මෙතෙක් කල් රු.1500ට මිලදීගත් යූරියා මිටියක් මේ වන විට හම්බන්තොට මැදමුලන ප්‍රදේශයේ දී විකිණෙන්නේ රුපියල් 3,500ට බව ගොවීහු චෝදනා කරති. එම පොහොරද ප්‍රදේශයේ ගොවියන්ට මිලදීගත නොහැකි බවත් පිටින් පැමිණෙන ගොවියන් ඒ පොහොර මිටි ගණන් රැගෙන යන බවත් ගොවීහු වැඩිදුරටත් පවසති.
රසායනික පොහොර තහනමත් සමග රට පුරා පොහොර හිඟයක් පවතින බව ගොවීන් කොතෙක් මැසිවිලි නැගුවද කෘෂිකර්ම අමාත්‍ය මහින්දානන්ද අලුත්ගමගේ ඇතුළු ආණ්ඩුව ඒ බව පිළිගන්නේ නැත. ආණ්ඩුවේ චෝදනාව වී ඇත්තේ ව්‍යාපාරිකයන් පොහොර සඟවාගෙන සිටින බවයි. කෙසේ නමුත් එවැනි පොහොර තොග සඟවාගෙන සිටින වෙළෙන්දන් සම්බන්ධව ද ආණ්ඩුව ක්‍රියාමාර්ගයක් ගන්නා බව පෙනෙන්නට නැත.
