ශ්‍රී ලංකාවේ වර්තමාන තත්වය දෙස බැලූ විට අධික රුධිර පීඩනයෙන් පෙළෙන පිරිසගෙන් සාර්ථක පාලනයක සිටින්නේ 50%ක් පමණක් බවත් දියවැඩියා රෝගීන්ගෙන් නිසි පාලනයක සිටින්නේ 25%ක් වැනි කුඩා ප්‍රතිශතයක් පමණක් බවත් සෞඛ්‍ය සහ ජනමාධ්‍ය අමාත්‍යාංශයේ ලේකම් විශේෂඥ වෛද්‍ය අනිල් ජාසිංහ අවධාරණය කරයි.
ඔහු මේ බව අවධාරණය කළේ, මුලතිව් දිස්ත්‍රික් මහ රෝහලේ නව සිව් මහල් වෛද්‍ය වාට්ටු සංකීර්ණයේ ඉදිකිරීම් කටයුතු ජනාධිපති අනුර දිසානායකගේ ප්‍රධානත්වයෙන් පසුගිය 16 වනදා ආරම්භ වූ උත්සව සභාව අමතමිණි.
එහිදී වැඩිදුරටත් අදහස් දැක්වූ සෞඛ්‍ය සහ ජනමාධ්‍ය අමාත්‍යාංශයේ ලේකම් විශේෂඥ වෛද්‍ය අනිල් ජාසිංහ,
“අපේ රටේ සිදු වන සමස්ත මරණවලින් 80%කටම හේතු වන්නේ බෝනොවෙන රෝගයි. මෙසේ මියයන 80% අතරින් ඉදිරියෙන්ම තිබෙන්නේ අධික රුධිර පීඩනය සහ දියවැඩියාවයි. අපි මේවා හඳුන්වන්නේ ‘NCDs’ (Non-Communicable Diseases) ලෙසයි.
මෙහි තිබෙන ප්‍රධාන ගැටලුව වන්නේ මෙම රෝග දෙක එකිනෙක හා සම්බන්ධ වී, පුද්ගලයෙකුගේ සෞඛ්‍ය තුළ සංකූලතා රාශියක් ඇති කිරීමයි. ශ්‍රී ලංකාවේ වර්තමාන තත්වය දෙස බැලුවහොත්, අධික රුධිර පීඩනයෙන් පෙළෙන පිරිසගෙන් සාර්ථක පාලනයක (Effective control) සිටින්නේ 50%ක් පමණයි. එමෙන්ම, දියවැඩියා රෝගීන්ගෙන් නිසි පාලනයක සිටින්නේ 25%ක් වැනි කුඩා ප්‍රතිශතයක් පමණයි. මෙන්න මේ තත්වය නිසා අද වනවිට මෙය සමාජය තුළ විශාල ගැටලුකාරී තත්වයක් බවට පත්ව තිබෙනවා.
මෙම රෝග දෙකෙහිම තිබෙන නරකම සංකූලතාව වන්නේ ‘MI’ නැතහොත් හෘදයාබාධ ඇති වීමයි. ප්‍රධානතම සංකූලතාව බවට පත්වන්නේ ද මෙයයි. එසේ නම්, අප කොහොමද මේ නවීන වසංගතය පාලනය කරන්නේ? අප හමුවේ ඇති විශාලම අභියෝගය වන්නේ මෙයයි.
රට පුරා නවීන පහසුකම් ඇති කරන ගමන්ම, අපේ සෞඛ්‍ය පද්ධතිය විසින් අපේ රටේ ජනගහන ව්‍යුහය සහ රෝග තත්වයන්ගේ ඇති වී තිබෙන වෙනස හඳුනාගත යුතුව තිබුණා. ඒ අනුව, අපේ සෞඛ්‍ය පද්ධතියත් ඊට ගැලපෙන ක්‍රවේදයන්ට සකස් කරගත යුතුව තිබෙනවා.
ජනාධිපතිතුමා ප්‍රමුඛ රජයේ ප්‍රතිපත්තිවලට අනුව, සෞඛ්‍ය අමාත්‍යතුමාගේ මාර්ගෝපදේශකත්වය යටතේ සෞඛ්‍ය හා ජනමාධ්‍ය අමාත්‍යාංශය විසින් මේ වනවිට කරගෙන යනු ලබන්නේ එවැනි දැවැන්ත වැඩපිළිවෙළක්. එහි ප්‍රධාන කොටස් තුනක් තිබෙනවා. ආරෝග්‍යා (Arogya), Cluster Systems සහ High-End Care Institutions යන තුන අපේ සෞඛ්‍ය පද්ධතියට ගැලපෙන ලෙස සකස් කරගැනීම ඉදිරියට ඉතා වැදගත් වෙනවා.”
