වැලිසර නාවික හමුදා කඳවුරේ කරන ලද පරීක්ෂණයකදී, 2009 වසරේදී ත්‍රිකුණාමලයේදී තරුණයන් 11 දෙනකු පැහැරගෙන යාමට උපයෝගී කරගත් ඩිෆෙන්ඩර් රථ දෙකෙහි කොටස් එම සිද්ධිය පිළිබඳ පරීක්ෂණ පවත්වන අපරාධ පරීක්ෂන දෙපාර්තමේන්තුවේ පොලිසියේ නිලධාරින් විසින් සොයාගෙන ඇතැයිද පැහැරගෙනගොස් මරා දමන ලද තරුණයකුට අයිති බව කියන මෝටර් සයිකලයක කොටස් රාශියක්ද හමු වී ඇතැයිද වාර්තා වේ.
මෙම අපරාධය සඳහා උපයෝගී කරගත් වාහනවල කොටස් ගලවා වෙන්කර ලේඛන අස්ථානගත කර ඇති බවද රහස් පොලිසියට අනාවරණය කරගෙන ඇතැයි වාර්තා වේ.
අධිකරණයේ අවසරය ඇති වැඩිදුර පරීක්ෂණ සඳහා මෙම අමතර කොටස් රජයේ රස පරීක්ෂකවරයා වෙත යොමු කර ඇති අතර ත්‍රිකුණාමලය නාවික හමුදා මූලස්‌ථානයේ රහසිගත මෙහෙයුම් මධ්‍යස්‌ථානයක්‌ පවත්වාගෙන යමින්, කප්පම් ගැනීම සඳහා සිසුන් හා වෙනත් පුද්ගලයින් පැහැර ගැනීම සම්බන්ධයෙන් චෝදනා ලැබ සිටින නාවික හමුදා බුද්ධි බළකායේ නිලධාරීන් කිහිප දෙනෙකු ගෙන් රහස් පොලිසිය මේ වනවිට කට උත්තර ලබාගෙන ඇතැයිද පැවසේ.
රුපියල් ලක්‍ෂ ගණනින් කප්පම් මුදල් ලබා ගැනීමට දෙමළ හා මුස්ලිම් තරුණයන් 28 දෙනකු පැහැරගෙන ගොස්‌ ඔවුන් ඝාතනය කිරීම සම්බන්ධයෙන් නාවික හමුදාවේ උසස්‌ නිලධාරීන් තිදෙනකු චෝදනා එල්ලවී තිබේ.
නාවික හමුදාව සම්බන්ධයෙන් අපරාධ පරීක්ෂණ දෙපාර්තමේන්තුව මෙතෙක්‌ සිදු කළ විමර්ශනවලදී නාවික නිලධාරින් 74 දෙනකුගෙන් ප්‍රකාශ ලබාගෙන ඇත.
