங்களை இழுத்து மூடுவதற்கும் தயங்காமல் முன்வரவேண்டும்.

இராஜாங்க அமைச்சர் ஜீவன் தொண்டமான் உள்ளிட்டோர், பெருந்தோட்ட மக்களின் பணங்களை மோசடி செய்வதாக, தாழ்நில தோட்டத் தொழிலாளர் சங்கத்தின் தலைவர் ருவன் கால்லகே குற்றஞ்சாட்டுகின்றார்.

கொழும்பில் இடம்பெற்ற ஊடக சந்திப்பொன்றிலேயே அவர் இவ்வாறு குறிப்பிட்டுள்ளார்.

அவர் மேலும் கருத்துத் தெரிவிக்கையில்,

வெட்கமின்றி வேஸ்டி அணிந்து கொண்டு தோட்டப்புறங்களுக்கு செல்ல வேண்டாம். எதிர்வரும் காலத்தில் உங்களுக்கு எந்த வகையிலும் அந்தப் பகுதிகளுக்கு செல்ல முடியாது. மக்களை இந்தளவு ஏமாற்ற வேண்டாம் என கேட்டுக் கொள்கின்றோம்.

தொழில்துறை அமைச்சர் ஆயிரம் ரூபா தருவதாக கூறினார், அதனையடுத்து பெருந்தோட்ட நிறுவனங்கள் வழக்குத் தொடர்ந்தன, சுமார் ஐந்து லட்சம் தொழிலாளர்கள் பணிபுரிகின்றார்கள் எனில், 200 ரூபா வீதம் அவர்களிடமிருந்து பெற்றுக் கொள்ளும் நடவடிக்கைகளையே இவர்கள் முன்னெடுக்கின்றார்கள்.இவ்வாறு மோசடி செய்வதற்கு ஜீவன் தொண்டமான், பெருந்தோட்டத் துறை அமைச்சர் மற்றும் தொழிற்துறை அமைச்சர் ஆகியோர் இதனுடன் தொடர்புட்டுள்ளார்கள்.” என்றார். 

மன்னார் மறைமாவட்ட ஓய்வு நிலை ஆயர் இராயப்பு ஜோசப் ஆண்டகையின் பூதவுடலுக்கு இறுதி அஞ்சலி செலுத்தும் முகமாக இன்றைய தினம் (5) மன்னார் மாவட்டத்தில் பூரண கடையடைப்பு மேற்கொள்ளப்பட்டுள்ளதோடு துக்க தினம் அனுஷ்டிக்கப்பட்டு வருகிறது.

வீதிகள் வீடுகள் எங்கும் கருப்பு மற்றும் வெள்ளை நிற கொடிகள் பறக்க விடப்பட்டு கடைகள் அனைத்தும் மூடப்பட்டு இன்றைய தினம் இறந்த ஆயருக்கு இறுதி அஞ்சலி செலுத்தப்பட்டு வருகின்றது.

வடக்கு கிழக்கு மாத்திரமன்றி இலங்கை முழுவதும் உள்ள பொதுமக்கள், அரச அதிகாரிகள், அரசியல் பிரமுகர்கள் மதத் தலைவர்கள் என இலட்சக்கணக்கான மக்கள் இணைந்து இன்றைய தினம் புனித செபஸ்தியார் ஆலயத்தில் உள்ள ஆயரின் பூதவுடலுக்கு அஞ்சலி செலுத்தி வருகின்றனர்.

மன்னார் மறைமாவட்ட ஓய்வு நிலை ஆயர் கலாநிதி இராயப்பு ஜோசப் ஆண்டகையின் பூதவுடல் நேற்று ஞாயிற்றுக்கிழமை(4) மாலை 3 மணியளவில் மன்னார் தூய செபஸ்தியார் போராலயத்திற்கு அஞ்சலிக்காக கொண்டு வரப்பட்டுள்ள நிலையில் இன்று திங்கட்கிழமை மாலை 3 மணியளவில் இறுதி நல்லடக்கம் செய்யப்படவுள்ளது.

நாட்டில் பெரும் சர்ச்சையை ஏற்படுத்தியுள்ள எப்லடொக்சின் அடங்கியுள்ள தேங்காய் எண்ணெயினை மீண்டும் மலேசியாவுக்கு அனுப்ப நடவடிக்கை மேற்கொள்ளப்பட்டுள்ளது.

எப்லடொக்சின் அடங்கியுள்ளதாக உறுதிப்படுத்தப்பட்டுள்ள 5 தேங்காய் எண்ணெய் கொள்கலன்களையே நாளை (செவ்வாய்க்கிழமை) மலேசியாவுக்கு அனுப்புவதற்கு நடவடிக்கை மேற்கொள்ளப்பட்டுள்ளதாக சுங்க திணைக்களம் தெரிவித்துள்ளது.

தனியார் நிறுவனங்களினால் இறக்குமதி செய்யப்பட்ட 13 தேங்காய் எண்ணெய் கொள்கலன்களிளேயே எப்லடொக்சின் என்ற பதார்த்தம் உள்ளமை கண்டறியப்பட்டுள்ளது.

இதேவேளை ஒரு பில்லியன் தேங்காய் எண்ணெய் துகள்களில் 10 க்கும் மேற்பட்ட எப்லடொக்சின் துகள்கள் இருந்தால், அது மனித உடலுக்கு கடுமையான ஆபத்தை ஏற்படுத்தும் என நாடாளுமன்ற உறுப்பினர் விஜயதாச ராஜபக்ஷ தெரிவித்துள்ளமையும் குறிப்பிடத்தக்கது.

பெருந்தோட்ட தொழிலாளர்களுக்கு நாளாந்த சம்பளமாக ஆயிரம் ரூபாவை வழங்குவதற்கான வர்த்தமானி அறிவித்தலை செல்லுபடியற்றதாக்கக் கோரி பெருந்தோட்ட நிறுவனங்கள் தாக்கல் செய்த மனுவை மேன்முறையீட்டு நீதிமன்றத்தில் இன்று (05) பரிசீலனைக்கு எடுத்துக் கொள்ளப்பட்டது.

இதன்போது, இந்த மனு மீதான விசாரணைகளை எதிர்வரும் மே 5 ஆம் திகதி விசாரணைக்கு எடுத்துக்கொள்ள தீர்மானிக்கப்பட்டுள்ளது.

தொடர்ந்து 5 வருட காலமாக இழுத்தடிக்கப்பட்டு வந்த 1000 ரூபா சம்பள விடயம் குறித்து, அரசாங்கம் தனது வர்த்தமானி அறிவித்தல் மூலம் அனுமதி வழங்கிய பின்னரும் கம்பனிகளால் வர்த்தமானி அறிவித்தலுக்கு இடைக்கால தடை தடை விதிக்கும்படி நீதிமன்றில் மனு தாக்கல் செய்யப்பட்டது. அரசாங்கம் இவ்விடத்தில் தோற்றுப்போயுள்ளதா என்ற கேள்வி எழுந்துள்ளது.

இழுபறியில் இருக்கும் இவ்விடயம் குறித்து தோட்டத் தொழிலாளர்கள் நீதிமன்றத்தின் தீர்ப்புக்காக காத்திருக்கின்றனர்.