முன்னாள் ஜனாதிபதி கோட்டாபய ராஜபக்ஷவின் தனிப்பட்ட செயலாளராகப் பணியாற்றிய சுகீஸ்வர பண்டாரவை மீண்டும் விளக்கமறியலில் வைக்குமாறு கோட்டை நீதவான் பசான் அமரசேன இன்று (07) உத்தரவிட்டுள்ளார்.

ஜனாதிபதி செலவினத் தலைப்பின்கீழ் இரு பதவிகளுக்காக இரட்டைச் சம்பளத்தைப் பெற்றுக்கொண்டமை தொடர்பான சம்பவம் குறித்தே இந்த உத்தரவு பிறப்பிக்கப்பட்டுள்ளது.

அவர் சில மாதங்களுக்கு முன்னர் மத்திய குற்றப் புலனாய்வுப் பணியகத்தினால் கைது செய்யப்பட்டு விளக்கமறியலில் வைக்கப்பட்டிருந்த நிலையில், இன்று நீதிமன்றத்தில் ஆஜர்படுத்தப்பட்டபோதே மீண்டும் இவ்வாறு விளக்கமறியலில் வைக்கப்பட்டுள்ளார்.

இச்சம்பவம் தொடர்பான விசாரணைகள் இன்னும் நிறைவடையவில்லை என மத்திய குற்றப் புலනாய்வுப் பணியகத்தினர் நீதிமன்றத்தில் முன்வைத்த කරුණු සැලக்கில் கொள்ளப்பட்டே இந்நீதிமன்ற உத்தரவு பிறப்பிக்கப்பட்டுள்ளது.

முன்னாள் பிரதம நீதியரசர் ஷிரானி பண்டாரநாயக்கவின் கணவரான பிரதீப் காரியவாசம், லஞ்ச அல்லது ஊழல் விசாரணை ஆணைக்குழுவின் அதிகாரிகளால் கைது செய்யப்பட்டுள்ளார்.

அரசு வங்கியொன்றில் இருந்து 100 இலட்சம் ரூபாயைப் பெற்று துஷ்பிரயோகம் செய்ததன் மூலம் ஊழல் மற்றும் பொதுச் சொத்துக்கள் சட்டத்தின் கீழ் தவறிழைத்த குற்றச்சாட்டு தொடர்பில் கைது செய்யப்பட்டுள்ள முன்னாள் ஜனாதிபதியின் மனைவி ஷிரந்தி ராஜபக்ஷ தொடர்பில் மேற்கொள்ளப்பட்டு வரும் விசாரணைகளுக்கு அமைவாகவே இவர் கைது செய்யப்பட்டுள்ளார்.

குறித்த சட்டவிரோத பணப்பரிமாற்றம் இடம்பெற்ற காலத்தில் பிரதீப் காரியவாசம் தேசிய சேமிப்பு வங்கியின் தலைவராகப் பணியாற்றியிருந்தார்.

அத்துடன், தேசிய சேமிப்பு வங்கியின் நிதியைப் பயன்படுத்தி ‘தி ஃபைனான்ஸ்’ (The Finance) நிறுவனத்தின் பங்குகளை அதிக விலைக்கு கொள்முதல் செய்ததன் மூலம் அரசாங்கத்திற்கு நட்டத்தை ஏற்படுத்திய குற்றச்சாட்டில் குற்றவாளியாக நிரூபிக்கப்பட்ட அவருக்கு, கொழும்பு பிரதான நீதவான் நீதிமன்றத்தால் 2018 ஆம் ஆண்டு நவம்பர் 26 ஆம் திகதி 05 ஆண்டுகள் இடைநிறுத்தப்பட்ட சிறைத்தண்டனை விதிக்கப்பட்டிருந்தது.

இதன்போது, கொழும்பு பிரதான நீதவான் ரங்க திசாநாயக்கவினால் 05 ஆண்டுகள் இடைநிறுத்தப்பட்ட சிறைத்தண்டனைக்கு மேலதிகமாக 3 இலட்சம் ரூபா அபராதமும் விதிக்கப்பட்டிருந்தமை குறிப்பிடத்தக்கது.

கடந்த 2023 ஆம் ஆண்டு டிசம்பர் 31 ஆம் திகதி வெலிகம, பெலென பகுதியில் அமைந்துள்ள ஹோட்டலொன்றில் இடம்பெற்ற துப்பாக்கிச் சூட்டுச் சம்பவம் தொடர்பாக, முன்னாள் பொலிஸ் மா அதிபர் தேஷபந்து தென்னகோன் உள்ளிட்ட 08 சந்தேகநபர்களுக்கு எதிராக மாத்தறை மேல் நீதிமன்றத்தில் இன்று (07) குற்றப்பத்திரிகை கையளிக்கப்பட்டுள்ளது.

குறித்த வழக்கு இன்று விசாரணைக்கு எடுத்துக்கொள்ளப்பட்ட போதே இக்குற்றப்பத்திரிகை கையளிக்கப்பட்டுள்ளது.

வழக்கு விசாரணைக்கு எடுத்துக்கொள்ளப்பட்ட போது முன்னாள் பொலிஸ் மா அதிபர் தேஷபந்து தென்னகோன் உள்ளிட்ட 08 சந்தேகநபர்களும் மாத்தறை மேல் நீதிமன்றத்தில் ஆஜராகியிருந்தனர்.

குற்றப்பத்திரிகை கையளிக்கப்பட்டதை அடுத்து, தேஷபந்து தென்னகோன் உள்ளிட்ட 08 சந்தேகநபர்களும் தலா 250,000 ரூபா ரொக்கப் பிணை மற்றும் தலா 50 இலட்சம் ரூபா பெறுமதியான 04 சரீரப் பிணைகளில் விடுவிக்க உத்தரவிடப்பட்டுள்ளது.

மேரி லூட்ஸ் விக்கிரமசிங்க எனப்படும் ஷிரந்தி ராஜபக்ஷ நேற்று (06) அதிகாலை நாட்டிற்கு வருகை தந்துள்ள நிலையில், ரணில் விக்கிரமசிங்க திடீரென சிங்கப்பூர் நோக்கி புறப்பட்டுச் சென்றுள்ளமை குறித்து அரசியல் அவதானிகளின் விசேட கவனம் திரும்பியுள்ளது.

ஷிரந்தி ராஜபக்ஷ அவசர மருத்துவ சிகிச்சைக்காக எனத் தெரிவித்து சிங்கப்பூர் சென்றிருந்த போதிலும், அவர் மலேசியாவிலிருந்தே மீண்டும் நாடு திரும்பியுள்ளார். இதேவேளை, ரணில் விக்கிரமசிங்கவும் மருத்துவ சிகிச்சை பெறப்போவதாகத் தெரிவித்தே திடீரென சிங்கப்பூர் சென்றுள்ளார். மத்திய வங்கி பிணைமுறி மோசடியுடன் தொடர்புடைய அர்ஜுன் மகேந்திரன் சிங்கப்பூரின் குடியுரிமையைப் பெற்று அங்கு வசித்து வருகின்றமை குறிப்பிடத்தக்கது.

‘ஐஸ்’ போதைப்பொருள் கடத்தல் தொடர்பாக கைது செய்யப்பட்டுள்ள மஹிந்த கஹந்தகம, ராஜபக்ஷ குடும்பத்தின் நெருங்கிய சகா என்பதுடன், 2017 ஒக்டோபர் மாதம் ரஷ்யாவில் நடைபெற்ற உலக இளைஞர் மற்றும் மாணவர் விழாவில் பங்கேற்ற இலங்கைக் குழுவில் பிரதிநிதித்துவப்படுத்தியிருந்தார் என்பதும் சுட்டிக்காட்டத்தக்கது.

அவர், சுயதொழில் செய்வோரின் தலைவர் எனத் தன்னைக் கூறிக்கொண்டு புறக்கோட்டை வியாபாரிகளிடம் கப்பம் வசூலித்த காலத்தில், நாமல் ராஜபக்ஷவின் ‘நீல பலகாய’ அமைப்புடன் நெருங்கிய தொடர்பைப் பேணி வந்தார். அந்தத் தொடர்புகளின் காரணமாகவே உலக இளைஞர் மற்றும் மாணவர் விழாவில் பங்கேற்கும் வாய்ப்பு மஹிந்த கஹந்தகமவுக்கு வழங்கப்பட்டிருந்தது.

அவர் ஐஸ் போதைப்பொருளுடன் கைது செய்யப்பட்டதைத் தொடர்ந்து சமூக ஊடகங்களில் வெளியிடப்பட்ட காணொளிகள் மூலம், நாட்டில் தலைமறைவாகியுள்ள பாதாள உலகத் தலைவர்களுடன் அவர் மிக நெருங்கிய தொடர்பைப் பேணி வந்துள்ளமை தெரியவந்துள்ளது. அந்தப் பாதாள உலகத் தலைவர்கள் மஹிந்த கஹந்தகமவை ‘டாடா’ (Dada) என்றே அழைத்து வந்துள்ளனர்.

அரசாங்கத்தினால் ஆரம்பிக்கப்பட்டுள்ள சிறு மற்றும் நடுத்தர அளவிலான தொழிலதிபர்களுக்கான குறைந்த வட்டி கடன் திட்டம் தொடர்பில் பலருக்கு தெளிவான அவதானம் இல்லையென தெரியவந்துள்ளது.

இதற்கு தீர்வாக, தொழில் வளர்ச்சி அமைச்சர் சுனில் ஹந்துன்னெத்தி தனது உத்தியோகபூர்வ பேஸ்புக் (Facebook) பக்கத்தில் #AskHandun எனும் விசேட அம்சத்தை அறிமுகப்படுத்தியுள்ளார். இந்த அம்சத்தின் ஊடாக மக்களின் கேள்விகளுக்கு நேரடியாக பதிலளிப்பதற்கு அவர் நடவடிக்கை எடுத்துள்ளார்.

இதேவேளை, சிறு மற்றும் நடுத்தர தொழிலதிபர்களுக்கு சலுகை வட்டி கடன்களை வழங்குவதற்காக எதிர்வரும் வரவு செலவுத் திட்ட முன்மொழிவுகளில் மேலும் 13,000 மில்லியன் ரூபாவை ஒதுக்குவதற்கு திட்டமிடப்பட்டுள்ளது.

தொழில்முனைவோரின் சந்தேகங்களை தெளிவுபடுத்தும் வகையில் #AskHandun ஊடாக உங்கள் கேள்விகளையும் அவரிடம் நேரடியாக முன்வைக்க முடியும்.

உயிரிழந்த உறவுகளை நினைவுகூருவதற்கு அனைவருக்கும் உரிமையுள்ளதாகவும், அதனை அரசு தடுக்கவில்லை எனவும் பாதுகாப்பு பிரதி அமைச்சர் அருண ஜயசேகர தெரிவித்துள்ளார்.

எனினும், தடை செய்யப்பட்ட அமைப்புகளை மீளுருவாக்கும் எந்தவொரு முயற்சிக்கும் ஒருபோதும் இடமளிக்க முடியாது என அவர் வலியுறுத்தியுள்ளார்.

பாராளுமன்றத்தில் நேற்று (06) வாய்மூல விடைக்கான வினாக்கள் நேரத்தில் ஐக்கிய மக்கள் சக்தியின் குருநாகல் மாவட்ட பாராளுமன்ற உறுப்பினர் தயாசிறி ஜயசேகர எழுப்பிய கேள்விக்கு பதிலளிக்கும்போதே அவர் இதனைத் தெரிவித்துள்ளார்.

வடக்கு, கிழக்கில் ஆயுத மோதல்கள் இடம்பெற்ற காலத்தில் செயற்பட்ட ஏழு துணை ஆயுதக் குழுக்கள் தொடர்ந்து கண்காணிக்கப்பட்டு வருவதாகவும், அவற்றிடமிருந்து இராணுவத்தினரால் மொத்தம் 801 ஆயுதங்கள் கைப்பற்றப்பட்டுள்ளதாகவும் அவர் குறிப்பிட்டுள்ளார்.

அவற்றில், ஈ.பி.டி.பி.யிடமிருந்து கைப்பற்றப்பட்ட 30 ஆயுதங்கள், டக்ளஸ் தேவானந்தாவுடன் தொடர்புடைய விசாரணைகளுக்காக குற்றப் புலனாய்வுத் திணைக்களத்திடம் ஒப்படைக்கப்பட்டுள்ளதாகவும் தெரிவித்துள்ளார்.

குறித்த குழுக்களின் தலைவர்களும் பெரும்பாலான உறுப்பினர்களும் தற்போது அரசியல் நீரோட்டத்தில் இணைந்துள்ள போதிலும், தேசிய பாதுகாப்புக்கு ஏதேனும் அச்சுறுத்தல் ஏற்படுகிறதா என்பது தொடர்பில் பாதுகாப்புப் படையினரும் புலனாய்வுப் பிரிவினரும் தொடர்ச்சியாக கண்காணித்து வருவதாகவும் அவர் தெரிவித்துள்ளார்.

மேலும், தடை செய்யப்பட்ட அமைப்புகளை மீளுருவாக்குவதும், அது தொடர்பான செயற்பாடுகளை வெளிப்படுத்துவதும் சட்டப்படி குற்றமாகும் எனவும், வடக்கில் திலீபனின் சிலை அமைக்கப்பட்டமை தொடர்பில் பொலிஸ் விசாரணைகள் முன்னெடுக்கப்பட்டு நீதிமன்றத்தில் அறிக்கை சமர்ப்பிக்கப்பட்டுள்ளதாகவும் பாதுகாப்பு பிரதி அமைச்சர் அருண ஜயசேகர குறிப்பிட்டுள்ளார்.